Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Efisesa 4:1-32

BIJI MU BUKU

  • Kukwatankana mu mubiji wa Kilishitu (1-16)

    • Bantu kwikala bya bupe (8)

  • Bumuntu bwa kala ne bupya (17-32)

4  Onkao mambo, amiwa kaili+ mwi Nkambo, nemusashijila namba mwendenga monka mwayila lwito+ lo mwaichilwe,  na kwipelula konse,+ kukooka muchima, ne na butekanye,+ saka mwitekenya anwe bene na bene mu butemwe,+  ne kwibikishako kulama buumo bwa mupashi mu mutende ulengela kukwatankana.+  Kuji mubiji umo+ ne mupashi umo,+ byonkatu byo kuji luketekelo lumo+ lo mwaichilweko;  kujitu Nkambo umo,+ lwitabilo lumo ne lubatizhilo lumo;  Lesa umo kabiji Shabo bantu bonse, wakila bonse, wingila mu bonse. Kabiji bulume bwanji bwingila mu bonse.  Atweba bonse pa muntu pa muntu betubijile lusa lukatampe kabiji kino kyaubiwe monka mwayijile bupe bo apimine Kilishitu.+  Mambo, kyaambiwa’mba: “Byo akanjijile mwiulu wasendele bazha; kabiji wapaine bantu kwikala bya bupe.”+  Pano byambo kya kuba’mba “wakanjijile mwiulu” byalumbulula ka, ne kuba’mba waikijile munshi, ko kuba’mba pano pa ntanda? 10  Uno yenka waikijile ye yenka wakanjijile+ kupitaila meulu onse+ kuba’mba afikizhe bintu byonse. 11  Kabiji bamo wibatongwele kwikala batumwa,+ bakwabo bangauzhi,+ bakwabo basapwishi,*+ bakwabo bakafunga kabiji bakwabo kwikala bafunjishi,+ 12  kuba’mba bololengako* bazhijikwa, kwikala ba kwingijila bakwabo ne kukomesha mubiji wa Kilishitu,+ 13  kufikatu ne kimye atweba bonse kyo tukekala na lwitabilo lumo ne kumuyuka bulongo Mwana Lesa, ne kwikala nobe muntu wakoma+ wafika ku kimino kya Kilishitu. 14  Onkao mambo, kechi twafwainwa kukikalanga nobe baana ba bacheche ne, mambo awa ulondela mafunjisho+ a bubela a bantu bajimbaika bakwabo, uji nobe bwato bukumpaulwa ne kulelaulwa na manyaki. 15  Bino pa kwamba bukine monka mu butemwe, twayai tukomenga mu bintu byonse mwi aye mutwe, Kilishitu.+ 16  Mwi aye, mo mwanungakena binungwa byonse bya mubiji+ ne kwibilengela kukwatankana mu manungi onse apana bibena kukebewa. Umvwe kinungwa kyonse kibena kwingila bulongo, kilengela mubiji kukoma ne kubaya mu butemwe.+ 17  Onkao mambo, nemwambila kino ne kwimusashijila mu jizhina ja Nkambo namba, kange mukyendenga mwendela bantu ba mu bisaka bya bantu+ mwayila milanguluko yabo yatu ne.+ 18  Abo milanguluko yabo iji mu mfishi kabiji bebafumya ku bumi bufuma kwi Lesa, mambo kechi bakeba kumuyuka Lesa ne, na mambo a kukosa* kwa michima yabo. 19  Byo baleka kumvwa bumvu, bepana kuba byubilo bya kwizozola*+ ne kuba bubipisho bonse na lwiso. 20  Bino anweba mwafunjile ne kuyuka’mba Kilishitu kechi uji bino ne, 21  umvwe kine mwamumvwine kabiji bemufunjishe kupichila mwi aye, byonkatu bukine byo buji mwi Yesu. 22  Bemufunjishe kuba’mba mwafwainwa kuvuula bumuntu bwa kala+ bwa mwayijile byubilo byo mwajinga nabyo kala kabiji bubena kujimbaikwa na milanguluko yatama imutwala mungi.+ 23  Kabiji mwafwainwa kutwajijila kulengwa ke bapya mu michima* yenu,+ 24  ne kuvwala bumuntu bupya+ bwalengelwe monka mwayila kyaswa muchima wa Lesa mu bololoke ne mu bukishinka bwa kine. 25  Onkao mambo, pano byo mwaleka kwamba bubela, iambilainga bya kine anwe bene na bene,+ mambo atweba twi binungwa bya mubiji umo.+ 26  Mwakonsha kuzhingila, bino kange mulenge mambo ne;+ kange muzhikishe juba monka mwazhingijila ne;+ 27  kabiji kange mumushile kanya Diabola ne.*+ 28  Awa wiba ekileke; bino engile na ngovu, ne kwingila mingilo yawama na maboko anji+ kuba’mba amwenemo byawama bya kupapo wakajilwa.+ 29  Kange muleke byambo byatama bilupuke mu kanwa kenu ne,+ poso byawama byonka bikomesha bantu bibafwainwa pa kyonkakyo kimye kuba’mba bikwashe aba babena kwibyumvwa.+ 30  Kabiji kange mulengele mupashi wazhila wa Lesa kwikala na bulanda ne,+ mambo mwabikwa kayukilo na uno mupashi+ kuba’mba mukakuulwe na bukuzhi+ juba ja kupokololwa byo jikafika. 31  Mfika yonse po yapela,+ bukaji ne kubuuka bukaji, kubwazanga, mwenga+ ne bintu byonse byatama+ mwibifumyemo mwi anweba. 32  Bino saka mwiubila lusa anwe bene na bene, mwikale na michima ya kifyele+ saka mwilekelako mambo anwe bene na bene byonkatu Lesa byo emulekejileko mambo mwi Kilishitu.+

Tubyambo twa munshi

Nangwa’mba “bataya mbila ya mambo awama.”
Nangwa’mba “bafunjishe.”
Mu Kingiliki, “kubula kuyuka bintu.”
Nangwa’mba “byubilo bya bumvu.” Mu Kingiliki, aselegeya. Monai Mutanchi.
Nangwa’mba “mu bulume bulengela milanguluko yenu kwingila.” Mu Kingiliki, “mupashi wa milanguluko yenu.”
Nangwa’mba “kumushila mpunzha Diabola ne.”