Pa kuba’mba ne atweba tumwenemo mu mubiji ne mashi a kwa Yesu, twafwainwa kwitabila mu bukuzhi. (Efi. 1:7) Aba Yesu bo atelele kuba’mba “mikooko ikwabo” kechi baja shinkwa ne kutoma binyu pa Kijiilo kya Nkambo kya Mabanga kikalako pa mwaka pa mwaka ne. (Yoa. 10:16) Nangwa byonkabyo, bamwenamo bingi mu mubiji ne mashi a kwa Yesu Kilishitu. Bamwenamo inge baitabila mu kitapisho kyanji ne kwimwena bintu byawama bifumamo. (Yoa. 6:53) Kupusanako, aba bajako bamwesha kuba’mba baji mu lulayañano lupya kabiji bakekala banswanyi mu Bufumu bwa mwiulu. Inge twi bashingwa nangwa twi ba mikooko ikwabo, twafwainwa kwikala na lwitabilo lwakosa mu bukuzhi pa kuba’mba tukekale na bumi bwa myaka ne myaka. w24.12 13 ¶14, 16

Pa Kijiilo kya Nkambo kya Mabanga, Yesu wapele batumwa banji shinkwa wabula mbizho ne kwibambila’mba waimenejilengako mubiji wanji. Kabiji wibapele binyu ne kwamba’mba byaimenejilengako ‘mashi a lulayañano.’ (Mako 14:22-25; Luka 22:20; 1 Ko. 11:24) Mu lulayañano lupya, mujitu “ba mu nzubo ya Isalela” ba ku mupashi bakekala “mu Bufumu bwa Lesa.” (Hebe. 8:6, 10; 9:15) Byambo byaambile Yesu pa Kijiilo kya Nkambo kya Mabanga byaambilenga kikatakata pa “kajitanga kacheche.” Kano ka jibumba katendekele na batumwa banji bakishinka bo ajinga nabo mu kibamba. Abano bo bakekala pamo ne Yesu mwiulu. w24.12 11 ¶9-10

Yesu bamufutukilemo, kumukwata, kumwambila mwenga, kwamba byatama pe aye, kumupamo mambo a bubela ne kumumanyika. Bashilikale bamutwajile ku mpunzha kwa kumwipayila ne kumupopela pa kichi. Byo achinchikile mu bukishinka mu bino bintu byo amanaminenga, kwajinga muntu wakizhizhemo kumvwa kukola ku muchima. Uno muntu ke Yehoba Lesa. Yehoba wajinga na bulume bwa kumupokolola, pano bino, pa kikye kimye kechi byo byo aubile ne. Mambo ka? Mambo Yehoba witutemwa. Kitapisho kya kwa Yesu kyo kintu kikatampe kimwesha’mba Yehoba wimutemwa bingi. Wapaine Mwananji awa umotu kabiji kyamukolele bingi ku muchima pa kubatu’mba emupokolole ku bundengamambo ne lufu. (1 Yoa. 4:9, 10) Kinetu, ukebesha bingi atweba bonse kushinda bundengamambo. w24.08 6 ¶13-14

Twakonsha kumvwisha Yehoba byo etutemwa inge twalanguluka pa byo kyamukolele ku muchima pa kupana bukuzhi. Satana wamba’mba kafwako kalume wa Lesa wakonsha kutwajijila kwikala wa kishinka inge ubena kupita mu makatazho ne. Pa kuba’mba amweshe’mba byamba Satana bya bubela, Yehoba waswishishe Yesu kumanama saka akyangye kufwa. (Yoba 2:1-5) Yehoba wamwenenga bantangi ba bupopweshi byo baendelekelenga Yesu, kumupuma ku bashilikale ne kumupopa pa kichi. Kabiji Yehoba wamwenenga Mwananji ye atemwisha byo afwile lufu lwatama bingi. (Mat. 27:28-31, 39) Yehoba wajinga na bulume bwa kukanya bino byonse kubula kumweka. (Mat. 27:42, 43) Pano bino, inge Lesa waubile bino, bukuzhi inge kechi bwapainwe ne, kabiji inge kechi tuji na luketekelo ne. Onkao mambo, Yehoba waswishishe Mwananji kumanama kufikatu ne byo afwile. w25.01 22 ¶7

Mwajinga mu mwaka wa Nisanyi 16, 33 C.E. Baana ba bwanga ba kwa Yesu bajinga bingi na bulanda kabiji baumvwine bingi moyo. Baana banji ba bwanga babiji bafumine ku Yelusalema ne kuya ku Emasa. Mwanamulume ye babujile kuyuka wasolomokele ne kutendeka kuya nabo mu jishinda. Baana ba bwanga batendekele kumushimikizha bintu byatama byamwekejile Yesu. Uno mwanamulume watendekele kwibabuula bintu byo bakonsheshe kubula kulubamo. Waingijishe Binembelo byaambilenga kutendekela pe Mosesa ne byanembele bangauzhi bonse kwibalumbulwila ene mambo Mesiasa o afwainwe kumanama ne kufwa. Bano banabalume basatu byo bafikile ku Emasa, uno mwanamulume mwenyi wisolwele kwi abo kuba’mba wajinga Yesu ye basangwile. (Luka 24:13-35) Yesu wamwekele ku baana banji ba bwanga bimye byavula pa moba 40 apeleleko mu bwikalo bwanji bwa pano pa ntanda. Pa kyokya kimye, baana ba bwanga ba kwa Yesu bajinga na bulanda ne moyo, baikele jibumba ja basapwishi ne bafunjishi ba Bufumu ja lusekelo kabiji jachinchika. w24.10 12 ¶1-3

Mwana uya na kukoma monka mu bena kuyila myaka. Pano bino, muntu pa kuba’mba akome ku mupashi, wafwainwa kwibikako. Abino byo byaubile ne balongo ne banyenga ba mu Kolinda. Baswile mambo awama, kubatizhiwa, kutambwila mupashi wazhila kabiji bamwenejilemo bingi mu bibafunjishe mutumwa Paulo. (Byu. 18:8-11) Pano bino, byo papichile myaka panyuma ya kubatizhiwa, bavula kechi bakomejileko ku mupashi ne. (1 Ko. 3:2) Pa kuba’mba tukome ku mupashi, patanshi twafwainwa kwikala na kizaku kya kukeba kukoma ku mupashi. Aba ‘batemwa bulubi,’ ko kuba’mba bakeba kutwajijila kwikala byo baji, kechi bakakoma ku mupashi ne. (Maana 1:22) Kechi twafwainwa kwikala nobe bantu bakoma bakeba bansemi babo kutwajijila kwibafuukwilanga bintu ne. Pakuba twafwainwa kwibikako atweba bene kukosesha bulunda bwetu ne Yehoba. Inge kibena kwimukatazha kukomenako ku mupashi, lombai kwi Yehoba kwimupa “kizaku ne bulume bwa kwingila.”​—Fili. 2:13. w24.04 4 ¶9-10

Yehoba witusolwela byo omvwa ku muchima pa kuchibila bantu mambo. (Ezi. 33:11) Yehoba kechi wipaya muntu kuba’mba akafwe myaka ne myaka ne, kanatu inge kwaikala kine kintu kyakonsha kumulengela kuba bino. Yehoba uji bingi na lusa kabiji umwesha bantu lusa inge kekikebewe. Ñanyi bintu byo twayukapo pa bantu bakabula kusangulwa? Baibolo waambapotu pa bantu bacheche. Yesu waambile’mba Yudasa Isakaliota kechi bakamusangula ne. (Mako 14:21; monai ne Yoano 17:12.) Yudasa wasatukijile Yehoba ne Mwananji kya nshiji. (Monai Mako 3:29 ne mutwe uji pa jw.org wa kuba’mba Mambo Abulwa Kulekelwa o Epi, nangwa w07 8/1 jifu. 8.) Kabiji Yesu waambile pa bantangi ba bupopweshi bamo bamukaine amba bafwainwe kufwa kwa kubula luketekelo lwa kusangulwa. (Mat. 23:33) Mutumwa Paulo wajimwineko’mba bansatuki babula kulapila kechi bakasangulwa ne.​—Hebe. 6:4-8; 10:29. w24.05 4 ¶10-11

Inge twatwajijila kufwenya kwipi ne Yehoba, Satana kechi ukoba kintu kyatama kyakonsha konauna bulunda bwetu ne Yehoba myaka ne myaka ne. (1 Yoa. 3:8) Mu ntanda ipya, Yehoba ukatwajijila kuzhikijila balunda nanji ba kishinka, kechi ku bintutu byakonsha konauna bulunda bwabo ne aye ne, bino ukafumyapo ne lufu. (Lum. 21:4) Ke kintu kyanema bingi kwikala mwenyi mu tente wa Yehoba ne kutwajijila kwikala na bulunda bwawama ne aye. (Ezi. 37:27) Ñanyi bintu byo twafwainwa kuba pa kuba’mba tutwajijile kwikala benyi banji? Inge muntu wimwita ku nzubo kwanji mukalondela bintu byo akeba’mba mube. Po pamotu, ne atweba twafwainwa kuyuka bintu Yehoba byo akeba atweba kuba pa kuba’mba tutwajijile kwikala benyi . Na mambo a kuba’mba twatemwa Yehoba, twibikako kuba bintu ‘bimutokesha ku muchima.’ (Kolo. 1:10) Kimye kyonse twafwainwa kuvulukanga bino ne kutwajijila kumupa munema. Kwikala na uno moyo wa kwakamwa Yehoba kuketukwasha kuchinuzhuka kuba bintu byakonsha kumufichisha ku muchima. Kimye kyonse tukebesha ‘kwendanga na Lesa saka twipelula.’​—Mika 6:8. w24.06 4 ¶8-9

Yehoba wakambizhe Abalahama kupana mwananji wamulume, aye Izaka kwikala kitapisho. Kino kintu kyo bamukambizhe Abalahama kuba, kyamukolele bingi ku muchima. Nangwa byonkabyo, wakookejile byamukambizhe Yehoba. Pano bino, byo kwashajiletu tiki kuba’mba epaye mwananji, Yehoba wamukainye kuba bino. Ku kino kintu kyamwekele, bantu bonse baji na lwitabilo bafunjilako kintu kyanema bingi. Yehoba waswile kupana mwananji ye atemwa bingi kwikala kitapisho. Kabiji kino kimwesha’mba Yehoba watemwa bingi bantu. (Nte. 22:1-18) Byo papichile myaka ikwabo yavula, mizhilo yo bapele kisaka kya bena Isalela, yaswishishe kupana bitapisho byavula pa kuba’mba bantu ba Lesa bebalekeleko mambo abo. (Levi 4:27-29; 17:11) Bino bitapisho byaimenejilengako kitapisho kikatampe kyo bafwainwe kupana pa kuba’mba bantu bebakuule ku bundengamambo kikupu. Bangauzhi ba Lesa bebatangijile na mupashi kulumbulula kuba’mba mwana walailwe, ko kuba’mba Mwana Lesa ye atemwisha wafwainwe kumanama ne kufwa pa kuba’mba apulushe bantu ne anweba pamo ku bundengamambo ne lufu.​—Isa. 53:1-12. w24.08 4 ¶7-8

Inge mwatanga byepelo bimo mu Baibolo, langulukai pa byo mwafwainwa kwibingijisha. Inge mubena kutanga byepelo bimo mu Mambo a Lesa, iipuzhai’mba: ‘Nakonsha kwingijisha byepi bino bintu byo natanga luno nangwa kulutwe?’ Twambe’mba mwatanga 1 Tesalonika 5:17, 18. Panyuma ya kutanga bino byepelo bibiji, mwakonsha kutulumana ne kulanguluka pa bimye byo mulomba kabiji inge mulomba kufuma panshi ya muchima. Kabiji mwakonsha kulanguluka pa bintu byo mwafwainwa kusanchila Yehoba. Kampe mwakonsha kufuukulapo kusanchila Yehoba pa bintu bisatu. Nangwatu pa maminiti acheche inge mwalanguluka pa bintu byo mwafunjilako mu byo mwatanga mu Baibolo, kuba bino kukemukwasha kumvwisha ne kuba byamba Mambo a Lesa. Langulukai pa byo mwafwainwa kumwenamo inge kemube bino pa juba pa juba pa kutanga bintu bikwabo bya mu Baibolo. Kinetu, mukatwajijila kubanga byamba Mambo a Lesa. w24.09 4-5 ¶9-10

Yehoba witulengele na muchima wa kubila bakwetu byawama. Nangwa kya kuba tumvwa bingi bulongo inge bakwetu betupa kintu, bino tukizhamo kwikala na lusekelo inge ketupe bakwetu. Tumvwa bingi bulongo kukwasha bena Kilishitu bakwetu. Kabiji tumvwa bingi bulongo inge betusanchila. Nangwa byonkabyo, muntu ye twaubila kyawama inge witusanchila nangwa ne, twafwainwa kusekela mambo twauba kintu kyawama. Vulukainga kuba’mba inge mwapana, “Yehoba wakonsha kwimupa bintu byavula.” (2 Moba 25:9) Yehoba ukemupa byavula kukila ne byo mwakonsha kupa bakwenu. Kafwako mfweto ikwabo yakila mfweto yakonsha kwitupa Yehoba ne. Twayai tutwajijile kulondela Shetu wa mwiulu mpanyi. w24.09 31 ¶20-21

Yehoba wa lusa ne kifyele. (Sala. 103:13; Isa. 49:15) Yehoba umvwa bingi kutama ku muchima inge tubena kupita mu makatazho. (Zeka. 2:8) Witukwasha kufwenya kwipi ne aye pa kuba’mba twikale balunda nanji. (Sala. 25:14; Byu. 17:27) Kabiji wipelula bingi mambo “ukunama ne kutala jiulu ne ntanda, wimanya wakajilwa kufuma mu lukungu.” (Sala. 113:6, 7) Na mambo a bino bintu byonse, tukebesha kupa lukumo Lesa wetu mukatampe. Tupa Yehoba lukumo mambo tukeba kukwasha bantu kumuyuka. Bantu bavula kechi bayuka bukine bwaamba pe Yehoba ne. Mambo ka? Mambo Satana wibapofula michima kupichila mu kusampanya bya bubela pe Lesa. (2 Ko. 4:4) Satana ulengela bantu kulanguluka’mba Yehoba ushinkanya, kechi wituta muchima ne, kabiji amba ye ubena kulengela makatazho aji mu ntanda. Nangwa byonkabyo, atweba twayuka bukine pe Lesa. Twafwainwa kukwasha bantu kuyuka Lesa byo aji pa kuba’mba nabo bamuletelenga lukumo.​—Isa. 43:10. w25.01 3 ¶6-7

Mu myaka kitota kitanshi, bantu ba kwa Satana baambilenga bintu bya bubela byavula bingi pa Mwana Lesa. Bantangi ba bupopweshi nabo baambijilenga bantu amba Yesu wapangilenga bandemona na bulume bwa “mukulumpe wa bandemona.” (Mako 3:22) Yesu byo bamutotolweshenga, bantangi ba bupopweshi bamupelemo mambo amba waambilenga mwenga. Kabiji bano bantangi batundaikile mabumba a bantu kuba’mba bamwipaye. (Mat. 27:20) Palutwe kacheche, baana ba bwanga ba kwa Kilishitu byo basapwijilenga mambo awama, aba bebakainyenga “balengejile bantu ba mu bisaka bya bantu kwalukilamo” bena Kilishitu ne kwibamanyika. (Byu. 14:2, 19) Kyamba kya Usopa kya December 1, 1998, kyaambile pa kinembelo kya Byubilo 14:2 amba: “Bantu batundaika Satana bakainenga mambo awama asapwijilenga bena Kilishitu, kabiji baambilenga bintu byatama pe abo. Baubile bino pa kuba’mba bantu baleke kuteleka ku mambo awama o basapwijilenga, kabiji kino kyalengejile bena Kilishitu kwibashikwa.” Lelo jino Satana watwajijila “kujimbaika bantu ba pano pa ntanda ponse.” w24.04 11 ¶15-16

Bumi bwa myaka ne myaka bwa muntu kechi bwaimena pa kimye kyo akonsha kufwa ne. Yehoba ye Nchibamambo waoloka kabiji kimye kyonse uba byaoloka. (Sala. 33:4, 5) Twafwainwa kushiinwa kuba’mba “Mutonyi wa ba pano pa ntanda ponse” ukoba kyaoloka. Kabiji twakonsha kwamba’mba bumi bwa myaka ne myaka bwa muntu kechi bwaimena na ko ekala ne. Yehoba kechi wakonsha kutela mamilyonyi a bantu bekala mu byalo mo kyakatazha kumvwa mambo a Bufumu kuba’mba bambuzhi ne. (Mat. 25:46) Mutonyi waoloka wa ba pano pa ntanda ponse wata bingi muchima bano bantu kukila ne byo twibata muchima atweba. Kechi twayuka Yehoba byo akoba bintu mu kimye kya malwa akatampe ne. Kampe Yehoba ukapa bano bantu bamo kimye kya kufunda pe aye, kumwitabila ne kufuukulapo kumwingijila kimye kyo akezhijika aye mwine ku bisaka byonse bya bantu.​—Ezi. 38:16. w24.05 12 ¶14-15

Bantu ba Yehoba bekwasha abo bene na bene. (2 Ko. 8:4) Nangwa byonkabyo, pa bimye bimo bachinchika pa kuba’mba bobe bino. Inge kwabuuka nkondo, bakulumpe mu kipwilo bayuka’mba balongo ne banyenga bakebewa kwibatundaika, kwibatekenesha ne kwibakwasha kukosesha bulunda bwabo ne Yehoba nangwa kwibakebela bintu byo bakajilwa. Na mambo a kuba’mba batemwa mikooko ya Lesa, bakulumpe mu kipwilo babika bumi bwabo mu kizumba pa kuba’mba bebanengezhezhe bintu byo bakeba. Mu bimye bya uno mutundu, twafwainwa kutwajijila kwikala bakwatankana. Mwafwainwa kulondela mikambizho yafuma ku ofweshi wa musampi wa mu kyalo kyenu. (Hebe. 13:17) Pa kimye pa kimye, bakulumpe mu kipwilo bafwainwa kupitulukanga mu bintu byo banengezha kuba ne bibabuula jibumba ja Lesa kuba inge kwamweka bya malwa. (1 Ko. 14:33, 40) Chinchikai ne kwikala bajimuka. (Maana 22:3) Langulukilai jimo bya kuba. Mwafwainwa kujimuka pa kukwasha bena Kilishitu bakwenu. Ketekelai mwi Yehoba. Ukemulengela kuyuka jishinda jawama ja kukwashishamo balongo ne banyenga. w24.07 4 ¶8; 5 ¶11

Mfumu Davida wayukile bulongo Yehoba kabiji waketekejile mwi Aye. Balwanyi banji kuvwangakotu ne Mfumu Saulo byo bakebelenga kumwipaya, Davida walombele kwi Yehoba kuba’mba amukwashe. Lesa byo akumbwile lulombelo lwanji ne kumupokolola, Davida waambile’mba: “Yehoba mumi!” (Sala. 18:46) Byo aambile bino byambo, Davida kechi walumbulwilengatu’mba Lesa ko aji ne. Buku umo waamba’mba Davida wamwesheshenga’mba waketekejile mwi Yehoba kuba’mba “ye Lesa mumi utwajijila kukwasha bantu banji.” Na mambo a byamumwekejile, Davida wayukile’mba Lesa mumi kabiji kino kyamutundaikile kutwajijila kwingijila Yehoba ne kumutota. (Sala. 18:28, 29, 49) Inge twashiinwa kuba’mba Yehoba ye Lesa mumi, kino kiketukwasha kumwingijila na mukoyo. Tukekala na bulume bwa kuchinchika meseko ne kwikala na kizaku kya kutwajijila kwingila na mukoyo mu mwingilo wa Lesa. Kabiji tukatwajijila kufwenya kwipi ne Yehoba. w24.06 20-21 ¶3-4

Ñanyi bintu byo tufunjilako ku byambo mutumwa Paulo byo anembejile bena Tesalonika? Inge twaumvwa byambo byapusana na byo twafunda mu Baibolo nangwa masawakya abena kumvwanyika nobe a kine, twafwainwa kwingijisha milangwe. Mu kyalo kyo batelenga kala amba Soviet Union, balwanyi betu basampenye nkalata yo baambile’mba yafumine ku ofweshi mukatampe wa ntanda yonse. Ino nkalata yatundaikile balongo bamo kwilengela jibumba jabo japusanako. Ino nkalata yamwekelenga nobe ya kine. Pano bino, balongo ba kishinka abo kechi bajimbaikilwe ne. Bayukile kuba’mba byambo byajinga mu ino nkalata kechi byaswañene na bintu byo bafunjile ne. Lelo jino, balwanyi bashikwa bukine bakonsha kwingijisha intaneti pa kuba’mba betongole ne kwitwabanya. Mu kifulo ‘kyakupelawizha kuzhinauka,’ twakonsha kwizhikijila inge twalangulukishapo bulongo pa bintu byo twaumvwa nangwa byo twatanga inge byaesakana na bukine bo twafunda.​—2 Tesa. 2:2; 1 Yoa. 4:1. w24.07 12 ¶14-15

Kintu kyakilapo kunema kifuukulapo muntu ke kwipana aye mwine kwi Yehoba ne kwiya mu kisemi kya bapopweshi banji. Yehoba ukeba bantu bonse kuba bino. Mambo ka? Ukeba’mba bekale balunda nanji ne kukekala na bumi bwa myaka ne myaka. (Mpitu. 30:19, 20; Nga. 6:7, 8) Nangwa byonkabyo, Yehoba kechi ukanjikizha muntu kumwingijila ne. Pakuba uswisha muntu mwine kwifuukwilapo kintu kyo akeba kuba. Pano ñanyi kintu kyakonsha kumwekela mwina Kilishitu wabatizhiwa walala mizhilo ya Lesa na mambo a kulenga mambo akatampe? Inge kechi walapila ne, bafwainwa kumufumya mu kipwilo. (1 Ko. 5:13) Nangwa byonkabyo, Yehoba ukeba’mba uno muntu walenga mambo abwele kwi aye. Kino kyo kine kintu kyalengejile kuba’mba anengezhe bukuzhi pa kuba’mba bandengamambo balapila balekelwe mambo abo. Yehoba Lesa wetu wa butemwe usashijila bantu balenga mambo akatampe kuba’mba balapile.​—Zeka. 1:3; Loma 2:4; Yako. 4:8. w24.08 14 ¶1-2

Mutumwa Yoano byo anembelenga nkalata ya busatu, bantu bamo basampenyenga mafunjisho a bubela ne kuleta mabano mu kipwilo. Nangwa byonkabyo, bamo batwajijile “kwenda mu bukine.” Bakookejilenga Yehoba kabiji ‘baendelenga monka mwayila mikambizho yanji.’ (2 Yoa. 4, 6) Bano bena Kilishitu bakishinka balengejile Yoano ne Yehoba kwikala na lusekelo. (Maana 27:11) Ñanyi bintu byo tufunjilako? Kwikala bakishinka kwitulengela kwikala na lusekelo. (1 Yoa. 5:3). Twikala na lusekelo inge twayuka kuba’mba tubena kutokesha Yehoba ku muchima. Yehoba utemwa bingi byo twibikako kushinda meseko a mu ino ntanda ne kutwajijila kwenda mu bukine. Bilengwa bya mwiulu nabyo bisekela bingi. (Luka 15:10) Ne atweba tusekela bingi inge twamona bakwetu batwajijila kwikala bakishinka. (2 Tesa. 1:4) Inge ino ntanda ya kwa Satana beyonauna, tukekala bingi na lusekelo pa kutwajijila kwikala bakishinka kwi Yehoba. w24.11 12 ¶17-18

Pafwainwa kupita kimye kyabaya byepi pa kuba’mba mubuule muntu ye mubena kutalatala amba mwamutemwa? Inge mwapelawizha kubuula muntu amba mukesongola, ko kuba’mba mwauba kanswatu. (Maana 29:20) Kabiji inge mwabanda kumubuula, kikatakata awo muntu inge wakwatakanya kala amba mwamutemwa, kino kikamwesha’mba kechi mwatako muchima ne. (Sapwi. 11:4) Vulukainga kuba’mba saka mukyangye kusolomoka muntu, kechi mwafwainwa kufikenatu kupwisha mu muchima amba mukasongola uno muntu ne. Mwafwainwa kushiinwa’mba mwinengezha kutwela mu masongola ne kuba’mba awo muntu wimufwainwa kutwela nanji mu masongola. Mwafwainwa kuba byepi inge mwayuka’mba muntu wimutemwa kabiji amba ubena kukeba kwimuyuka bulongo? Inge kechi mubena kukeba ne, mweshai byubilo bisakumulengela kuyuka’mba kechi mubena kukeba ne. Kechi kyakonsha kuwama kulengela muntu kulanguluka’mba mukeipanguzha kulutwe, bino saka mwabula mulanguluko wa kuba’mba mukesongola ne.​—Efi. 4:25. w24.05 22-23 ¶9-10

Bashingwa ba kine kabiji ba kishinka bo bonka Yesu bo akatambwila mu Bufumu bwa mwiulu. Mushingwa yense ukabula kutwajijila kulaba ne kukenkenta kechi ukekala pa boba “basalwa” ne. (Mat. 24:31) Bantu ba Lesa bonse, baji na luketekelo lwa kuya mwiulu nangwa lwa kwikala pano pa ntanda, bafwainwa kulondela byambo bya lujimuno byaambile Yesu bya kwikala balaba ne kukenkenta ne kutwajijila kwikala ba kishinka. Twamuyuka bingi bulongo Yehoba kabiji twaketekela’mba byonse byo oba byaoloka. Kechi twafwainwa kukumya inge Yehoba wasala bantu bamo ba kishinka kwikala bashingwa mu ano moba ne. Tuvuluka byaambile Yesu pa ba mingilo ba kwingila mu bujimi mu jiola ja bu 11 bo baambapo mu kishimpi kya miñanzañanza. (Mat. 20:1-16) Bamingilo bapeleleko bo baichile kwiya na kwingila mu bujimi bebapele mfweto imotu na boba batendekejilepo kwingila. Po pamotu, bashingwa bashingilwe kala ne bo babena kushinga katataka bonse bakatambula mfweto yabo ya mwiulu inge batwajijila kwikala ba kishinka. w24.09 24 ¶15-17

Twafwainwa kufunjila kwi Yesu byo achinchikile makatazho. Ba mu kisemi kyanji bamwambijilenga byatama ne bantutu bakwabo. Balongo banji babula kwitabila bamwambijilenga’mba wakonya, bantangi ba bupopweshi bamubepejilenga’mba wisamba na bandemona, bashilikale ba bena Loma bamwendelekelenga, kumupuma kabiji bamwipayile. (Mako 3:21, 22; 14:55; 15:16-20, 35-37) Nangwa byonkabyo, Yesu wachinchikile ano makatazho onse kwa kubula kushinkanya nabo. Ñanyi bintu byo twafwainwa kufunjilako? (1 Petelo 2:21-23) Yesu witushijile mwa kulondela inge betuba nshiji. Wayukile kimye kya kuzhindama ne kimye kya kwamba. (Mat. 26:62-64) Kechi kimye kyonse kyo akumbulanga inge bantu baamba bya bubela pe aye ne. (Mat. 11:19) Pa kwibakumbula, Yesu kechi waambilanga mwenga bamumanyikanga nangwa kwibazakamisha ne. w24.11 4-5 ¶9-10

Fwanyikizhai’mba mwapa muntu ye mwatemwa bupe bwanema kabiji bwakonsha kumukwasha. Mwakonsha kumvwa kutama ku muchima inge uno muntu watulatu buno bupe mu nzubo kwakubula kwibwingijisha. Pano bino, mwakonsha kumvwa bingi bulongo inge uno muntu wimusanchila pa bupe bo mwamupa ne kwibwingijisha. Ñanyi kishinka kyo tubena kwambapo? Yehoba wapaine Mwananji kwiya na kwitufwila. Yehoba wakonsha kumvwa bingi bulongo inge ketumweshe’mba tumusanchila pa buno bupe bwanema bo etupa ne butemwe bwanji bwamulengejile kunengezha bukuzhi. (Yoa. 3:16; Loma 5:7, 8) Nangwa byonkabyo, pa kupitapo kimye, twakonsha kutendeka kumona’mba buno bupe bwa bukuzhi kechi bwanema ne. Kuba bino kijitu nobe kutuula buno bupe mu nzubo bwitupa Lesa kwakubula kulangulukapo nangwa kwibwingijisha. Pa kuba’mba kino kibule kwitumwekela, kimye kyonse twafwainwa kulangulukanga pa bintu bitubila Lesa ne Kilishitu. w25.01 26 ¶1-2

Mulongo wafikilamo kwikala mukulumpe mu kipwilo, kechi wafwainwa kwikala muntu waitabila katataka ne. Nangwa kya kuba kechi pafwainwa kupita myaka yavula kufuma kimye kyo mwabatizhiwe ne, bino mwafwainwa kwikala na kimye kyabaya kya kukosesha bulunda bwenu ne Yehoba ne kuyuka bya kufuukula bulongo bintu. Saka bakyangye kwimutongola kwikala mukulumpe mu kipwilo, mwafwainwa kwipelula byonka byajinga Yesu ne kuketekela amba Yehoba ukemupa mingilo mu kipwilo. (Mat. 20:23; Fili. 2:5-8) Mwakonsha kumwesha’mba mwi ba kishinka inge mwatwajijila kwingijila Yehoba, kukookela mikambizho yanji ne kulondela bintu Yehoba byo etubuula kwingijisha jibumba janji. Binembelo byamba’mba bakalama bafwainwa kuyuka kufunjisha. Nanchi kino kibena kulumbulula’mba mwafwainwa kuyukisha bulongo kwamba majashi nyi? Ine. Bakulumpe mu kipwilo bavula nangwa kya kuba kechi bayukisha kwamba bulongo majashi ne, bafunjisha bingi bulongo bantu mu mwingilo kabiji bengila bingi bulongo mwingilo wa bukafunga. w24.11 23-24 ¶14-15

Inge mwatanga byambo bimo mu Baibolo byo mwabula kumvwisha, kebakebai bishinka. Kabiji mwafwainwa kulanguluka languluka pa bishinka byo mwataana byo bibena kwimufunjishapo pe Yehoba, Mwananji ne byo bemutemwa. (Sala. 119:97, tubyambo twa munshi.) Inge mwakankalwa kutaana bintu bya katataka nangwa byo mwatemwa kimye kyo mubena kutanga Baibolo nangwa pa kukebakeba bishinka, kechi mwafwainwa kulefulwa ne. Kijitu nobe muntu ubena kukebakeba ngolode. Bantu bakeba ngolode bataya maola nangwa moba avula pa kubatu’mba bataane nangwa ka ngolode kacheche. Nangwa byonkabyo, batwajijila na kukebakeba mambo kwi abo nangwatu ka ngolode kacheche kanema bingi. Bintu bya katataka byo tufunda mu Baibolo abyo byanema bingi kukila ne ngolode. (Maana 8:10) Onkao mambo, twajijilai kutanga Baibolo ne kukebakeba bishinka bya katataka.—Sala. 1:2. w25.01 25 ¶14-15

Yehoba ukeba’mba tulekelengako bakwetu mambo betuzhingijisha. (Sala. 86:5; Luka 17:4; Efi. 4:32) Kyakonsha kwitukozha bingi ku muchima inge muntu witwambila nangwa kuba byatama kikatakata umvwe awo muntu mulunda netu nangwa wa mu kisemi. (Sala. 55:12-14) Pa bimye bimo, akwa kukola ko tumvwa, twakonsha kwikwesakanya ku muntu ye baasa mpoko. (Maana 12:18) Kimye kimo inge betuzhingijisha twakonsha ketufwiletu mukachi. Pano bino, kuba bino kyakonsha kwikala nobe muntu ye baasa mpoko pa mubiji ne kwiilekelamo. Po pamotu, ne atweba kechi twakonsha kukasuluka ne kwikala ba lusekelo inge ketufwiletu mukachi ne. Inge muntu wituzhingijisha, javula tuzhingila. Baibolo waamba’mba twakonsha kuzhingila. Pano bino, Baibolo witujimunako’mba kechi twafwainwa kutwajijila kuzhingila ne. (Sala. 4:4; Efi. 4:26) Mambo ka? Mambo javula kuzhingila kwitulengela kuba bintu byatama. (Yako. 1:20) Vulukai’mba bantu bonse bazhingila, pano bino, kechi kyawama kutwajijila kuzhingila ne. w25.02 15 ¶4-6

Yesu waambile’mba muntu inge ke akebe kwikala na mali bino “saka abula kwikala nonshi kwi Lesa” ke bumbulwamaana. (Luka 12:16-21) Atweba bonse kechi tuyuka juba ja kesha byo jikekala ne. (Maana 23:4, 5; Yako. 4:13-15) Kabiji Yesu waambile’mba aba bonse bakeba kwikala baana banji ba bwanga bafwainwa kwinengezha “kusankilapo” bintu bya ku mubiji byo baji nabyo. (Luka 14:33, tubyambo twa munshi.) Abino byo byaubile ne bena Kilishitu ba mu myaka kitota kitanshi bajinga mu Yudea, bepaine kusha bintu byabo byonse. (Hebe. 10:34) Mu ano moba, balongo ne banyenga bavula basankilapo bintu byabo bya ku mubiji na mambo a kukaana kwivwanga mu bya bumulwilantanda. (Lum. 13:16, 17) Ñanyi kintu kibalengela kuba bino? Baketekela mulaye wa Yehoba wa kuba’mba: “Kechi nkakusha ne, kabiji kechi nkakulekelela ne.” (Hebe. 13:5) Twinengezhezha jimo pa kuba’mba tukekalenga na mwakumwena kulutwe. Kabiji inge bintu bya kubula kuketekela bitumwekela, tuketekela mwi Yehoba kwitukwasha. w25.03 29 ¶13-14

Yehoba wayuka’mba kechi twakonsha kukoma ku mupashi kwa kubula bukwasho bwanji ne. Bakafunga ne bafunjishi mu kipwilo kya bena Kilishitu baji na mwingilo wa kwitukwasha kukoma ku mupashi ne kwikala nobe “muntu wakoma wafika ku kimino kya Kilishitu.” (Efi. 4:11-13) Kabiji Yehoba witupa mupashi wanji wazhila witukwasha kwikala na “muchima wa Kilishitu.” (1 Ko. 2:14-16) Kunungapo, Lesa witupa Mabuku ana a Mambo Awama etukwasha kuyuka Yesu byo alangulukanga, byo aambanga ne byo aubanga bintu kimye kyo aingijilenga mwingilo wanji pano pa ntanda. Inge ke mulondele byalangulukanga Yesu ne byo aubanga, mukekala bena Kilishitu bakoma ku mupashi.Pano bino, pa kuba’mba twikale bakoma ku mupashi, twafwainwa ‘kupwisha kufunda mafunjisho atanshi aamba pe Kilishitu.’ w24.04 4-5 ¶11-12

Pa juba pa juba tufuukula bintu. Bintu bimo kechi bikatazha kufuukula ne, nabiji kusala kajo ka kwiaula nangwa kimye kya kulaajilapo. Pakuba bintu bikwabo bikatazha kufuukula. Bintu byo tufuukula byakonsha kwitulengela atweba ne ba mu kisemi kyetu kwikala na lusekelo ne na butuntulu bwa mubiji bwawama nangwa kwingijila Yehoba bulongo nangwa ne. Tukeba atweba ne ba mu kisemi kyetu kumwenamo byawama mu bintu byo tufuukula. Kyakilapo kunema, twaketekela kuba’mba tukafuukulanga bintu bitokesha Lesa ku muchima. (Loma 12:1, 2) Kintu kyanema kyo mwafwainwa kuba pa kuba’mba mufuukule bulongo ke kuyuka bishinka byonse. Mambo ka kuba bino o kwanemena? Fwanyikizhai’mba muntu wakolwa ubena kubuula dokotala lukatazho lwanji. Nanchi dokotala ufikatu ponkapo wamupa muchi kwa kubula patanshi kumwipuzha byo abena kumvwa nyi? Ine. Ne anweba mukafuukulanga bintu bulongo inge mwayuka bishinka byonse pa kintu kyo mukeba kufuukula. w25.01 14 ¶1-3

Ñanyi bintu byo twayuka pa lusa lwa Yehoba? Yehoba umwesha byepi amba “kechi usaka muntu nangwa umo amba akafwe ne”? (2 Pet. 3:9) Akilangulukai pa bantu bamo balengele mambo akatampe bo amwesheshe lusa. Mfumu Davida walengele mambo a bulala avula bingi avwangilemo bukende ne kwipayañana. Pano bino, Davida walapijile kabiji Yehoba wamulekejileko mambo na mambo a lusa lwanji. (2 Sam. 12:1-12) Mfumu Manase waubile bintu bya bunya bingi mu bwikalo bwanji. Nangwa kya kuba waubile bino bintu bya bunya, Yehoba wamubijile lusa ne kumulekelako mambo na mambo a kuba’mba walapijile. (2 Moba 33:9-16) Byamwekejile bano bantu bimwesha kuba’mba Yehoba ubila bantu lusa inge paji kishinka kyamulengela kuba bino. Ukasangula bantu ba uno mutundu na mambo a kuba’mba balapijile nangwa kya kuba balengele mambo akatampe. w24.05 4 ¶12