Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

1 Kolinda 10:1-33

BIJI MU BUKU

  • Kwitujimunako ku byamwekejile bena Isalela (1-13)

  • Lujimuno pa mambo a kupopwela bankishi (14-22)

    • Tebulu wa Yehoba, tebulu wa bandemona (21)

  • Bwana bwa bene ne kulangulukilako bakwetu (23-33)

    • “Bintu byonse saka mwibyubila lukumo lwa Lesa” (31)

10  Balongo bami, mbena kukeba namba muyuke’mba bashakulu betu bajinga munshi ya jikumbi+ kabiji bonse bapichile mu kalunga ka mema+  kabiji bonse babatizhiwe mwi Mosesa kupichila mu jikumbi ne mu kalunga ka mema,  kabiji bonse bajiile kajo ka ku mupashi kantutu kamo+  kabiji bonse batomene mema a ku mupashi antutu amo.+ Mambo batomenenga ku jibwe ja ku mupashi jibalondejilenga, ne jino jibwe jaimenejilengako* Kilishitu.+  Nangwa byonkabyo, kechi bonse bamutokeshe Lesa ku muchima ne, mambo bamo bebepayijile mu kiselebwa.+  Bino bintu byaikala bya kufunjilako atweba, kuba’mba tubulenga kukeba bintu byatama byo bakebelengapo abo.+  Kange tupopwelenga bankishi, byonka byo baubile bamo mwi abo ne; byonkatu byo kyanembwa’mba: “Bantu baikele na kuja ne kutoma. Kepo baimene ne kusangalala.”+  Kechi tubenga bulalelale* byonka byo baubilenga bamo bulalelale* ne, kya kuba bantu 23,000 bafwile mu juba jimo.+  Kabiji kange tumweseke Yehoba*+ byonka byamwesekele bamo ne, bano bebepayile ku miloolo.+ 10  Kabiji kechi twikale bakunyinyita byonka bamo byo banyinyichilenga ne,+ bano bebepayile ku malaika.+ 11  Abya bintu bibamwekejilenga kwikala bya kufunjilako, kabiji bebinembele kwitujimunako atweba+ bo yafikila mpelo ya buno bwikalo. 12  Onkao mambo, awa ulanguluka’mba waimana, ajimuke kuchina’mba wakapona.+ 13  Kafwako lweseko lwimufikila lwabula kupitamo bantu bakwabo ne.+ Bino Lesa wa kishinka, kabiji kechi ukemuleka’mba mwesekwe lweseko lwakila pa bulume bwenu ne,+ bino mu lweseko lonse aye ukemumwena jishinda ja kuchinchikilamo.+ 14  Onkao mambo, anweba batemwe bami, chinai kupopwela bankishi.+ 15  Mbena kwamba kwi anweba bantu ba milangwe; ifuukwilaipo anwe bene kana byo mbena kwamba bya kine nangwa ne. 16  Nanchi katomeno ka mapesho ko tupesha, kechi kalumbulula kwabana mashi a Kilishitu nenyi?+ Nanchi shinkwa ye tutebaula, kechi ulumbulula kwabana mubiji wa Kilishitu nenyi?+ 17  Mambo kujitu shinkwa umo nangwa kya kuba twavula, twi mubiji umo,+ mambo bonse tujako uno shinkwa umo. 18  Akimonai bena Isalela ba kisemwa: Nanchi aba baja bitapisho kechi babana na kya kusokelapo bitapisho nenyi?+ 19  Nanchi mbena kwamba’mba ka? Nanchi mbena kwamba’mba kintu kyo batapishisha bankishi kyo kintu nyi, inyi nkishi kyo kintu? 20  Ine; bino naamba namba bintu bitapisha bisaka bya bantu batapishisha bandemona, kechi batapisha kwi Lesa ne;+ kabiji kechi mbena kukeba namba mushilañanenga na bandemona ne.+ 21  Kechi mwafwainwa kutoma mu katomeno ka Yehoba* ne mu katomeno ka bandemona ne; kechi mwafwainwa kuja ku “tebulu wa Yehoba”*+ ne ku tebulu wa bandemona ne. 22  Nangwa ‘nanchi tubena kumuzhingijisha Yehoba* nyi’?+ Abya twamukila mu kukosa nyi? 23  Bintu byonse bijitu bulongo mwayila mizhilo, bino kechi byonse byafwainwa kuba muntu ne. Bintu byonse bijitu bulongo mwayila mizhilo, bino kechi byonse bikomesha muntu ne.+ 24  Onkao mambo, muntu yense kechi akebengatu bintu byamuwamina aye mwine ne, poso bintu byawamina ne mukwabo.+ 25  Jainga nyama yonse yo bapotesha pa kisankanyi, kange mushikishenga na mambo a jiwi jenu ja mu muchima ne, 26  mambo “ntanda yo ya kwa Yehoba* ne bintu byonse bijimo.”+ 27  Umvwe muntu wabula kwitabila wimwita kabiji mwakeba kuya, jai byonse byo emupa, kwa kubula kushikisha nangwa kimo na mambo a jiwi jenu ja mu muchima. 28  Bino inge umo wimubuula’mba: “Akye bekitapishisha bankishi,” kwikija ne, na mambo a yewo wimubuula ne na mambo a jiwi ja mu muchima.+ 29  Kechi mbena kwamba pa jiwi jenu ja mu muchima ne, bino ja muntu mukwabo. Pano mambo ka bwana bwa bene bwami o bebuzhachishisha ku jiwi ja mu muchima ja muntu mukwabo?+ 30  Umvwe mbena kuja na kusanta, mambo ka onnenenwa bibi na mambo a kyokya kyo nsanchila Lesa?+ 31  Onkao mambo, inge mubena kuja, nangwa mubena kutoma nangwa mubena kuba kintu kya byepi nangwa kya byepi, bintu byonse saka mwibyubila lukumo lwa Lesa.+ 32  Kechi mwikale bya kwituntulako Bayudea ne Bangiliki nangwa kipwilo kya Lesa ne,+ 33  byonkatu ne amiwa byo mbena kwibikako kutokesha bantu bonse ku muchima mu bintu byonse, kechi nkebatu bintu byangwamina amiwa mwine ne,+ poso byawamina bavula kuba’mba bapuluke.+

Tubyambo twa munshi

Nangwa’mba “jajinga.”