Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Bahebelu 6:1-20

BIJI MU BUKU

  • Komainga (1-3)

  • Aba basatuka bapopa jibiji Mwana pa kichi (4-8)

  • Lumbululai lwitabilo lwenu (9-12)

  • Kufika kwa milaye ya Lesa (13-20)

    • Mulaye wa Lesa ne luchipo kechi byaluka ne (17, 18)

6  Onkao mambo, byo twapwisha kufunda mafunjisho atanshi+ aamba pe Kilishitu, twayai tukomenga,+ kechi twale kitendekesho jibiji ne, ko kuba’mba kulapila ku mingilo yafwa ne kwitabila mwi Lesa,  lufunjisho lwaamba pa lubatizhilo lwapusana pusana ne kutenteka maboko,+ lusanguko lwa bafu+ ne luzhachisho lwa myaka ne.  Atweba tukakomenangakotu, umvwe Lesa waswa.  Mambo aba batambula kala kyeya+ ne kutompako ku kya bupe kya kuya mwiulu kabiji batambula mupashi wazhila,  ne kutompa pa mambo awama a Lesa ne bintu bya bulume bikooba Lesa mu bwikalo* bukeya,  bino bapondoka,+ kechi kyakonsheka kwibakwasha kulapila jibiji ne, mambo bamupopa jibiji Mwana Lesa pa kichi ne kumulengesha bumvu pa bantu bavula.+  Mambo mushiji utambula mapesho kufuma kwi Lesa byo atwezha mema a mvula unokelapo javula ne kumenesha bijimwa bya kwingijisha boba bebijimine.  Bino umvwe wamenesha miba ne tubichi tuji na miba, ulengululwa kabiji uji pepi kufingwa, ne ku mpelo yanji bamusoka.  Anweba batemwe bami, twashiinwa’mba anweba muji na bintu byawama, bintu byawama bileta lupulukilo, nangwa kya kuba tubena kwamba bino. 10  Mambo Lesa waoloka kabiji kechi wakonsha kuvulama mingilo yenu ne butemwe bo mwamwesha jizhina janji ne,+ byo mwibengijilenga bazhijikwa ne byo mwatwajijila na kwibengijila. 11  Bino twakeba namba anweba bonse pa muntu pa muntu mutwajijile kwingila na ngovu byonkatu byo mwaingijilenga kala kuba’mba mulumbulule luketekelo lwenu+ kufika ne ku mpelo,+ 12  pa kuba’mba mubule kwikala bankope,+ bino mwikale ba kulondela boba baswana bintu byo alayile Lesa na mambo a lwitabilo ne na butekanye bwabo. 13  Lesa byo alayile Abalahama, kechi kwajingapo muntu mukwabo wamukila wa kuchipilamo ne, wichipijile mwine,+ 14  amba: “Kine nkakupesha kabiji kine nkakuvuzha.”+ 15  Onkao mambo, Abalahama byo apembelejile mu butekanye, watambwile uno mulaye. 16  Mambo bantu bachipa kupichila mu muntu wibakila ne luchipo lwabo lupwisha mapata onse, mambo luchipo lumwesha’mba byo baamba bya kine.+ 17  Kyo kimotu, Lesa byo afuukwilepo kumwesha patoka banswanyi ba mulaye+ byo abula kwaluka mu kintu kyo afuukula, wachipile kumwesha’mba waamba kine, 18  pa kuba’mba mu bintu bibiji bibula kwaluka Lesa mo abula kubepa,+ atweba twanyemena mwa kufyama twikale na lutundaiko lwakosa kuba’mba tukwachishe ku lolwa luketekelo lo betupa. 19  Tuji na luno luketekelo+ luji nobe kimiko kya mweo* wetu, lwa kine kabiji lwakosa, kabiji lutwela mu kipembe,+ 20  mo etutwelelako awa watangilako kala, aye Yesu+ waikala ñanga mwine mukatampe myaka ne myaka byonka byajinga Melekizedeke.+

Tubyambo twa munshi

Nangwa’mba “kisemi kya kulutwe.” Monai Mutanchi, “Bwikalo.”
Nangwa’mba “kya bwikalo bwetu.”