Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Ezikyo 7:1-27

BIJI MU BUKU

  • Mpelo yafika (1-27)

    • Bya malwa byapusanako (5)

    • Mali beataya mu mikwakwa (19)

    • Nzubo ya Lesa bakeizhilulula (22)

7  Yehoba wañambijile jikwabo amba:  “Obewa mwana muntu, buula bena Isalela byaamba Nkambo Mfumu Yehoba amba: ‘Mpelo yafika! Nkonauna kyalo kyonse.  Mpelo imufikila kabiji nemuzhingijila bingi ne kwimuchibila mambo monka mwayila byubilo byenu byatama, kabiji nkemutotolwesha ne pa byubilo byenu byonse bya bunya.  Amiwa kechi nkemubila lusa; nangwa kifyele ne,+ mambo nkemukambula pa byubilo byenu byatama, kabiji mukamona malwa a kabotoka na mambo a byubilo byenu bya bunya.+ Kabiji mukayuka’mba amiwa yami Yehoba.’+  “Nkambo Mfumu Yehoba waamba’mba: ‘Umvwai! Bya malwa bikatampe bibena kwiya.+  Mpelo ibena kwiya; mpelo ikeya; ikemufikila kya kubazhimukilatu. Kine, ibena kwiya.  Bya malwa bimufikila anweba mwikala mu kyalo. Kimye kibena kwiya kabiji juba najo jafwenya kala pepi.+ Pa mitumba paji kiwowo, kechi kyungwe kya lusekelo ne.  “‘Katatakatu nkalete bukaji bwami pe anweba+ ne kwimuzhingijila bingi,+ kabiji nkemuchibila mambo monka mwayila byubilo byenu byatama ne kwimutotolwesha pa byubilo byenu byonse bya bunya.  Amiwa kechi nkemubila lusa; nangwa kifyele ne.+ Nkemukambula na mambo a byubilo byenu byatama, kabiji mukamona malwa a kabotoka na mambo a byubilo byenu bya bunya. Kabiji mukayuka’mba amiwa Yehoba yami mbena kwimukambula.+ 10  “‘Kwaletwa! Monai, juba jibena kwiya!+ Bya malwa bimufikila; nanengezha kala kamama ka kwimukambwilako, mambo kwitota kwa bantu babi kwakilamo. 11  Bumbanzhi bwaikala ke kamama ka bubi.+ Bya bunonshi, abo bene, mabumba abo nangwa kutumbalala kwabo kechi bikebapulusha ne. 12  Kimye kikafika kabiji juba najo jikafika. Awa upota kechi asangalale ne, kabiji awa upotesha naye kechi ajile ne, mambo bukaji bwami bukebafikila bantu bonse.*+ 13  Mambo awa upotesha kechi ukabwela na kutambula byo apoteshe nangwa kya kuba wapuluka ne, mambo abya biji mu kimwesho bikafikila bantu bonse. Na mambo a bubi* bwabo, kafwako nangwa umo ukabwela nangwa ukapuluka ne. 14  “‘Bajizha ntolompita+ kabiji bonse benengezha, pano bino, kafwako ubena kuya na kulwa ne, mambo bukaji bwami bwibafikila bantu bonse.+ 15  Mpoko iji pangye+ kabiji mwalo ne kipowe kya nzala biji mukachi. Awa uji mu bujimi ukafwa ku mpoko ne yewa uji mu muzhi ukafwa ku kipowe kya nzala ne ku mwalo.+ 16  Aba bakapuluka, bakanyemena ku mitumba kabiji bonse bakajila na mambo a bubi bwabo byonkatu bimba tututwa twikala mu bimpachiko.+ 17  Maboko abo akakookatu zubulu kabiji manungo abo akazukumangatu nobe muji mema.*+ 18  Bakavwala bisapi bya majila+ kabiji bakazakamanga na moyo. Bonse bakomvwa bumvu ne kusebeka mabala.*+ 19  “‘Bakataya siliva mu mikwakwa kabiji ngolode yabo ikekala nobe kintu kya bunya kwi abo. Siliva nangwa ngolode yabo kechi bikebapulusha mu juba ja bukaji bwa Yehoba ne.+ Abo* kechi bakatondwa nangwa kwikuta ne, mambo bino bintu* bikebalengela kwituntula ne kulenga mambo. 20  Betotejilenga mu bintu byabo bya buya, kabiji baingijishenga bino bintu* kulengelako bintu byabo bya bunya ne bankishi babo ba bunya.+ O ene mambo o nkebyalwila kwikala ke bya bunya kwi abo. 21  Nkebipana* mu maboko a bantu bafuma ku byalo bingi kuba’mba bakebisende ne ku babi ba pano pa ntanda kuba’mba bakebipukule, kabiji bakebyalula kwikala ke byatutu. 22  “‘Nkebakana+ kabiji bakazhilulula mpunzha yami yafyamika* ne bambanzhi bakatwela monka ne kwiizhilulula.+ 23  “‘Ulenge munyololo,*+ mambo kyalo kyazhatwa na mambo a kwichila mashi+ kabiji mu muzhi mwayula bumbanzhi.+ 24  Nkaleta bisaka bya bantu byakilamo kutama+ kabiji bikangata mazubo abo.+ Nkapwisha bwitote bwa bilobo kabiji mazubo abo azhila bakeazhilulula.+ 25  Bya malwa byo bikebafikila, po po bakakeba mutende, bino kechi bakamutaana ne.+ 26  Bya malwa bikemufikilanga kabiji mukebyumvwanga pa kimye pa kimye ne bantu bakakeba kimwesho kufuma kwi ngauzhi,+ pano bino, mizhilo* ya bañanga ne bikambanga* bakulumpe kechi bikakwasha bantu ne.+ 27  Mfumu ukajilanga ne babitumbafumu bakomvwa moyo,+ kabiji bantu ba mu kyalo bakazakamanga na mambo a moyo. Nkebobila monka mwayila byubilo byabo ne kwibachibila mambo monka mo bachibijilenga bantu mambo. Kabiji bakayuka’mba amiwa yami Yehoba.’”+

Tubyambo twa munshi

Ko kuba’mba, aba bapota ne boba bapotesha kechi bakamwenamo ne, mambo lonaiko lukeshila bonse.
Nangwa, “Kupichila mu bubi bwabo.”
Ko kuba’mba, kwisukwila na mambo a moyo.
Ko kuba’mba, nsuki yabo bakeitenda pa kujila.
Nangwa’mba “Myeo yabo.”
Ko kuba’mba, siliva ne ngolode yabo.
Ko kuba’mba, bintu byabo bya ngolode ne siliva.
Ko kuba’mba, siliva wabo ne ngolode yabo yo baingijishanga kulengelako bankishi.
Kyamweka babena kwamba pa mwine mukachi ka nzubo yazhila ya Yehoba.
Ko kuba’mba, minyonyololo ya buzha.
Nangwa’mba “mikambizho.”
Nangwa’mba “bikafundañanako.”