Yai panembwa’mba bijipo

Yai paji ndonda ya mitwe

Bakamonyi ba kwa Yehoba

Salai mulaka Kikaonde

Byubilo 20:1-38

BIJI MU BUKU

  • Paulo waya ku Makedonya ne ku Gilisi (1-6)

  • Yutikusa bamusangula mu Toloasa (7-12)

  • Kufuma ku Toloasa kuya ku Miletusa (13-16)

  • Paulo wasambakana na bakulumpe mu kipwilo ba mu Efisesa (17-38)

    • Kufunjisha ku nzubo ku nzubo (20)

    • “Mu kupana mufuma lusekelo lukatampe” (35)

20  Kiwowo byo kyapwile, Paulo waichile baana ba bwanga, kabiji byo ebatundaikile ne kwibashajikapo, wayile ku Makedonya.  Byo apichile mu oa mapunzha ne kutundaika bajingamo na byambo byavula, waishile mu kyalo kya Gilisi.  Waikeleko bañondo basatu, bino na mambo a Bayudea bamumvwañenejile+ byo ajinga pepi kuya ku Silya, wafuukwilepo kubwela kupichila ku Makedonya.  Wajinga pamo na Sopetela mwana wa mulume wa kwa Pilusa wa ku Beliya, Alisatakusa+ ne Sekundusa mwina Tesalonika, Ngayusa wa ku Delebe, Timoti+ ne Tikikusa+ ne Tolofimusa+ bafumine mu kibunji kya Asha.  Bano banabalume batangijilepo kabiji betupembejilenga mu Toloasa;  bino moba a Bashinkwa Babula Mbizho+ byo apwile, twafumine ku Filipai na bwato ne kufika ko bajinga mu Toloasa pa moba atanu, kabiji twaikeleko moba atanu na abiji.  Pa juba jitanshi ja mulungu, byo twakonkenejile pamo na kuja, Paulo watatwile kwibambila, mambo wayukile’mba kesha ukaya; kabiji waambilengatu kufika ne pakachi ka bufuku.  Kabiji mu kibamba kya peulu mo twakonkenejile mwajingatu malampi acheche.  Nsongwalume umo aye Yutikusa waikele pa kipenze kimye Paulo kyo aambilenga, kabiji byo aponejile mu tulo, waponene panshi kufuma pa kibamba kya busatu kya peulu kabiji bamushikwile saka afwa. 10  Bino Paulo wakunkulukile panshi, ne kuponena pe aye ne kumukumbata+ ne kwamba’mba: “Kilekai kuwowakana, mambo ukiji mumi.”*+ 11  Kepo Paulo abwelele jibiji mu kibamba kya peulu ne kutatula* kuja. Watwajijile kwamba pa kimye kyabaya kufikatu ne ku makya, ne kufuma wafumineko. 12  Kabiji bamusendele nsongwalume saka aji mumi ne abo batemenwe bingi. 13  Kabiji twakanjijile mu bwato ne kuya ku Asosa, kuba’mba tukasende Paulo byonka byo etubuujile, mambo aye mwine wakebele kwenda panshi. 14  Byo twamusambakene ku Asosa, twamusendele mu bwato ne kuya ku Mitilene. 15  Kabiji byo twafumineko na bwato pa juba jalondejilepo, twafikile pa Kiosa, bino juba jalondejilepo twafikile ku Samosa, kabiji juba jikwabo jalondejilepo twafikile ku Miletusa. 16  Paulo wafuukwilepo kupitayila Efisesa+ na bwato, pa kuba’mba abule kutaya kimye mu kibunji kya Asha, mambo wakebelenga kufika bukiji mu Yelusalema+ pa juba ja Kijiilo kya Pentekosita umvwe kyakonsheka. 17  Nangwa byonkabyo, byo ajinga mu Miletusa watumineko mawi ku Efisesa ne kwita bakulumpe mu kipwilo. 18  Byo baishile kwi aye, wibambijile’mba: “Mwayukishatu bulongo byo naikelenga nenu kufumatu juba jitanshi jo naishile mu kibunji kya Asha,+ 19  saka ñingijila Nkambo na muchima wa kwipelula,+ na mipolo ne na meseko amfikijile na mambo a kumpingila ku Bayudea, 20  kabiji kechi nalekele kwimubuula bintu byanema* nangwa kuleka kwimufunjisha patoka+ ne ku nzubo ku nzubo ne.+ 21  Bino nebashimwijile bulongo Bayudea ne Bangiliki kuba’mba bafwainwa kulapila+ ne kwalulukila kwi Lesa ne kwitabila mwi Nkambo yetu Yesu.+ 22  Pano, yukai kino amba mupashi wandengela kuya ku Yelusalema, nangwa kya kuba kechi nayuka bintu bikammwekela kokwa ne, 23  bino kyo nayukakotu ke kya kuba’mba mu mizhi yonse mo nkapita mupashi wazhila ubena kumbuula’mba tuleya ne bya malwa bibena kumpembelela.+ 24  Nangwa byonkabyo, kechi natesha muchima ku bumi* bwami nobe kyo kintu kyanema ne, bino kyo mbena kukebesha ke kupwisha kikonkwanyi kyami+ ne mwingilo ye natambwile kwi Nkambo Yesu wa kushimuna bulongo mambo awama a lusa lukatampe lwa Lesa. 25  “Kabiji nayuka namba kafwako nangwa umo mwi anweba ye nasapwijile mambo a Bufumu ukamonapo kilungi kyami jibiji ne. 26  Onkao mambo, nemwita kuba’mba muyuke’mba amiwa nabinga ku mashi a bantu bonse,+ 27  mambo kechi nalekele kwimubuula kyaswa muchima wa Lesa ku bantu ne.+ 28  Saka mwita muchima anwe bene+ ne jitanga jonse, mupashi wazhila jo emutongwejilepo bukalama+ kuba’mba mufungenga kipwilo kya Lesa+ kyo apotele na mashi a Mwananji.+ 29  Nayuka namba byo nkafumako, misuka ikaji ikatwela mwi anweba+ kabiji kechi ikalama jitanga na kifyele ne, 30  kabiji mwi anweba mukafuma bantu bakafunjishanga mafunjisho aluwankana kukeba kongola baana ba bwanga amba bebalondelenga.+ 31  “Onkao mambo, labainga ne kunkenkenta, kabiji vulukai’mba pa myaka isatu,+ bufuku ne mute, kechi nalekele kwimutundaika na mipolo anweba pa muntu pa muntu ne. 32  Pano Lesa ne byambo bya lusa lwanji lukatampe bimuzhikijile, byo byambo byakonsha kwimukosesha ne kwimupa buswanyi mu bonse bazhijikwa.+ 33  Kechi nakebelepo siliva, ngolode nangwa bivwalo bya muntu ne.+ 34  Anweba mwayukishatu bulongo kuba’mba naingijilenga na maboko ami pa kuba’mba ngikale na bintu byo nakebelenga+ ne kukwasha bo najinga nabo. 35  Mu bintu byonse nemumwesheshe kuba’mba kupichila mu kwingila kyakosa byonka bino,+ mwafwainwa kukwasha boba babula kukosa kabiji mwafwainwa kuvulukanga byambo bya Nkambo Yesu byo aambile’mba: ‘Mu kupana mufuma lusekelo lukatampe+ kukila mu kutambula.’” 36  Byo apwishishe kwamba bino bintu, wafukamine na bonse ne kulomba. 37  Bonse bajijile ne kumukumbachilamo Paulo* ne kumufyompa, 38  mambo baubile bingi bulanda na mambo a byambo byo aambile bya kuba’mba kechi bakamonapo kilungi kyanji jibiji ne.+ Kepo bamushinjikinyeko pa kuya kwajinga bwato.

Tubyambo twa munshi

Nangwa’mba “mambo mweo wanji ukiji mwi aye.”
Mu Kingiliki, “kutebaula shinkwa.”
Nangwa’mba “bya kwimukwasha.”
Nangwa’mba “mweo.”
Mu Kingiliki, “kuponena pa nshingo ya kwa Paulo.”