Numeri 23:1-30
23 Ndele Bileam okwa tya kuBalak: “Tungila ponhele apa eealtari heyali,+ ndele to longekidile nge eemhedi heyali needi heyali deendume.”
2 Balak okwa ninga diva ngaashi ashike Bileam e mu lombwela. Balak naBileam ova yambela koaltari keshe omhedi nodi yondume.+
3 Bileam okwa tya kuBalak: “Kala pexwikiloyambo loye opo, ame ohandi i. Pamwe Jehova ota ka popya naame. Keshe osho ta ka hololela nge, ohandi ke shi ku lombwela.” Opo nee okwa ya koxulo yoshikulundudu.
4 Opo nee Kalunga okwa popya naBileam,+ oo a ti kuKalunga: “Onda tunga eealtari heyali di li momikweyo, nokoaltari keshe onda yambela ko omhedi nodi yondume.”
5 Jehova okwa tula ondjovo ei mokanya kaBileam:+ “Shuna kuBalak, naashi osho u na okupopya.”
6 Onghee okwa shuna nokwa mona Balak nosho yo omalenga aeshe aMoab a fikama pexwikiloyambo laye.
7 Opo nee okwa popya omupopyo ou wopaitevo a ti:+
“Balak, ohamba yaMoab, okwa kufa nge muAram,+Okudja keemhunda dokoushilo:
‘Ila u fingile nge Jakob.
Ila u handukile Israel.’+
8 Ohandi dulu ngahelipi okufinga ovo Kalunga ina finga?
Ongahelipi handi dulu okuhandukila ovo Jehova ina handukila?+
9 Ondi va wetele okudja koxulo yomamanya,Nondi va wetele okudja koikulundudu.
Ovanhu ovo oko hava kala oko ovo aveke;+Inave livalulila mokati koiwana.+
10 Olyelye ta dulu okuvalula ondwi yedu yaJakob+Nolyelye ta dulu okuvalula nokuli oshitukulwa shoshitine shaIsrael?
Nandi* fye efyo lovayuki,Nexulilo lange nali kale ngaashi lavo.”
11 Balak okwa tya kuBileam: “Owa ninga nge ngahelipi ngaha? Onde ku eta u finge ovatondi vange, ndele ku na eshi wa ninga po apa, owe va nangeka ashike noupuna.”+
12 Okwa nyamukula a ti: “Hano kandi na okupopya keshe osho Jehova a tula mokanya kange?”+
13 Balak okwa tya kuye: “Alikana, ila tu ye konhele imwe oko to dulu oku va mona. Oto ka mona ashike vamwe vomuvo; ito ke va mona aveshe. Va fingile nge fimbo u li oko.”+
14 Onghee okwe mu twala mofuka yaSofim, koxulo yaPisga,+ ndele ta tungu eealtari heyali nova yambela koaltari keshe ongobe yomhedi nodi yondume.+
15 Bileam okwa tya kuBalak: “Kala pexwikiloyambo loye apa, ofimbo handi ka popya naKalunga kwinya.”
16 Jehova okwa popya naBileam, ndele ta tula mokanya kaye ondjovo ei:+ “Shuna kuBalak, naashi osho u na okupopya.”
17 Opo nee okwe uya kuye nokwa mona kutya okwa li a teelela e li pexwikiloyambo laye, nomalenga omuMoab okwa li pamwe naye. Balak okwe mu pula a ti: “Jehova okwa ti ngahelipi?”
18 Opo nee okwa popya omupopyo ou wopaitevo a ti:+
“Fikama Balak, ndele to pwilikine.
Akutu omonamati waSippor, ude nge.
19 Kalunga ke fi omunhu wongaho oo ha popi oipupulu,+Noke fi omona womunhu oo ha lundulula omadiladilo aye.*+
Mbela ngeenge okwa ti sha, ota kala ine shi ninga?
Mbela ngeenge okwa popi sha, ota kala ine shi wanifa?+
20 Tala! Onde uya okunangeka noupuna;Ndele Kalunga okwa nangeka noupuna,+ noitandi dulu oku shi ningulula.+
21 Ita efa nande Jakob a longifilwe eenghono doumhulile,Noita ka efa Israel a hangike koupyakadi nande oumwe.
Jehova, Kalunga kaye, oku li pamwe navo,+Ota tangwa pombada mokati kavo e li Ohamba.
22 Kalunga oye e va kufa mo muEgipiti.+
Ohe va kwafele neenghono daye odo di li ngaashi eembinga domhedi yomoixwa.+
23 Kape na oo ha talele momukonda ta ka ninga sha Jakob,+Nokape na omunyanekeli ta ka kondjifa Israel.+
Pefimbo eli ovanhu otava dulu okupopya kombinga yaJakob naIsrael tava ti:
‘Tala osho Kalunga a ninga!’
24 Ovanhu ava otava ka fikama ngaashi onghoshi,Ngaashi onghoshi, navo otava ka fikama po kuvo vene.+
Ngaashi onghoshi oyo ihai nangala ofimbo inai lya oshinamwenyo osho ya kwataNofimbo inai nwa ohonde yoshinamwenyo osho ya dipaa.”
25 Balak okwa tya kuBileam: “Ngeenge ito dulu oku mu finga nandenande, kala ino mu nangeka noupuna.”
26 Bileam okwa nyamukula Balak a ti: “Inandi ku lombwela kutya: ‘Ohandi ka ninga ashishe osho Jehova a popya’?”+
27 Balak okwa tya kuBileam: “Alikana, ila ndi ku twale konhele vali imwe. Otashi dulika tashi ka kala sha wapala momesho aKalunga kashili u mu fingile nge konhele oyo.”+
28 Onghee Balak okwa twala Bileam koxulo yaPeor osho sha taalelafana naJeshimon.*+
29 Bileam okwa tya kuBalak: “Tungila ponhele apa eealtari heyali, ndele to longekidile nge eemhedi heyali needi heyali deendume.”+
30 Onghee Balak okwa ninga naanaa ngaashi Bileam e mu lombwela, nokoaltari keshe okwa yambela ko omhedi nosho yo odi yondume.
