Numeri 14:1-45
14 Ovaisrael aveshe ova hovela okukuwaana, novanhu ova twikila okulila pombada oufiku aushe.+
2 Ovaisrael aveshe ova hovela okungongotela Moses naAron.+ Ongudu aishe yOvaisrael oye va ula nai tai ti: “Ngeno otwa file ashike medu laEgipiti, ile ngeno otu file ashike mombuwa omu!
3 Omolwashike Jehova e tu etela kedu oku tu fye keongamukonda?+ Ovakulukadi vetu nounona vetu otava ka kwatwa ko.+ Oshi li xwepo tu shune kuEgipiti.”+
4 Ova li nokuli tava lombwelafana tava ti: “Natu hoololeni omuwiliki, ndele hatu shuna kuEgipiti.”+
5 Opo nee Moses naAron ova fidimika oipala yavo pedu moipafi yeongalo alishe lOvaisrael, olo la li la ongala.
6 Josua,+ omonamati waNun, naKaleb,+ omonamati waJefunne, ovo va li mokati kaavo va li va ka ndaada edu olo, ova pombaula oikutu yavo,
7 nova lombwela Ovaisrael aveshe, tava ti: “Edu olo twa li twa ka ndaada, edu liwa neenghono adishe.+
8 Ngeenge Jehova okwe tu hokwa, ote ke tu twala filufilu medu olo, note ke li tu pa, edu tali kunguluka omashini nomaadi eenyiki.+
9 Ndele inamu tukululila Jehova oshibofa, noinamu tila ovanhu vomedu olo,+ molwaashi ohatu ke va finda.* Eameno lavo ove li kufwa, na Jehova oku li pamwe nafye.+ Inamu va tila.”
10 Onghee Ovaisrael aveshe ova li tava ti kutya otave va denge nomamanya.+ Ndele oshinge shaJehova osha holoka kombada yetwali lokwoongalela, olo hali ongalele Ovaisrael aveshe.+
11 Opo nee Jehova okwa tya kuMoses: “Ofiyo onaini ovanhu ava tava kala inava fimaneka nge,+ nofiyo onaini tava kala vehe na eitavelo mwaame, nonande onda ninga omadidiliko mahapu mokati kavo?+
12 Ohandi ke va handukila noudu wolutapo, ndele handi va taataa mo, nohandi ke ku ninga oshiwana shinene noshinaenghono shi va dule.”+
13 Ashike Moses okwa tya kuJehova: “Ovaegipiti, omo wa kufa ovanhu ava keenghono doye, otave ke shi uda,+
14 ndele tave ke shi lombwela ovakalimo vomedu eli. Ovanhu ovo ova uda yo kutya ove, Jehova, ou li mokati kovanhu ava+ nowe ve lihololela oshipala noshipala.+ Oove Jehova, noshilemo shoye osha fikama kombada yavo, noho va kwatele komesho noluudi loshilemo omutenya, noufiku onoluudi lomundilo.+
15 Ngeenge owa dipaa ovanhu aveshe ovo poshikando shimwe,* oiwana oyo ya uda efimano loye otai ka tya:
16 ‘Jehova ka li ta dulu okutwala ovanhu medu olo e va anena kutya ote li va pe, onghee okwe va dipaela mombuwa.’+
17 Alikana, Jehova, ulika ounene weenghono doye paife, ngaashi wa udaneka, eshi wa ti:
18 ‘Jehova iha handuka diva, oku na filufilu ohole i na oudiinini*+ noha dimi po omanyono nomatauluko, ashike ita kala ina handukila nandenande ovo va nyona, ta handukile ovana, epupi etitatu nepupi etine omolwomanyono ooxe.’+
19 Alikana, dima po enyono lovanhu ava omolwohole yoye inene i na oudiinini, ngaashi ashike wa kala noku va dimina po okudja kuEgipiti fiyo opaife.”+
20 Opo nee Jehova okwa tya: “Onde va dimina po metwokumwe neendjovo doye.+
21 Ndele mepingafano naasho, oshili, ofimbo ndi na omwenyo, edu alishe otali ka yadifwa oshinge shaJehova.+
22 Ashike kape na nande omunhu umwe, oo a mona oshinge shange nomadidiliko ange,+ oo nda ninga muEgipiti nomombuwa, ndele ta twikile okuyeleka nge+ lwoikando omulongo, noita pwilikine kondaka yange,+
23 ta ka ya medu olo nda ana kutya ohandi li yandje kooxe. Kape na nandenande oumwe oo ina fimaneka nge te ke li mona.+
24 Ndele molwaashi omupiya wange Kaleb+ okwa li e na omhepo imwe i lili, nokwa kala ha dulika kwaame nomutima aushe, ohandi ke mu twala kedu oko a ile, notali ka ninga emona loludalo laye.+
25 Molwaashi Ovaamalek nOvakaanan+ ohava di mefilu, omu na okushuna mongula, ndele tamu i kombuwa, tamu endele nondjila inya yokEfuta Litilyana.”+
26 Opo nee Jehova okwa tya kuMoses naAron:
27 “Ofiyo onaini Ovaisrael ava ovakolokoshi tava twikile okungongotela nge?+ Onda uda eshi Ovaisrael tava ngongotele nge.+
28 Va lombwela kutya, ‘Jehova okwa ti: “Oshili, ofimbo ndi na omwenyo, ohandi ke mu ningila naanaa ngaashi nda uda mwa popya.+
29 Omidimba deni otadi ka wila mombuwa omu,+ amushe ovo mu na eedula okudja po 20 okuyuka pombada, ovo mwa shangwa, amushe ovo mwa li tamu ngongotele nge.+
30 Kape na nande oumwe womunye ta ka ya medu olo nda ana* mu ka kale mo,+ kakele kuKaleb, omonamati waJefunne, naJosua, omonamati waNun.+
31 “‘“Ohandi ka twala mo yo ovana veni, ovo mwa ti kutya otava ka kwatwa ko,+ notava ka shiiva edu olo mwa anya.+
32 Ndele nye omidimba deni otadi ka wila mombuwa omu.
33 Ovanamati veni otava ka ninga ovafita voimuna mombuwa oule weedula 40,+ notava ka handukilwa omolwoilonga yeni yokuhenoudiinini,* fiyo osheshi omidimba deni adishe da wila mombuwa.+
34 Metwokumwe nomuvalu womafiku oo mwa ka ndaadele edu olo, omafiku 40,+ otamu ka handukilwa omolwomanyono eni omido 40,+ efiku omudo umwe, efiku omudo umwe, notamu ka shiiva kutya osha hala okutya shike okukala omhinge naame.*
35 “‘“Aame Jehova nde shi popya. Eshi osho handi ka ningila ongudu aishe ei yOvaisrael ovakolokoshi ovo va ongala, opo va tukululile nge oshibofa: Ohandi ke va xulifa po mombuwa omu, nomo tava ka fila.+
36 Ovalumenhu ovo Moses a li a tuma va ka ndaade edu olo nova ningifa ovanhu aveshe ve mu ngongotele, eshi va aluka nehokololo lii li na sha nedu olo,+
37 heeno, ovalumenhu ovo va etelela ehokololo lii li na sha nedu olo otava ka dipawa nokufila koshipala shaJehova.+
38 Ndele Josua, omonamati waNun, naKaleb, omonamati waJefunne, ovo va li mokati kovalumenhu ovo va li va ka ndaada edu olo, otava kala nomwenyo.”’”+
39 Eshi Moses a lombwela Ovaisrael aveshe eendjovo odo, ovanhu ova li va nyika oluhodi neenghono.
40 Onghee ova penduka ongula inene, ndele tava kendabala okuya koxulo yomhunda tava ti: “Paife otwe lilongekida okuya konhele oyo Jehova a popya, osheshi otwa nyona.”+
41 Ashike Moses okwa ti: “Omolwashike tamu tauluka elombwelo laJehova? Itamu ka pondola.
42 Inamu ya po pombada, osheshi Jehova ke li pamwe nanye; otamu ka findwa kovatondi veni.+
43 Osheshi Ovaamalek nOvakaanan otave ke mu lwifa,+ notamu ka fya keongamukonda. Molwaashi omwa efa po okudulika kuJehova, Jehova ita ka kala pamwe nanye.”+
44 Onghee ova kukutika omitwe davo, ndele tava i koxulo yomhunda,+ ashike oshikefa shehangano laJehova inashi dja po pokati konhanda, na Moses ina dja po.+
45 Opo nee Ovaamalek nOvakaanan, ovo va li hava di komhunda oyo, ove uya nove va finda, ndele tave va te fiyo okuHorma.+
