Delphine oo a tumbulwa moshitukulwa sha dja ko, okwa popya kutya okukala noisho ihapu osha li she mu ningifa a kale a hala okunwa sha pitilila. Ombiibeli inai indika okunwa oikunwa yoalkoholi pandjele, ashike oya ti: “Ino kala mokati kaava hava finyuna omaviinyu.” (Omayeletumbulo 23:20) Otaku tiwa kutya okunwa sha pitilila ohaku etifa omaupyakadi a kwata moiti e na sha noukolele, ohaku nyono po omakwatafano, novanhu omamiliyona ohava fi efyo lomhiva odula keshe. Omaupyakadi mahapu a tya ngaho okwa li taa dulu okuhenukwa ngeno ovanhu ova dulikile komayele mawa Ombiibeli.

Delphine naye okwa dulika komayele Ombiibeli. Okwa ti: “Onda mona kutya okunwa omalodu hasho tashi kufa po oisho yange. Onda tula moilonga omayele oo e li mOvafilippi 4:6, 7, taa ti: “Kaleni muhe na nande oshisho shasha, ndelenee oufyoona weni u shiivifileni Kalunga.” Konguloshi keshe ngeenge handi diladila oinima ihapu ile ndi na oisho, ohandi ilikana kuJehova. Ohandi mu lombwele omaliudo ange aeshe, mwa kwatelwa ehandu, enyeme nosho yo epolimano, nohandi mu pula a kwafele nge ndi kale ndi na etaleko liwa. Ongula, ohandi shilipaleke kutya ondi na omadiladilo mawa. Okwiilikana alushe osha kwafela nge ndi yandje elitulemo kwaasho ndi na ponhele yaasho ndihe na. Onda tokola ndiha nwe vali omalodu. Molwaashi onda mona ombili yashili, inandi hala nande oku i nyona po.”

Omaupyakadi mahapu noluhodi ohali etifwa koluhaelo. Ashike omafinamhango Ombiibeli otaa dulu oku tu kwafela tu henuke omaupyakadi oo mokukala tu shii oinima imwe oyo hai a etifa, pashihopaenenwa, okulihumbata monghedi oyo tai kokele momilele ile okutala omafano oipala. Omulumenhu omunyasha wedina Samuel okwa ti: “Osha li shipu neenghono okulihumbata monghedi oyo tai kokele momilele. Efimbo limwe kanda li handi kala nda hokwa omunhu wonhumba, ashike onda li handi kala ndi wete kutya oku hole nge, naasho osha li hashi ningifa nge ndi lihumbate monghedi tai kokele momilele.” Samuel okwe ke shi mona mo kutya luhapu ovanhu ohava ti ohe lihumbata monghedi tai kokele momilele, nonande ka li a lalakanena okuninga ngaho, nohauxuuninwa okwa ka tokola okukala te lihumbata owina monghedi tai kokele momilele. Ashike osho osha li tashi mu nyenyetele. Okwa ti: “Osha li sha nyika oshiponga, molwaashi osha li sha ningifa nge ndi kale ndi na oikala yokulihola mwene.”

Samuel okwa lesha oshitukulwa shovanyasha shi li ko-jw.org. Opo nee okwa dilonga komushangwa wOmayeletumbulo 20:11 oo tau ti: “Nokamati take liholola nokuli pakukala kwako, oilonga yako ngeenge ya yela noya yuka.” Mbela osho oshe mu kwafela ngahelipi? Samuel okwa ka mona kutya okulihumbata monghedi tai kokele momilele inaku koshoka noina ku yuka. Paife okwa ti: “Onde lihonga yo kutya omunyasha oo he lihumbata monghedi tai kokele momilele ota kulike omaukwatya mai oo tae mu ningi a ka kale kaume kopahombo mwii. Onda hovela okudiladila kutya omukulukadi wange womonakwiiwa ota ka kala e udite ngahelipi ngeenge okwa mono nge handi lihumbata monghedi tai kokele momilele nomukainhu umwe. Osho osha ningifa nge ndi mone kutya elihumbato olo ola nyika oshiponga. Nonande oshipu oku shi ninga, inashi hala okutya osha koshoka.” Samuel okwa lundulula onghalamwenyo yaye. Okuhenuka okulihumbata monghedi tai kokele momilele oshe mu kwafela yo a henuke oluhaelo.

Antonio okwa li ta dulu okuya moluhaelo noupu molwaashi okwa li a pikwa kokutala omafano oipala. Nonande okwa li a hombola omukainhu oo e hole shili, okwa li a wila momwiyo wokutala omafano oipala lwoikando. Okwa ti kutya okwa kwafelwa kokudilonga ku 1 Petrus 5:8, oo ta ti: “Kaleni mu nelidiliko nomwa pashuka, omutondi weni, Satana, ohe mu dingilile ngaashi onghoshi hai kumbu, nota kongo ou te mu xwake po.” Antonio okwa ti: “Omafano oipala oku li keshe pamwe mounyuni ou, nohaa dulu okukanyatela momadiladilo omunhu. Ovelishe oyo oya kwafela nge neenghono ndi diladile kutya oshike sha li tashi etifa omayeleko oo. Onda li ndi na okulihonga okudiladila alushe kutya omafano oipala okwa dja kOndiaboli. Paife onda mona kutya Jehova oye aeke ta dulu okukwafela nge ndi kale ndi na ‘elidiliko nonda pashuka’ opo ndi dule okukufa mo oinima ya tya ngaho momadiladilo ange, momutima nosho yo mohombo yange.” Antonio okwa mona ekwafo olo a li a pumbwa, nokwa efa po onghedindjikilile ii. Osho oshe mu kwafela a henuke omaupyakadi a kwata moiti.

Ombiibeli oya yandja omayele mawa oo taa dulu oku tu kwafela tu henuke omaupyakadi a kwata moiti. Ndele mbela ongahelipi kombinga yomaupyakadi oo tu na nale notaa twikile? Natu ka taleni kunghee Eendjovo daKalunga tadi dulu oku tu kwafela tu kandule po omaupyakadi oo?