Inda koshikalimo

Inda koshikalimo

3 Okulididimikila omaupyakadi

3 Okulididimikila omaupyakadi

Kunena ope na omaupyakadi oo itatu dulu okuhenuka ile okukandula po. Pashihopaenenwa, ngeenge wa filwa omuholike woye ile u na omukifi woshinamenena, otashi dulika ku na ehoololo limwe vali ndele ou na ashike okukonga eenghedi omo to dulu okulididimikila ouyahame oo. Mbela Ombiibeli otai dulu ngoo oku tu kwafela meenghalo dii da tya ngaho?

OMUKIFI WOSHINAMENENA

Rose okwa ti: “Ondi na omukifi womeegene oo hau etele nge ouyahame munene notau twikile. Onghalamwenyo yange kai na ongushu.” Shimwe osho a li he lipula nasho unene omafimbo amwe oshosho kutya kali ha dulu okuyandja elitulemo kekonakonombiibeli laye nokoinima yopamhepo. Ashike okwa li a kwafelwa neenghono keendjovo daJesus odo di li muMateus 19:26, tadi ti: “Kalunga iha nyengwa kusha.” Rose okwa li a mona kutya ope na eenghedi dihapu omo ta dulu okukonakona. Molwaashi ouyahame waye owa li hau mu imbi a leshe, okwa li a hovela okukala ta pwilikine koishangomwa yopaMbiibeli nokOmbiibeli oyo ya kwatwa momawi. * Okwa ti: “Nopehe na oinima oyo, kandi shii kutya ngeno onda dula ngahelipi okukaleka po ekwatafano lange naJehova.”

Ngeenge Rose a nyemata eshi ita dulu okuninga osho a li ha ningi, oha hekelekwa keendjovo odo di li mo 2 Ovakorinto 8:12, tadi ti: “Osheshi ehalo liwa lokuyandja ngeenge li li po, ola wapalela osho omunhu e shi kwete hasheshi ehe shi kwete.” Eendjovo odo ohadi dimbulukifa Rose kutya Kalunga oha kala a hafela oilonga yaye, molwaashi oha ningi ashishe osho ta dulu nonande okwa ngabekwa.

 OKUNYIKA OLUHODI

Delphine, oo a tumbulwa metetekelo, okwa ti: “Konima eshi okamonakadona kange komido 18 ka fya, onda li nda nyika oluhodi neenghono nokanda li ndi wete nda wana okukala nomwenyo. Oinima itai ka kala vali ngaashi ya li.” Okwa li a hekelekwa keendjovo dEpsalme 94:19, eshi omupsalme a ti kuKalunga: “Ngeenge ndi noshisho shoudjuu meni lange, omahekeleko oye oo a hekeleka omwenyo wange.” Okwa ti: “Ohandi ilikana kuJehova a kwafele nge ndi kale alushe nde lipyakidila noinima oyo tai hekeleke nge.”

Okwa li ha kala e lipyakidila noilonga yokuliyamba. Mokweendela ko kwefimbo, okwa li e lifaafanifa neembapeka dounona, kutya nonande dimwe ohadi kala da teka, ohadi kala di na oshilonga shokumbapeka. Sha faafana, nonande okwa li a teka omukumo, okwa li e lihonga kutya ota dulu natango okukwafela vamwe. Okwa ti: “Diva onda li nda mona kutya ngeenge nda li handi longifa omafinamhango Ombiibeli nomishangwa ndi hekeleke ovakonakonimbiibeli vange, onda li handi kala ndi udite Jehova ta hekeleke nge.” Okwa li a shanga omusholondodo womadina ovanhu vomOmbiibeli ovo va pita meenghalo dinyikifa oluhodi. Okwa ti: “Oushili oyoo kutya, aveshe ova li hava ilikana.” Okwe lihonga yo kutya “ito dulu okumona omanyamukulo ngeenge iho lesha Ombiibeli yoye.”

Okukonakona Ombiibeli okwa honga yo Delphine okukala ta yandje elitulemo konakwiiwa ndele hakonakudiwa. Eteelelo olo la tumbulwa mOilonga 24:15 oha li mu hekeleke, eshi taku ti: “Otaku ka kala enyumuko lovayuki nolovalunde.” Omolwashike e na oushili kutya Jehova ota ka nyumuna okamonakadona kaye? Delphine okwa ti: “Onda fa ndi wete okamonakadona kange monakwiiwa. Ondi na elineekelo kutya ohandi ka mona okamonakadona kange pefimbo laJehova la wapala. Onda fa ndi liwete nokamonakadona kange tu li moshikunino shetu nondi ka hole okudja efiku ka dalwa.”

^ okat. 4 Oishangomwa ihapu oyo ya kwatwa momawi otai hangwa kointaneta ko-jw.org.

Ombiibeli otai dulu oku ku hekeleka nonande ou li momaudjuu manene