Osho Ombiibeli tai ti

 Exunganeko etumwalaka la nwefwa mo kuKalunga, oshinima osho sha hololwa kuKalunga. Ombiibeli oya popya kutya ovaprofeti “ova popya eendjovo daKalunga tava wilikwa komhepo iyapuki.” (2 Petrus 1:20, 21) Onghee omuprofeti omunhu oo ha pewa etumwalaka kuKalunga noku li yandja kuvamwe. — Oilonga 3:18.

Ovaprofeti ova li ha pewa ngahelipi etumwalaka kuKalunga?

 Kalunga okwa li ha longifa eenghedi di lili noku lili, opo a yandje omadiladilo aye kovaprofeti vaye:

•   Okushanga. Kalunga okwa li a longifa onghedi ei pomhito imwe aike, eshi a li a pa Moses, Oipango Omulonga ya shangwa. — Exodus 31:18.

•   Okupopya okupitila movaengeli. Pashihopaenenwa, Kalunga okwa longifa omweengeli a wilike Moses shi na sha netumwalaka olo a li ta ka lombwela Farao, ohamba yaEgipti. (Exodus 3:2-4, 10) Ngeenge pa li pe na etumwalaka la fimana, Kalunga okwa li ha wilike ovaengeli va twale etumwalaka laye, ngaashi a li e shi ninga, eshi a lombwela Moses, a ti: ‘Shanga eendjovo edi, molwaashi ohandi ningi ehangano naave nosho yo naIsrael metwokumwe neendjovo edi.’ — Exodus 34:27. a

•   Omamoniko. Omafimbo amwe, omamoniko okwa li haa yandjwa ofimbo omuprofeti e li oupafi noku wete filufilu osho tashi ningwa. (Jesaja 1:1; Habakuk 1:1) Amwe okwa li haa kala e wetike naao te a pewa oha kufa ombinga muo. (Lukas 9:28-36; Ehololo 1:10-17) Omafimbo amwe, omamoniko okwa yandjwa ofimbo omunhu e li meemhofi. (Oilonga 10:10, 11; 22:17-21) Kalunga okwa li yo a yandja etumwalaka laye okupitila meendjodi, ofimbo omuprofeti a kofa. — Daniel 7:1; Oilonga 16:9, 10.

•   Okuwilika omadiladilo. Kalunga okwa li a wilika omadiladilo ovaprofeti vaye, opo va yandje etumwalaka laye. Osho oshi li metwokumwe naasho Ombiibeli ya popya, eshi ya ti: “Omishangwa adishe oda nwefwa mo kuKalunga.” Outumbulilo da “nwefwa mo kuKalunga” otau dulu yo okutolokwa “sha fudilwa mo kuKalunga.” (2 Timoteus 3:16; etoloko lo-The Emphasised Bible) Kalunga okwa longifa omhepo yaye iyapuki, ile eenghono daye tadi longo, opo a tule omadiladilo aye momitima dovapiya vaye. Etumwalaka ola li laKalunga, ashike omuprofeti okwa longifa oitya yaye mwene. — 2 Samuel 23:1, 2.

Mbela exunganeko ola kwatele mo alushe okuxunganeka shi na sha nonakwiiwa?

 Ahowe, omaxunganeko opaMbiibeli ihaa xunganeke ashike shi na sha nonakwiiwa. Ashike omatumwalaka mahapu a dja kuKalunga oku na sha nonakwiiwa, nonande inae shi popya sha yukilila. Pashihopaenenwa, ovaprofeti vaKalunga ova kala nokulondwela lwoikando Ovaisrael vonale shi na sha noilonkga yavo ii. Omalondwelo oo okwa li a popya shi na sha nomanangeko noupuna oo ovanhu va li tava ka mona, ngeenge ova dulika nosho yo oilanduliko oyo ya li tai ke va hanga, ngeenge ova anye okudulika. (Jeremia 25:4-6) Oshidjemo osha li tashi ke li kolelela kehoololo lOvaisrael. — Deuteronomion 30:19, 20.

Oihopaenenwa yomaxunganeko opaMbiibeli oo inaa kwatela mo okuxunganeka

•   Pomhito imwe, eshi Ovaisrael va li va pula Kalunga e va kwafele, okwa li a tuma omuprofeti e va yelifile kutya molwaashi ova anya okudulika koipango yaYe, Kalunga ite ke va kwafele. — Ovatokolipangeli 6:6-10.

•   Eshi Jesus a li a popya nomukainhu Omusamaria, okwa li e mu hololela oinima i na sha nonakudiwa yaye oyo a li ashike e i shiiva omolweenghono daKalunga. Okwa li a popya kutya Jesus omuprofeti, nonande ka li a xunganeka sha shi na sha nonakwiiwa. — Johannes 4:17-19.

•   Eshi Jesus a li a twalwa komhangu, ovatondi vaye ova li va uvika oshipala shaye noku mu denga, ndele tava ti: “Xunganeka! Olyelye e ku denga?” Kava li tava pula Jesus a xunganeke shi na sha nonakwiiwa, ndele oku wilikwe keenghono daKalunga a popye kutya olyelye a li e mu denga. — Lukas 22:63, 64.