Onhumwafo onhivali kuTimoteus 3:1-17
3 Ndele kala u shi shii kutya momafiku axuuninwa+ otapa ka kala omafimbo madjuu okukaliwa muo.
2 Osheshi ovanhu otava ka kala ve lihole vo vene, ovanalwisho voimaliwa, ovalitangi, ovalinenepeki, ovasheki, ihava dulika kovadali, ihava pandula, vehe fi ovadiinini,
3 vehe na ohole, vehe na elongelokumwe, ovalundili, vehe na elipangelo, ovakwanyanya, ovatondi vouwa,
4 ovakengeleledi, ve na omitwe dikukutu,* ve na ounhwa, ve hole omalihafifo ponhele yokuhola Kalunga,
5 have limonikifa va fa ovatilikalunga, ndele ihava kala metwokumwe nonghedi omo Kalunga a hala okulongelwa;+ ovanhu va tya ngaho va kala kokule.
6 Mokati kovanhu ovo otamu ka dja ovalumenhu ovakengeleledi tave ke livakela momaumbo, ndele tava kwata ko ovakainhu ovo va nghundipala nova pikwa koulunde nokomahalo e lili noku lili.
7 Nonande ovanhu ovo alushe ohave lihongo, ihava kala ve udite ko nandenande oshili.
8 Ndele ngaashi Jannes naJambres va li omhinge naMoses, ovanhu ovo navo ove li omhinge noshili. Ovanhu va tya ngaho ove na omadiladilo mai, na Kalunga ine va hokwa, molwaashi kave na eitavelo.
9 Kakele kaasho, itava ka ninga exumokomesho, molwaashi oulai wavo otau ka kala u liwetikile kwaaveshe, ngaashi wovalumenhu ovo vavali.+
10 Ndele ove owa landula filufilu ehongo lange, onghedi yange yokukalamwenyo,+ elalakano lange, eitavelo lange, onheni yange, ohole yange, elididimiko lange,
11 omahepeko nokumona oixuna ngaashi oko nda mona muAntiokia,+ muIkonium+ nomuListra.+ Ashike onde lididimikila omahepeko oo, nOmwene okwa xupifa nge mo muo aeshe.+
12 Oshoshili, aveshe ovo va hala okulongela Kalunga netilofimaneko moukumwe naKristus Jesus, navo otava ka hepekwa.+
13 Ashike ovakolokoshi novapukifi otava ka xuma komesho mokulonga owii, notava ka pukifwa nokupukifa ovanhu vakwao.+
14 Ndele ove, twikila okudiinina oinima oyo we lihonga nowa tomhwa u itavele,+ osheshi ou shii ou e i ku honga
15 nou shii omishangwa diyapuki+ okudja kounona,+ odo tadi ku kwafele u kale u na eendunge, opo u dule okuxupifwa omolweitavelo loye muKristus Jesus.+
16 Omishangwa adishe oda nwefwa mo kuKalunga,+ nohadi kwafele mokuhonga,+ okupukulula, okuyukifa oinima nokutekula mouyuki,+
17 opo omupiya waKalunga a kale a wana okulonga filufilu oshilonga keshe shiwa.
Omashangelo opedu
^ Ile “ihava tambula ko omayele.”
