Osho Ombiibeli tai ti

 Kalunga okwe tu pa emanguluko, eenghono dokuninga omatokolo etu vene, ponhele oye e a ninge, ile a ufe osho tu na okuninga. Tala osho Ombiibeli tai hongo.

•   Kalunga okwa shita ovanhu oshifeka shaye. (Genesis 1:26) Mepingafano noinamwenyo oyo hai ningi oinima metwokumwe neshito, fye otwa shitwa twa fa Omushiti wetu hatu dulu okuulika omaukwatya ngaashi ohole nosho yo ouyuki. Otu na emanguluko lokuninga omatokolo ngaashi Omushiti wetu.

•   Ohatu dulu okutokola kutya otwa hala onakwiiwa ya tya ngahelipi. Ombiibeli otai tu ladipike tu ‘hoolola omwenyo mokupwilikina kondaka yaKalunga,’ sha hala okutya okuhoolola okupwilikina koipango yaye. (Deuteronomion 30:19, 20) Ngeno katwa li tu na emanguluko lokuninga omatokolo, ngeno oshinima osho oshongaho. Ponhele Kalunga e tu fininike tu ninge osho ta pula, ote tu pula pahole ta ti: “Ngeno ou yandje ashike elitulemo koipango yange, opo nee ombili yoye otai ka kala ngaashi omulonga.” — Jesaja 48:18.

•   Okupondola, ile okuhapondola kwetu ita ku ufwa kusha. Ngeenge otwa hala okupondola, otu na okulonga noudiinini. Ombiibeli otai ti: “Keshe osho to longo nomake oye shi longa neenghono doye adishe.”(Omuudifi 9:10) Oya weda ko yo vali ya ti: “Eemhangela daavo hava longo noudiinini otadi eta ouwa.” — Omayeletumbulo 21:5.

 Emanguluko lokuninga omatokolo oli li oshali ya denga mbada ya dja kuKalunga, shaashi ohali tu ningifa tu kale tu mu hole ‘nomutima wetu aushe,’ molwaashi twa hala oku shi ninga. — Mateus 22:37.

Mbela Kalunga hae ha pangele oinima aishe?

 Ombiibeli otai hongo kutya Kalunga Omunaenghono adishe nosho yo kutya eenghono daye inadi ngabekwa kusha. (Job 37:23; Jesaja 40:26) Ashike iha longifa eenghono daye a pangele keshe shimwe. Pashihopaenenwa, Ombiibeli oya popya kutya Kalunga okwa kala a ‘mwena nokwe lididimikila’ Babilon shonale, omutondi woshiwana shaye. (Jesaja 42:14) Sha faafana, nokunena ote lididimikile ovo hava longifa nai emanguluko lavo lokuninga omatokolo, opo va yahameke vamwe. Ashike Kalunga ite ve lididimikile fiyo alushe. — Epsalme 37:10, 11.