Enyamukulo lopaMbiibeli

 Antikristus ke fi ashike omunhu wonhumba pauhandimwe, ile ehangano lonhumba, osheshi Ombiibeli oya ti oku na ‘ooantikristus vahapu.’ (1 Johannes 2:18) Ponhele yaasho, outumbulilo “antikristus,” oo wa dja koshitya shOshigreka tashi ti, “omhinge, (ile ponhele) yaKristus,” otau ulike kukeshe oo ha ningi oinima tai shikula:

•   Ta anye okudimina kutya Jesus oye Kristus (Messias), ile ta anye okudimina kutya oku li Omona waKalunga. — 1 Johannes 2:22.

•   Ta pataneke Kristus, Omuvaekwa waKalunga. — Epsalme 2:1, 2; Lukas 11:23.

•   Te liti kutya oye Kristus. — Mateus 24:24.

•   Ta hepeke ovashikuli vaKristus, molwaashi Jesus oha tale ko osho tashi va ningilwa sha fa oye te shi ningilwa. — Oilonga 9:5.

•   Te liti kutya ye Omukriste, ofimbo ta longo owii nokupopya oipupulu. — Mateus 7:22, 23; 2 Ovakorinto 11:13.

 Kakele ashike kokutya oohandimwe ovo hava ningi oinima oyo ove li ooantikristus, Ombiibeli oye va popila yo kumwe kutya ove li ‘ooantikristus.’ (2 Johannes 7) Antikristus okwa holoka tete pefimbo lovayapostoli, noku li ko fiyo opaife. Ombiibeli oye shi xunganeka nale. — 1 Johannes 4:3.

Nghee to dulu okudidilika mo ooantikristus

•   Ohava xumifa komesho omahongo oipupulu e na sha Jesus. (Mateus 24:9, 11) Pashihopaenenwa, ovo hava hongo ehongo lOukwatatu, ile kutya Jesus oKalunga Omunaenghono, otava kondjifa omahongo aJesus, oo a tile: “Tate oku dule nge.” — Johannes 14:28.

•   Ooantikristus ihava tambula ko osho Jesus a popya kombinga yanghee Ouhamba waKalunga hau longo. Pashihopaenenwa, ovawiliki vomalongelokalunga vamwe ohava ti kutya Kristus oha longo okupitila momapangelo opanhu. Ashike ehongo olo otali kondjifafana naasho Jesus a popya, eshi a ti: “Ouhamba wange kau fi womounyuni ou.” — Johannes 18:36.

•   Ohava ti kutya Jesus Omwene wavo, ashike ihava dulika koipango yaye, mwa kwatelwa osho shokuudifa onghundana iwa yOuhamba. — Mateus 28:19, 20; Lukas 6:46; Oilonga 10:42.