„Þegar þið biðjist fyrir skuluð þið ekki fara með sömu orðin aftur og aftur.“ – Matteus 6:7.

Jehóva vill ekki að við förum með bænir sem við höfum lagt á minnið eða lesum þær úr bænabók. Hann vill öllu heldur að við tölum frá hjartanu. Ímyndaðu þér hvað það væri pirrandi að heyra vin sinn segja það sama daginn út og daginn inn. Góðir vinir eru hreinskilnir og einlægir. Þegar við biðjum til Guðs með okkar eigin orðum sýnum við að við lítum á himneskan föður okkar sem vin.

„Þegar þið biðjið fáið þið ekki því að þið biðjið af röngu tilefni.“ – Jakobsbréfið 4:3.

Við myndum ekki gera ráð fyrir að Guð svaraði bænum okkar ef við bæðum hann um að fá að gera eða eiga eitthvað sem við vitum að hann hefur ekki velþóknun á. Myndi Jehóva til dæmis svara bæn fjárhættuspilara sem biður um heppni fyrst hann er búinn að gefa okkur skýra viðvörun um græðgi og hjátrúarfulla trú á heppni? (Jesaja 65:11; Lúkas 12:15) Það er mjög órökrétt að halda að Jehóva svari slíkum bænum. Við verðum að ganga úr skugga um að bænir okkar séu í samræmi við það sem Guð segir okkur í Biblíunni ef við viljum að hann svari þeim.

 „Daufheyrist maður við lögmálinu verður bæn hans andstyggð.“ – Orðskviðirnir 28:9.

Á biblíutímanum svaraði Guð ekki bænum þeirra sem höfnuðu réttlátum lögum hans. (Jesaja 1:15, 16) Og hann hefur ekki breyst. (Malakí 3:6) Ef við viljum að Guð bænheyri okkur verðum við að gera okkar besta til að lifa í samræmi við lög hans. En hvað ef við gerðum áður eitthvað sem er rangt? Þýðir það að Guð muni aldrei hlusta á okkur? Auðvitað ekki! Guð fyrirgefur okkur fúslega ef við snúum við blaðinu og leggjum okkur fram um að þóknast honum. – Postulasagan 3:19.