Linuktan ni Jehova Dagiti Matak

Kas insalaysay ni Patrice Oyeka

Mumalem idin ket agleppas manen ti sabali a naliday nga aldaw iti biagko. Gapu ta maysaak a bulsek ken malidliday, naumaakon iti kasasaadko a dumdumngeg laeng iti radio, isu a kayatkon a pagpatinggaen ti nakaay-ay-ay a biagko. Inlaokko ti pulbos a sabidong iti sangabaso a danum ken inkabilko iti lamisaan iti sanguanak. Ngem napanunotko a sakbay nga inumek ti danum nga adda sabidongna, kayatko pay ti agdigus nga umuna sakonto isuot ti kasayaatan a kawesko. Apay a kayatko ti agpakamatay? Ken apay a sibibiagak pay laeng ita a mangisalaysay iti kapadasak?

NAIPASNGAYAK idi Pebrero 2, 1958, iti probinsia ti Kasaï Oriental, iti Democratic Republic of the Congo. Natay ni Tatang idi agtawenak iti siam, isu a ni manongko ti nangsuporta ken nangaywan kaniak.

Kalpasan a nagraduarak, nagtrabahoak iti maysa a plantasion ti rubber. Idi 1989, iti maysa nga agsapa bayat nga agar-aramidak iti report iti opisinak, bigla metten a simmipnget ti aglawlawko. Pagarupko a naiddep laeng ti koriente, ngem mangngegko nga agan-andar met ti generator ken bigbigat pay! Nagdanagak ta awanen ti makitak, uray ti mismo a pagsursuratak!

Inayabak a dagus ti maysa kadagiti taok tapno ipannak iti klinika. Inrekomenda ti doktor nga ipandak iti espesialista. Gapu ta nakitana a naperdi dagiti retina ti matak ken delikadon ti kasasaadko, imbaonnak iti kabesera a siudad ti Kinshasa.

Biag Idiay Kinshasa

Nagpakonsultaak iti adu nga espesialista iti mata idiay Kinshasa ngem awan kadakuada ti nakatulong. Kalpasan ti 43 nga aldawko iti ospital, imbaga dagiti doktor a tungpal-biag a diakon makakita. Dagiti kapamiliak impandak iti nagduduma a relihion bareng maagasandak babaen ti milagro, ngem awan ti naaramidanda.

Kamaudiananna, awanen ti namnamak a makakitaak pay. Nasipngeten ti lubongko. Napukawko amin​—ti panagkitak ken ti trabahok. Pinanawannak pay ti asawak ken innalana amin a sanikuami. Mabainak a rummuar ken makilangen kadagiti tattao. Likliklikakon dagiti tattao isu nga addaak laengen iti balay ken panagriknak awanen serserbik.

Namindua a ginandatko ti agpakamatay. Ti maikadua a gundaway ket ti nadakamat iti pangrugian. Natungday ti planok nga agpakamatay ta idi agdigdigusak, imbelleng ti maysa nga ubing ti tinemplak a sabidong. Naimbag laengen ta dina ininum dayta. Ngem madanaganak idi diak masapulan ti baso. Idin impudnok kadagiti kapamiliak no apay a birbirokek ti baso ken ti planok nga agpakamatay.

Agyamanak iti Dios ken kadagiti kapamiliak iti panangaywanda kaniak. Nalapdan ti gandatko nga agpakamatay.

Naragsak Manen ti Biagko

Maysa nga aldaw ti Domingo idi 1992, nakatugawak nga agsigsigarilio iti sango ti balaymi  idi adda dua a Saksi ni Jehova a nagbalay-balay. Gapu ta nakitada a bulsekak, binasada ti Isaias 35:5: “Iti dayta a tiempo maluktanto ti matmata dagidiay bulsek, ket maluktanto ti mismo a laplapayag dagidiay tuleng.” Naragsakanak unay idi nangngegko dagita a sasao! Saan a kas kadagiti mangmangngegko iti dadduma a relihion, saan nga ikarkari dagiti Saksi ti namilagruan a pannakaagas. Imbes ketdi, inlawlawagda a no am-ammuek ti Dios makakitaakto manen idiay baro a lubong nga inkarina. (Juan 17:3) Dagus a nakipagadalak iti Biblia kadagiti Saksi ni Jehova. Inusarmi ti libro a Mabalinyo ti Agbiag nga Agnanayon iti Paraiso a Daga. Rinugiak metten ti umatender kadagiti Nakristianuan a gimong iti Kingdom Hall ken binalbaliwakon ti panagbiagko. Insardengko metten ti agsigarilio.

Gapu ta bulsekak, saanak a rumangrang-ay iti naespirituan. Isu a nagadalak iti eskuelaan dagiti bulsek tapno makasursuroak nga agbasa ken agsurat iti Braille. Nakatulong daytoy kaniak tapno mabaelak ti makiraman iti panagsanay para iti ministerio a maar-aramid iti Kingdom Hall. Idi agangay, mangaskasabaakon kadagiti kaarrubak. Naragsak manen ti biagko. Rimmang-ayak iti naespirituan ken indedikarko ti biagko ken Jehova ket nabautisaranak idi Mayo 7, 1994.

Bayat nga umun-uneg ti panagayatko ken Jehova ken kadagiti tattao, tinarigagayakon ti sumrek iti amin-tiempo a ministerio. Sipud idi Disiembre 1, 1995, maysaakon a regular pioneer (amin-tiempo a ministro). Naaddaanak met iti pribilehio nga agserbi kas panglakayen iti kongregasionmi sipud idi Pebrero 2004. Pasaray maawisak nga agpalawag iti dadduma a kongregasion iti lugarmi. Amin dagitoy a bendision ti mangparparagsak ken tumultulong kaniak a manglaglagip nga awan ti aniaman a depekto a manglapped kadatayo a mangitungpal iti tarigagaytayo nga agserbi ken Jehova a Dios.

Inikkannak ni Jehova iti “Mata”

Kas nadakamaten, pinanawannak ni baketko idi maysaakon a bulsek. Ngem nakaawatak iti kanayonan a bendision manipud ken Jehova. Arigna inikkannak iti mata. Iti laksid ti kasasaadko, inawatnak ni Anny Mavambu kas asawana ken isu ti nagbalin a pannakamatak. Maysa met a bendision kaniak gapu ta agserserbi met kas amin-tiempo a manangaskasaba. Kuyogennak pay a kanayon iti ministerio, ken basaenna met dagiti reperensia dagiti palawagko tapno maisuratko dagita iti Braille. Gapu kenkuana, pimmudno kaniak dagiti sasao ti Proverbio 19:14: “Ti tawid kadagiti amma isu ti balay ken kinabaknang, ngem ti masirib nga asawa a babai aggapu ken Jehova.”

Binendisionannakami pay ni Jehova iti dua nga annak​—maysa a lalaki ken maysa a babai. Tartarigagayak a makita dagiti rupada idiay Paraiso! Ti sabali pay a bendision ket ni manongko. Impalubosna nga agnaedkami iti lotena, ken inawatna ti kinapudno manipud iti Biblia ket nabautisaran! Agkakaduakami iti maymaysa a kongregasion.

Nupay bulsekak, kayatko pay a palawaen ti panagserbik iti Dios gapu ta aglaplapusanan ti panangbendisionna kaniak. (Malakias 3:10) Inaldaw nga ikarkararagko nga umay koman ti Pagarianna ken ikkatenna amin a panagsagaba ditoy daga. Sipud idi naam-ammok ni Jehova, kombinsidoak a “ti bendision ni Jehova​—isu dayta ti mangpabaknang, ket awan rigat nga inayonna iti dayta.”​—Proverbio 10:22.

[Dagiti Ladawan iti panid 13]

Mangipapaayak iti palawag a naibatay iti Biblia; kaduak ti pamiliak ken ni manongko