Panangmatmat iti Lubong

“Nakakatkatawa a panunoten ngem no maysaka a presidente, mapilitanka nga agkararag.”​—BARACK OBAMA, PRESIDENTE TI ESTADOS UNIDOS TI AMERICA.

Idi naisaludsod no kasanoda nga ipakita nga ipannakkelda ti pagilianda, kinuna ti 56% kadagiti umili ti Argentina nga agtawen iti 10 agingga iti 24 a kaykayatda nga isuot ti kamiseta ti soccer team ti pagilianda.​—LA NACIÓN, ARGENTINA.

Sigun kadagiti resulta ti maysa a panagadal, “agarup 33% iti taraon a mapatpataud a pagtaraon ti tao ti maibelbelleng wenno masaysayang iti intero a lubong, a katupag ti agarup 1.3 bilion a tonelada kada tawen.”​—FOOD AND AGRICULTURE ORGANIZATION OF THE UNITED NATIONS, ITALY.

“Agraraira iti daga ti gubgubat ken damdamag maipapan iti gubgubat. Rumbeng ngarud a kanayon a nakasagana dagiti soldado ti Pagiliantayo a mangsalaknib kadagiti umilina ken amin nga ibilangna a sagrado manipud iti aniaman nga alegasion ti makinruar a kabusor.”​—PATRIARCH KIRILL, LIDER TI RUSSIAN ORTHODOX CHURCH.

Ti kangatuan a bilang dagiti naaksidente iti lugan a naireport iti kompania ti insurance idiay Germany idi 2010 ket napasamak iti nagbaetan ti alas siete ken alas otso ti bigat. “Maysa kadagiti kapatgan a pangliklik iti aksidente ket mangiwaya iti umdas a tiempo iti iyaapan iti trabaho iti agsapa,” kinuna ti maysa a kompania.​—PRESSEPORTAL, GERMANY.

Dagiti Agtutubo a Lider Idiay Malaysia

Adda nalatak a kompetision iti TV a naangay idiay Kuala Lumpur, Malaysia. Napauluan dayta iti “Imam Muda,” wenno “Agtutubo a Lider.” Maipapan dayta iti panangpili iti nasayaat nga imam, wenno lider ti relihion nga Islam. Dagiti nakisalip ket agtawen iti 18 agingga iti 27 a naggapu iti nadumaduma a kasasaad ti biag. In-inut a naksayan ti bilangda agingga a maymaysan ti nabati. Dagiti premio ket kuarta ken baro a kotse. Ti nangabak ket natukonan met nga agtrabaho kas imam, ageskuela iti libre idiay Saudi Arabia ken libre dagiti magastosna iti narelihiosuan a panagbiahena idiay Mecca. Dagiti nakisalip ket masapul nga eksperto kadagiti rebbengen ti maysa nga imam, kabaelanda ti makidebate maipapan iti relihion ken agdama nga isyu, ken kabesadoda ti Koran. Kuna ti nangyurnos iti dayta a pabuya a ti kalatna ket “allukoyen dagiti agtutubo” iti Islam.

Di Nainsiriban a Panaginternet

Saan a maamiris ti adu nga agus-usar kadagiti social network dagiti posible nga epekto ti panangipakaammoda iti pribado nga impormasion. Ngem ti di naannad a panagusar iti Internet ket mabalin nga agresulta iti problema iti masanguanan. Sigun iti prinsipal a ni Timothy Wright a naadaw iti Sydney Morning Herald ti Australia, “ti moderno a teknolohia kaipapananna a ti nailaw-an a sao, mangpardaya a komento, di maitutop a retrato wenno naipalgak a pribado nga impormasion ti maysa ket permanenten ken mabalin a magun-odan ti siasinoman a maka-access iti dayta.” Kaipapananna a “dagiti kamali a naaramidan ti 15 anyos ket mabalin a makita ti employer 10 a tawen kalpasanna,” kinuna ni Wright.