[Heb., peʹredh; pir·dahʹ (kabaian a mulo)].

 Mestiso nga anak ti kalakian nga asno ken kabaian a kabalio. Ti bagi ti mulo umarngi iti bagi ti kabalio, ngem ti ababa ken napuskol nga ulona, immarantiddog a lapayagna, ababa a burbor iti teltelna, babassit a saksakana, ken ipusna a ti murdongna ket maysa a punggos ti atitiddog a buok​—amin dagitoy ket pakabigbigan ti asno. Ti mulo (Equus asinus mulus) naalana ti sumagmamano kadagiti nasaysayaat a kualidad ti dua a nagannakna: ti asno kas managibtur, naandur, ken di agtibkol ti sakana, ken ti kabalio kas nabileg, nakired, ken natured. No idilig iti kabalio, ti mulo narigrigat nga agsakit, naan-anus nga agawit kadagiti nadagsen nga awit, ken napapaut ti panagbiagna. Ti hinny, nga anak ti bulog a kabalio ken kabaian nga asno, ket basbassit ngem ti mulo, kasta met nga awanan bileg ken saan a nataraki. Agpada a baog dagiti kalakian ken kabaian a mulo, nupay adda sumagmamano a kasasaad a saan a kasta.

 Dagitoy nga animal ket karaman kadagiti sagut nga inyeg ti ar-ari agpaay ken Solomon, isuda nga agtartarigagay a dumngeg iti siribna. (1Ar 10:24, 25; 2Cr 9:23, 24) Ti dadduma a mulo mabalin a nagun-odan kadagiti agtagtagilako, kas kadagiti taga Fenicia. (Eze 27:8, 9, 14) Idi tiempo ni David, naar-aramat dagiti mulo kas pagsakayan dagiti natan-ok a tattao. Ti kabaian a mulo ni David naituding nga usaren ni Solomon iti pannakapulotna idiay Gihon.​—2Sm 13:29; 18:9; 1Ar 1:33, 34, 38, 39.

 Naibilang a napateg dagiti mulo kas pagbunag iti awit. (2Ar 5:17; 1Cr 12:40) Impasimudaag ni Jehova, babaen ken mammadtona nga Isaias, a dagiti mulo ket maysa kadagiti maaramat a pagidaliasat iti naiwarawara nga ilina maipaay iti pannakaipanda idiay Jerusalem. (Isa 66:20) Makapainteres ngarud a, kas kaitungpalan ti padto, dagidiay nagsubli manipud pannakaidestiero idiay Babilonia nangikuyogda iti 245 a mulo kas kanayonan iti dadduma pay nga animal a pagtrabaho.​—Esd 2:66; Ne 7:68.

  Nabalakadan dagiti tattao a saanda a pagbalinen ti bagbagida nga awanan pannakaawat, kas iti kabalio wenno mulo a ti kinasarantana masapul a matngel babaen ti pangngednged wenno rienda.​—Sal 32:9.