Dagiti Hebreo impatuldoda ti direksion maibatay iti panangmatmat ti maysa a tao a sisasango iti daya. Gapuna, ti laud adda iti likudanda ken mabalin nga ipasimudaag ti Hebreo a sao nga ʼa·chohrʹ, kaipapananna ti “likudan.”​—Isa 9:12.

 Masansan unay a ti “laud” (“agpalaud,” wenno “makinlaud”) ket ipamatmat ti Hebreo a sao a yam (kaipapananna ti “baybay,” kas iti Jos 1:4), nabatad a gapu ta ti Mediteraneo, wenno Dakkel a Baybay, adda iti dayta a turong manipud Naikari a Daga. (Ge 28:14; Ex 10:19; 38:12; Nu 34:6; Zac 14:4) Masapul a mausig ti konteksto tapno masinunuo no ti yam kaipapananna ti “baybay” wenno ipamatmatna ti laud.​—Jos 15:8-12; 2Cr 4:2-4, 15.

 Ti sabali pay a Hebreo a sao (ma·ʽaravʹ) maus-usar a mangipamatmat iti lelennekan ti init (Isa 43:5; 59:19) wenno iti laud. (1Cr 26:30; 2Cr 32:30) Maar-aramat dayta tapno tumulong a mangtarus iti dakkel a distansia a naipasimudaag iti mangliwliwa a pammasiguro ti asi ni Jehova kadagiti imperpekto a tattao: “Kas iti kaadayo ti leleggakan ti init manipud iti lelennekan ti init, kasta ti kaadayona manipud kadatayo ti nangikabilanna kadagiti salungasingtayo.”​—Sal 103:12.

 Idi kinuna ni Jesus nga adu ti umay “manipud kadagiti makindaya a paset ken kadagiti makinlaud a paset” tapno agsadagda iti panganan iti Pagarian a kadua da Abraham, Isaac, ken Jacob, ti Griego a teksto iti Mateo 8:11 literal a kunaenna a “manipud leleggakan ken lelennekan.” Ditoy ti Griego a sao a dy·smeʹ adda pakainaiganna iti direksion ti lelennekan ti init, awan sabali, iti laud. (Int) Ti dy·smeʹ maus-usar met iti dadduma pay a teksto a mangipamatmat iti laud.​—Mt 24:27; Lu 12:54; 13:29; Apo 21:13.