[Heb., dar·darʹ; Gr. triʹbo·los].

 Aniaman iti kita ti mulmula nga aduan puris, aggiraygiray-pingirna a bulbulong, naamnut nga ung-ungkay, ken addaan nagtitimbukel wenno sinantubong a busel nga agpataud iti nalamuyot ken kasla seda a purpura, duyaw, wenno puraw a sabsabong. Ni Adan, ken dagiti kaputotanna idi agangay, kasapulan a sarangtenda dagiti makapariribuk a kalunay idi suksukayenda ti nailunod a daga. (Ge 3:17, 18) Yantangay iwaraswaras ti angin ti bukbukelda, nalaka nga agtubo dagiti kalunay kadagiti nabaybay-an ken langalang a lugar. (Kitaenyo ti Os 10:8.) Tinukoy ni Jesu-Kristo dagiti kalunay iti panangiladawanna a ti tattao, kas iti mulmula, mailasin babaen kadagiti bungada. (Mt 7:16) Idiay Palestina, kadawyan ti pannakakita iti adu a bimmituen a kalunay a maipaypayukpok a kas agtultulid a reprep babaen kadagiti angin ti otonio, maysa a ladawan a nalabit naiparipirip iti Salmo 83:13 ken Isaias 17:13.