Josue 14:1-15
14 Ita daytoy ti innala ti annak ti Israel kas pagtatawidan a sanikua iti daga ti Canaan,+ nga impatawid kadakuada ni Eleazar a padi ken ni Josue nga anak ni Nun ken dagiti pannakaulo ti amma dagiti tribu ti annak ti Israel.+
2 Ti tawidda ket babaen ti panagbibinnunot,+ kas iti imbilin ni Jehova babaen ken Moises maipaay iti siam a tribu ken iti kagudua a tribu.+
3 Ta inted ni Moises ti tawid ti dua a sabali pay a tribu ken ti sabali pay a kagudua a tribu idiay ballasiw ti Jordan;+ ket kadagiti Levita saan a nangted iti tawid iti tengngada.+
4 Ta ti annak ni Jose nagbalinda a dua a tribu,+ ti Manases+ ken ti Efraim;+ ket saanda a nangted iti binglay iti daga kadagiti Levita, malaksid kadagiti siudad+ a pagnaedan ken kadagiti pagpaarabanda maipaay kadagiti dinguenda ken sanikuada.+
5 Kas iti imbilin ni Jehova ken Moises, kasta ti inaramid ti annak ti Israel; ket biningbingayda ti daga.
6 Idin ti annak ni Juda immasidegda ken Josue idiay Gilgal,+ ket kinuna kenkuana ni Caleb+ nga anak ni Jefune a Kenizeo:+ “Sika pagaammom unay ti sao a sinao ni Jehova+ ken Moises a lalaki ti pudno a Dios+ maipapan kaniak ken maipapan kenka idiay Cades-barnea.+
7 Uppat a pulo ti tawenko idi a ni Moises nga adipen ni Jehova imbaonnak manipud Cades-barnea tapno siimek ti daga,+ ket nangyegak kenkuana iti sao kas adda idi iti pusok.+
8 Ket ti kakabsatko a simmang-at a naikuyog kaniak pinagrunawda ti puso dagiti umili;+ ngem no maipapan kaniak, sinurotko a naan-anay ni Jehova a Diosko.+
9 Gapuna nagsapata ni Moises iti dayta nga aldaw, a kunkunana, ‘Ti daga a nabaddekan ta sakam+ agbalinto a kukuam ken kukua ti annakmo kas maysa a tawid agingga iti tiempo a di nakedngan, agsipud ta sinurotmo a naan-anay ni Jehova a Diosko.’+
10 Ket ita adtoy ni Jehova tinaginayonnak a sibibiag,+ kas iti inkarina,+ kadagitoy uppat a pulo ket lima a tawen nanipud idi inaramid ni Jehova daytoy a kari ken Moises idi a ti Israel nagna idiay let-ang,+ ket adtoy ita nga aldaw walopulo ket lima ti tawenkon.
11 Kaskasdi ita nga aldaw napigsaak a kas idi aldaw a panangibaon kaniak ni Moises.+ No kasano ti bilegko idi, kasta ti bilegko ita maipaay iti gubat, agpadpada iti iruruar ken iti iseserrek.+
12 Ket ita itedmo kaniak daytoy nakabambantay a rehion nga inkari ni Jehova iti dayta nga aldaw,+ ta sika nangngegmo iti dayta nga aldaw nga adda idi dagiti Anakim+ sadiay ken dadakkel a nasarikedkedan a siudad.+ Mabalbalin a ni Jehova addanto kaniak,+ ket sigurado nga ikkatakto ida iti sanikua, kas iti inkari ni Jehova.”+
13 Iti kasta binendisionan ni Josue ket ti Hebron intedna ken Caleb nga anak ni Jefune kas maysa a tawid.+
14 Dayta ti makagapu a ti Hebron nagbalin a kukua ni Caleb nga anak ni Jefune a Kenizeo kas maysa a tawid agingga itoy nga aldaw, iti rason nga isu sinurotna a naan-anay ni Jehova a Dios ti Israel.+
15 Ti nagan ti Hebron sakbay dayta ket Kiriat-arba+ (ti nakuna nga Arba+ isu idi ti naindaklan a tao kadagiti Anakim). Ket ti daga awan pannakasingana iti gubat.+
