Josue 10:1-43
10 Ket naaramid nga apaman a ni Adoni-zedec nga ari ti Jerusalem nangngegna a ni Josue nakautibona ti Ai+ ket kalpasanna impaayna iti pannakadadael,+ a no kasano ti inaramidna iti Jerico+ ken iti arina,+ kasta ti inaramidna iti Ai ken iti arina,+ ket dagiti agnanaed iti Gabaon nakikappiada iti Israel+ ken nagtalinaedda iti tengngada,
2 isu nagbuteng iti kasta unay,+ agsipud ta ti Gabaon ket dakkel a siudad, kas iti maysa kadagiti naarian a siudad, ken agsipud ta dakdakkel ngem iti Ai,+ ket amin dagiti lallakina mannakabalinda idi.
3 Iti kasta ni Adoni-zedec nga ari ti Jerusalem+ nagbaon ken Hoham nga ari ti Hebron+ ken ni Piram nga ari ti Jarmut+ ken ni Jafia nga ari ti Laquis+ ken ni Debir nga ari ti Eglon,+ a kunkunana,
4 “Sumang-atkayo kaniak ket tulongandak ket kabilentayo koma ti Gabaon, agsipud ta nakikappia ken Josue ken iti annak ti Israel.”+
5 Gapu itoy naguummongda a sangsangkamaysa ket simmang-atda, lima nga ari dagiti Amoreo,+ ti ari ti Jerusalem, ti ari ti Hebron, ti ari ti Jarmut, ti ari ti Laquis, ti ari ti Eglon, dagitoy ken amin dagiti pakarsoda, ket nagpakarsoda maibusor iti Gabaon ken nakigubatda iti dayta.
6 Kalpasan dayta dagiti lallaki ti Gabaon nagbaonda ken Josue idiay pakarso iti Gilgal,+ a kunkunada: “Dika koma pagpallailangen ta imam kadagiti adipenmo.+ Darasem ti sumang-at kadakami ket isalakannakami ken tulongannakami, ta amin nga ar-ari dagiti Amoreo nga agnanaed iti nakabambantay a rehion naguummongda a sangsangkamaysa a bumusor kadakami.”
7 Gapuna ni Josue simmang-at manipud Gilgal, isu ken amin dagiti tattao ti gubat a naikuyog kenkuana+ ken amin dagiti mamaingel a nabileg a lallaki.+
8 Idin ni Jehova kinunana ken Josue: “Dika agbuteng kadakuada,+ ta intedko ida ita imam.+ Awan maysa a lalaki kadakuada ti agtakderto maibusor kenka.”+
9 Ket ni Josue immay a bumusor kadakuada buyogen ti panangkellaat. Iti intero nga agpatnag isu simmang-at manipud Gilgal.
10 Ket riniribuk ida ni Jehova iti sanguanan ti Israel,+ ket rinugianda a papatayen ida iti dakkel a pananggudas idiay Gabaon+ ket kinamkamatda ida iti dalan a sasang-atan ti Bet-horon ket pinapatayda ida agingga idiay Azeca+ ken Makkeda.+
11 Ket naaramid a bayat nga agtaltalawda iti sanguanan ti Israel ket addada idi iti sasalugan ti Bet-horon, ni Jehova nangitinnag kadakuada iti dadakkel a batbato+ manipud iti langlangit agingga idiay Azeca, iti kasta natayda. Ad-adu ti natay manipud kadagiti uraro ngem kadagidiay pinatay ti annak ti Israel babaen ti kampilan.
12 Iti daydin a ni Josue nagsao ken Jehova iti aldaw a panangbaybay-a ni Jehova kadagiti Amoreo agpaay iti annak ti Israel, ket kinunana iti imatang ti Israel:“Init,+ dika agkuti iti ngato ti Gabaon,+Ket, bulan, idiayka ngatuen ti nababa a tanap ti Ajalon.”+
13 Iti kasta ti init nagtalinaed a di agkutkuti, ket ti bulan pudno a nagintek, agingga a ti nasion makaibales kadagiti kabusorna.+ Saan aya a naisurat dayta iti libro ni Jasar?+ Ket ti init nagtalinaed a siiintek iti tengnga ti langlangit ket saan a nagganat a lumnek iti agarup intero nga aldaw.+
14 Ket awan idi ti aldaw a kas iti daydiay, uray iti kasakbayanna wenno iti kalpasanna, a ni Jehova inimdenganna ti timek ti maysa a tao,+ ta ni met laeng Jehova makiruprupak maipaay iti Israel.+
15 Kalpasan dayta ni Josue ken ti intero nga Israel a naikuyog kenkuana nagsublida iti pakarso idiay Gilgal.+
16 Kabayatanna nagtalaw dagitoy lima nga ari+ ket naglemmengda iti rukib idiay Makkeda.+
17 Idin naipadamag ken Josue, a naikuna: “Dagiti lima nga ari nasarakan a nakalemmengda iti rukib idiay Makkeda.”+
18 Iti kasta kinuna ni Josue: “Mangitulidkayo iti dadakkel a batbato agingga iti wangawangan ti rukib ket mangitudingkayo iti dayta kadagiti lallaki a mangbantay kadakuada.
19 No maipapan kadakayo, dikay agintek. Kamatenyo dagiti kabusoryo, ket masapul a kabilenyo ida iti likudan.+ Dikay palubosan ida a sumrek kadagiti siudadda, ta ni Jehova a Diosyo intedna ida kadagita imayo.”+
20 Ket naaramid nga apaman a ni Josue ken ti annak ti Israel nalpasda a pinapatay ida iti dakkel unay a pananggudas, agingga a dimteng dagitoy iti pagnguduanda,+ ket dagidiay nakalasat kadakuada nagtalawda ket simrekda kadagiti nasarikedkedan a siudad,+
21 amin dagiti umili ngarud nangrugida nga agsubli iti pakarso, ken Josue, idiay Makkeda a sitatalna. Awan maysa a tao a sigagagar a nangigaraw iti dilana maibusor iti annak ti Israel.+
22 Idin kinuna ni Josue: “Luktanyo ti wangawangan ti rukib ket iruaryo nga iyeg kaniak dagitoy lima nga ari manipud iti rukib.”
23 Gapuna inaramidda ti kasta ket inruarda nga inyeg kenkuana manipud iti rukib dagitoy lima nga ari, ti ari ti Jerusalem,+ ti ari ti Hebron,+ ti ari ti Jarmut, ti ari ti Laquis,+ ti ari ti Eglon.+
24 Ket naaramid nga apaman a nairuarda nga inyeg ken Josue dagitoy nga ar-ari, ni Josue inayabanna amin dagiti lallaki ti Israel ket kinunana kadagiti komandante dagiti lallaki ti gubat a kimmuyog kenkuana: “Umasidegkayo. Ibaddekyo ti saksakayo kadagiti teltel dagitoy nga ar-ari.”+ Gapuna immasidegda ket imbaddekda ti saksakada kadagiti teltelda.+
25 Ket kinuna kadakuada ni Josue: “Dikay agbuteng wenno agkullayaw.+ Bumilegkayo ken pumigsakayo, ta kastoy ti aramidento ni Jehova kadagiti amin a kabusoryo a kagubgubatyo.”+
26 Ket kalpasan dayta kinabil ida ni Josue ken pinapatayna ida ken imbitinna ida iti lima a kayo, ket nagtalinaedda a sibibitin kadagiti kayo agingga iti rabii.+
27 Ket naaramid nga iti tiempo ti ilelennek ti init nagbilin ni Josue, ket imbabada ida manipud kadagiti kayo+ ket impalladawda ida iti rukib a naglemmenganda. Kalpasanna nangikabilda iti dadakkel a batbato iti wangawangan ti rukib—agingga itoy met laeng nga aldaw.
28 Ket ni Josue kinautibona ti Makkeda+ iti dayta nga aldaw ket kinabilna babaen ti tadem ti kampilan. No maipapan iti arina, isu ken ti tunggal kararua nga adda iti dayta impaayna iti pannakadadael.+ Awan inteddana a makalasat. Gapuna inaramidna iti ari ti Makkeda+ ti kas iti inaramidna iti ari ti Jerico.
29 Idin ni Josue ken ti intero nga Israel a naikuyog kenkuana limmasatda manipud Makkeda nga agturong idiay Libna ket nakigubatda iti Libna.+
30 Iti kasta ni Jehova intedna met dayta ken ti arina iti ima ti Israel, ket kinabilda dayta ken ti tunggal kararua nga adda iti dayta babaen ti tadem ti kampilan. Awan inteddada a makalasat iti dayta. Gapuna inaramidda iti arina kas ti inaramidda iti ari ti Jerico.+
31 Sumaganad ni Josue ken ti intero nga Israel a naikuyog kenkuana limmasatda manipud Libna nga agturong idiay Laquis+ ket nagpakpakarsoda maibusor iti dayta ken nakigubgubatda iti dayta.
32 Gapuna ni Jehova intedna ti Laquis iti ima ti Israel iti kasta kinautiboda dayta iti maikadua nga aldaw, ket kinabilda dayta ken ti tunggal kararua nga adda iti dayta babaen ti tadem ti kampilan,+ maitunos iti amin nga inaramidda iti Libna.
33 Iti daydin a ni Horam nga ari ti Gezer+ simmang-at tapno tumulong iti Laquis. Gapuna isu ken dagiti umilina kinabil ni Josue agingga nga awan inteddana a makalasat a kukuana.+
34 Idin ni Josue ken ti intero nga Israel a naikuyog kenkuana limmasatda manipud Laquis agingga idiay Eglon+ ket nagpakpakarsoda maibusor iti dayta ken nakigubgubatda iti dayta.
35 Ket nakautiboda dayta iti dayta nga aldaw ket rinugianda a kabilen babaen ti tadem ti kampilan, ket iti dayta nga aldaw impaayna ti tunggal kararua nga adda iti dayta iti pannakadadael, maitunos iti amin nga inaramidda iti Laquis.+
36 Idin ni Josue ken ti intero nga Israel a naikuyog kenkuana simmang-atda manipud Eglon agingga iti Hebron+ ket rinugianda ti makigubat iti dayta.
37 Ket nakautiboda dayta ket kinabilda ken ti arina ken amin dagiti ilina ken tunggal kararua nga adda iti dayta babaen ti tadem ti kampilan. Awan inteddana a makalasat, maitunos iti amin nga inaramidna iti Eglon. Iti kasta impaayna dayta ken ti tunggal kararua nga adda iti dayta iti pannakadadael.+
38 Kamaudiananna ni Josue ken ti intero nga Israel a naikuyog kenkuana nagsublida idiay Debir+ ket nangrugida a makigubat iti dayta.
39 Ket nakautibona dayta ken ti arina ken amin dagiti ilina, ket kinabilda ida babaen ti tadem ti kampilan ken impaayna ti tunggal kararua nga adda iti dayta iti pannakadadael.+ Awan inteddana a makalasat.+ Kas iti inaramidna iti Hebron, kasta ti inaramidna iti Debir ken iti arina, ken kas iti inaramidna iti Libna ken iti arina.+
40 Ket ni Josue kinabilna ti intero a daga iti nakabambantay a rehion+ ken ti Negeb+ ken ti Sefela+ ken dagiti darisdis+ ken amin nga ar-arida. Awan inteddana a makalasat, ket tunggal banag a naganges+ impaayna iti pannakadadael,+ kas iti imbilin ni Jehova a Dios ti Israel.+
41 Ket ni Josue kinabilna ida manipud Cades-barnea+ agingga idiay Gaza+ ken iti intero a daga ti Gosen+ ken agingga idiay Gabaon.+
42 Ket ni Josue kinautibona amin dagitoy nga ar-ari ken ti dagada iti maymaysa a tiempo,+ agsipud ta ni Jehova a Dios ti Israel ti makiruprupak maipaay iti Israel.+
43 Kalpasan dayta ni Josue ken ti intero nga Israel a naikuyog kenkuana nagsublida iti pakarso idiay Gilgal.+
