Josue 4:1-24
4 Ket naaramid nga apaman a ti intero a nasion nalpasen a bimmallasiw iti Jordan,+ ni Jehova kinunana ken Josue:
2 “Mangalaka maipaay kadakayo iti sangapulo ket dua a lallaki manipud kadagiti umili, maysa a lalaki manipud iti tunggal tribu,+
3 ket bilinem ida, a kunaem, ‘Iyalaanyo ti bagbagiyo manipud iti mismo a tengnga ti Jordan, manipud iti disso a nagtakderan a di agkutkuti dagiti saka ti papadi,+ iti sangapulo ket dua a bato,+ ket masapul nga itugotyo ida ket ikabilyo ida iti lugar a pagdagusan+ a pagdagusanyonto ita a rabii.’”
4 Iti kasta nangayab ni Josue iti sangapulo ket dua a lallaki+ a dinutokanna manipud iti annak ti Israel, maysa a lalaki manipud iti tunggal tribu;
5 ket kinuna kadakuada ni Josue: “Lumasatkayo nga umun-una ngem iti lakasa ni Jehova a Diosyo nga agturong iti tengnga ti Jordan, ket mangawitkayo maipaay iti bagbagiyo tunggal maysa iti maysa a bato iti abagana, sigun iti bilang dagiti tribu ti annak ti Israel,
6 tapno agserbi daytoy kas maysa a pagilasinan iti tengngayo.+ No kas pagarigan ti annakyo agimtuodda iti umay a tiempo, a kunaenda, ‘Apay nga addaankayo kadagitoy a bato?’+
7 Masapul a kunaenyo met kadakuada, ‘Agsipud ta ti dandanum ti Jordan nagessatda manipud sanguanan ti lakasa ti tulag ni Jehova.+ Idi limmasat dayta iti Jordan nagessat ti dandanum ti Jordan, ket dagitoy a bato agserbidanto kas pakalaglagipan ti annak ti Israel agingga iti tiempo a di nakedngan.’”+
8 Gapuna inaramid ti annak ti Israel ti kasta, kas iti imbilin ni Josue, ket nangalada iti sangapulo ket dua a bato manipud iti tengnga ti Jordan, kas iti sinao ni Jehova ken Josue, tapno maitupag iti bilang dagiti tribu ti annak ti Israel;+ ket intugotda ida iti lugar a pagdagusan+ ket inkabilda ida sadiay.
9 Adda met sangapulo ket dua a bato nga impasdek ni Josue iti tengnga ti Jordan iti disso a nagtakderan+ dagiti saka ti papadi a mangaw-awit iti lakasa ti tulag, ket agtalinaedda sadiay agingga itoy nga aldaw.
10 Ket ti papadi a mangaw-awit iti Lakasa agtaktakderda idi iti tengnga+ ti Jordan agingga a nalpas ti amin a banag nga imbilin ni Jehova ken Josue a sawenna kadagiti umili, sigun iti isuamin nga imbilin ni Moises ken Josue.+ Bayat dayta nagdardaras dagiti umili+ ket bimmallasiwda.
11 Ket naaramid nga apaman nga amin dagiti umili nalpasdan a bimmallasiw, idin ti lakasa+ ni Jehova bimmallasiw, ken ti papadi, iti sanguanan dagiti umili.
12 Ket ti annak ni Ruben ken ti annak ni Gad ken ti kagudua a tribu ni Manases+ bimmallasiwda iti urnos ti pannakibakal+ iti imatang ti annak ti Israel, kas iti sinao kadakuada ni Moises.+
13 Agarup uppat a pulo a ribu a nakabalan a maipaay iti buyot ti bimmallasiw iti sanguanan ni Jehova maipaay iti gubat agingga iti desierto a tantanap ti Jerico.
14 Iti dayta nga aldaw pinagbalin ni Jehova a naindaklan ni Josue iti imatang ti intero nga Israel,+ ket nangrugida nga agbuteng kenkuana kas iti panagbutengda idi ken Moises iti amin nga al-aldaw ti panagbiagna.+
15 Idin ni Jehova kinunana ken Josue:
16 “Bilinem ti papadi a mangaw-awit iti lakasa ti pammaneknek+ a sumang-atda manipud Jordan.”
17 Iti kasta binilin ni Josue ti papadi, a kunkunana: “Sumang-atkayo manipud Jordan.”
18 Ket naaramid nga idi a ti papadi a mangaw-awit iti lakasa+ ti tulag ni Jehova simmang-atda manipud tengnga ti Jordan ket dagiti dapan+ ti saksaka ti papadi nayaonda iti namaga a daga, iti kasta ti dandanum ti Jordan nangrugida a nagsubli iti lugarda ket nagliplippiasda+ iti amin nga ig-igidna kas iti sigud.
19 Ket dagiti umili simmang-atda manipud Jordan iti maikasangapulo ti umuna a bulan ket nagpakarsoda idiay Gilgal+ iti makindaya a ketegan ti Jerico.
20 No maipapan iti sangapulo ket dua a bato nga innalada iti Jordan, impasdek ni Josue dagitoy idiay Gilgal.+
21 Ket kinunana iti annak ti Israel: “Inton ti annakyo imtuodenda kadagiti ammada iti umay a tiempo, a kunaenda, ‘Ania ti kaipapanan dagitoy a bato?’+
22 Masapul nga ipakaammoyo iti annakyo, a kunaenyo, ‘Iti namaga a daga a ti Israel binallasiwna daytoy Jordan,+
23 idi a ni Jehova a Diosyo pinagmagana ti dandanum ti Jordan manipud sanguananda agingga a nakaballasiwda, kas iti inaramid ni Jehova a Diosyo iti Nalabaga a Baybay idi pinagmagana dayta manipud sanguananmi agingga a nakaballasiwkami;+
24 tapno amin dagiti ili iti daga maammuanda ti ima ni Jehova,+ a napigsa dayta;+ tapno pudno nga agbutengkayo koma a kanayon ken Jehova a Diosyo.’”+
