Josue 6:1-27
6 Ita siiirut a narikpan ti Jerico gapu iti annak ti Israel, nga awan ti rumrummuar ken awan ti sumsumrek.+
2 Ket ni Jehova kinunana ken Josue: “Kitaem, intedko ti Jerico ken ti arina, ti mamaingel a nabileg a lallaki, ita imam.+
3 Ket dakayo amin a lallaki ti gubat masapul nga agmartsakayo iti likmut ti siudad, a likmutenyo ti siudad iti maminsan. Kasta ti rebbeng nga aramidenyo iti innem nga aldaw.
4 Ket pito a padi ti agawit iti pito a tangguyob a sara dagiti kalakian a karnero, iti sanguanan ti Lakasa, ket iti maikapito nga aldaw agmartsakayo iti likmut ti siudad iti pito a daras ket ti papadi puyotenda dagiti tangguyob.+
5 Ket mapasamakto nga inton agpagunida babaen iti tangguyob a sara ti kalakian a karnero, inton mangngegyo ti uni ti tangguyob, amin dagiti tattao iriawda iti dakkel nga ikkis ti gubat;+ ket ti pader ti siudad marbanto a malantag,+ ket sumang-atto dagiti umili, tunggal maysa nga agtartarus iti sanguananna.”
6 Iti kasta ni Josue nga anak ni Nun inayabanna ti papadi+ ket kinunana kadakuada: “Alaenyo ti lakasa ti tulag,+ ket ti pito a padi mangawitda iti pito a tangguyob a sara dagiti kalakian a karnero iti sanguanan ti lakasa+ ni Jehova.”
7 Ket kinunana kadagiti umili: “Lumasatkayo ken agmartsakayo iti likmut ti siudad, ket ti puersa a nakabalan a makigubat+ lumasat koma nga umun-una ngem iti lakasa ni Jehova.”
8 Iti kasta naaramid kas iti kinuna ni Josue kadagiti umili; ket limmasat ti pito a padi a mangaw-awit iti pito a tangguyob a sara dagiti kalakian a karnero iti sanguanan ni Jehova ket pinuyotda dagiti tangguyob, ket ti lakasa ti tulag ni Jehova sumarsaruno kadakuada.
9 Ket ti puersa a nakabalan a makigubat immun-unada ngem iti papadi a mangpuypuyot kadagiti tangguyob, bayat a ti guardia iti likudan+ sumarsaruno idi iti Lakasa buyogen ti agtultuloy a panangpuyot kadagiti tangguyob.
10 Ita binilin ni Josue dagiti umili,+ a kunkunana: “Dikay agpukkaw ket saan met koma a mangngeg dagiti timekyo, ket awan koma ti sao a rummuar kadagiti ngiwatyo agingga iti aldaw a kunaek kadakayo, ‘Agpukkawkayo!’ Iti kasta masapul nga agpukkawkayo.”+
11 Ket pinaimartsana ti lakasa ni Jehova iti likmut ti siudad, a linikmutda iti naminsan, kalpasanna napanda iti pakarso ket nagyanda iti agpatnag idiay pakarso.
12 Idin ni Josue bimmangon a nasapa iti bigat,+ ket ti papadi napanda a siaawit iti lakasa+ ni Jehova,
13 ket ti pito a padi a siaawit iti pito a tangguyob a sara dagiti kalakian a karnero iti sanguanan ti lakasa ni Jehova magmagnada, nga agtultuloy a puypuyotenda dagiti tangguyob, ket ti puersa a nakabalan a makigubat magmagna nga immun-una kadakuada, bayat a ti guardia iti likudan sumarsaruno idi iti lakasa ni Jehova buyogen iti agtultuloy a panangpuyot kadagiti tangguyob.+
14 Ket nagmarmartsada iti likmut ti siudad iti maikadua nga aldaw iti maminsan, kalpasanna nagsublida iti pakarso. Kasta ti inaramidda iti innem nga aldaw.+
15 Ket naaramid iti maikapito nga aldaw a bimmangonda a nasapa, apaman a nagbannawag, ket nagmarmartsada iti likmut ti siudad iti kastoy a pamay-an iti pito a daras. Iti dayta laeng nga aldaw nagmartsada iti likmut ti siudad iti pito a daras.+
16 Ket naaramid iti maikapito a daras a ti papadi pinuyotda dagiti tangguyob, ket kinuna ni Josue kadagiti umili: “Agpukkawkayo;+ ta ni Jehova intedna kadakayo ti siudad.+
17 Ket ti siudad agbalinto a banag a naikeddeng iti pannakadadael;+ dayta agraman ti isuamin nga adda iti dayta ket kukua ni Jehova. Ni laeng Rahab+ a balangkantis ti makapagtultuloy nga agbiag, isu ken dagiti amin a kaduana iti balay, agsipud ta inlemmengna dagiti mensahero nga imbaontayo.+
18 No maipapan kadakayo, isuna laeng ta umadayokayo iti banag a naikeddeng iti pannakadadael,+ amangan no agtarigagaykayo+ ket mangalakayo iti sumagmamano iti banag a naikeddeng iti pannakadadael+ ket aramidenyo ti pakarso ti Israel a maysa a banag a naikeddeng iti pannakadadael ket iyegyo ti pannakailaksid iti dayta.+
19 Ngem ti isuamin a pirak ken balitok ken dagiti aruaten a gambang ken landok nasantuanda a banag ken Jehova.+ Rebbeng a maipan iti gameng ni Jehova.”+
20 Idin nagriaw dagiti umili, idi pinuyotda dagiti tangguyob.+ Ket naaramid nga apaman a nangngeg dagiti umili ti uni ti tangguyob ket rinugian dagiti umili nga iriaw ti maysa a dakkel nga ikkis ti gubat, idin ti pader nangrugi a marba a malantag.+ Kalpasan dayta dagiti umili simmang-atda iti siudad, tunggal maysa nga agtartarus iti sanguananna, ket kinautiboda ti siudad.
21 Ket ti isuamin nga adda iti siudad, manipud lalaki agingga iti babai, manipud agtutubo a lalaki agingga iti lakay ken agingga iti toro ken karnero ken asno, impaayda iti pannakadadael babaen ti tadem ti kampilan.+
22 Ket iti dua a lallaki a nagsimisim iti daga, kinuna ni Josue: “Sumrekkayo iti balay ti babai, ti balangkantis, ket iruaryo manipud sadiay ti babai ken amin a kukuana, kas iti insapatayo kenkuana.”+
23 Iti kasta simrek dagiti agtutubo a lallaki a nagsimisim ket inruarda ni Rahab ken ti amana ken ti inana ken ti kakabsatna ken amin a kukuana, wen, isuamin a kabagian ti pamiliana inruarda;+ ket inkabilda ida iti ruar ti pakarso ti Israel.
24 Ket ti siudad pinuoranda iti apuy ken ti isuamin nga adda iti dayta.+ Ti laeng pirak ken balitok ken dagiti aruaten a gambang ken landok ti intedda iti gameng iti balay ni Jehova.+
25 Ket ni Rahab a balangkantis ken ti sangakabbalayan ni amana ken amin a kukuana, tinaginayon ni Josue a sibibiag;+ ket isu agnanaed iti tengnga ti Israel agingga itoy nga aldaw,+ agsipud ta inlemmengna dagiti mensahero nga imbaon ni Josue a mangsimisim iti Jerico.+
26 Idin pinaisawang ni Josue ti maysa a sapata iti dayta met laeng a tiempo, a kunkunana: “Mailunod koma iti sanguanan ni Jehova ti tao a tumakder ket ibangonna daytoy a siudad, ti mismo a Jerico. Iti panangisaadna iti pamuonna mapukawna koma ti inaunana, ket iti panangibangonna kadagiti ruanganna mapukawna koma ti inaudina.”+
27 Iti kasta ni Jehova adda idi ken Josue,+ ket ti panagdindinamagna nagsaknap iti intero a daga.+
