2 Ar-ari 3:1-27
3 No maipapan ken Jehoram+ nga anak ni Acab, nagbalin nga ari iti Israel idiay Samaria iti maikasangapulo ket walo a tawen ni Jehosafat nga ari ti Juda, ket nagtultuloy nga agturay iti sangapulo ket dua a tawen.
2 Ket inar-aramidna no ania ti dakes kadagiti mata ni Jehova,+ isuna laeng ta saan a kas ken amana+ wenno kas ken inana, no di ket inikkatna ti sagrado a munmon+ ni Baal nga inaramid ni amana.+
3 Isuna laeng ta kimpet kadagiti basol ni Jeroboam+ nga anak ni Nebat, a kadagita a napagbasolna ti Israel.+ Saan a simmina kadakuada.
4 No maipapan ken Mesa+ nga ari ti Moab, nagbalin nga agtartaraken iti karnero, ket nangibayad iti ari ti Israel iti sangagasut a ribu a kordero ken sangagasut a ribu a di napukisan a kalakian a karnero.
5 Ket naaramid nga apaman a natay ni Acab,+ nangrugi nga umalsa ti ari ti Moab+ maibusor iti ari ti Israel.
6 Iti kasta rimmuar ni Ari Jehoram iti dayta nga aldaw manipud Samaria ket inurnongna+ ti intero nga Israel.
7 Napan iti ad-adayo pay ket ita nagbaon ken Jehosafat nga ari ti Juda, a kunkunana: “Ti met laeng ari ti Moab immalsa maibusor kaniak. Kumuyogkanto kadi kaniak a mapan iti Moab iti gubat?” Iti daytoy kinunana: “Kumuyogakto.+ Siak ket kasla met laeng kenka; ti ilik ket kasla met laeng iti ilim;+ dagiti kabaliok ket kasla met laeng kadagiti kabaliom.”
8 Ket kinunana: “Iti ania a mismo a dalan ti sumang-atantayo?” Gapuna kinunana: “Iti dalan ti let-ang ti Edom.”+
9 Ket napan ti ari ti Israel ken ti ari ti Juda ken ti ari ti Edom,+ ket nagtultuloyda a napan a naglikmut iti pito nga aldaw, ket awan idi ti danum maipaay iti pakarso ken maipaay kadagiti naamo nga animal a sumursurot kadagiti addangda.
10 Idi agangay kinuna ti ari ti Israel: “Anian a nagdakes a kalak-aman nga inayaban ni Jehova dagitoy tallo nga ari tapno iyawatna ida iti ima ti Moab!”+
11 Iti kasta kinuna ni Jehosafat:+ “Awan aya ditoy ti maysa a mammadto ni Jehova?+ No kasta agimtuodtayo koma ken Jehova babaen kenkuana.”+ Gapuna simmungbat ti maysa kadagiti adipen ti ari ti Israel ket kinunana: “Adda ditoy ni Eliseo+ nga anak ni Safat, a nangibukbok iti danum iti im-ima ni Elias.”+
12 Idin kinuna ni Jehosafat: “Adda kenkuana ti sao ni Jehova.” Iti kasta simmalog a napan kenkuana ti ari ti Israel ken ni Jehosafat ken ti ari ti Edom.
13 Ket kinuna ni Eliseo iti ari ti Israel: “Ania ti bibiangko kenka?+ Mapanka kadagiti mammadto+ ni amam ken kadagiti mammadto ni inam.” Ngem kinuna kenkuana ti ari ti Israel: “Saan, ta inayaban ni Jehova dagitoy tallo nga ari tapno itedna ida iti ima ti Moab.”+
14 Iti daytoy kinuna ni Eliseo: “Kas sibibiag ni Jehova ti buybuyot nga iti sanguananna agtakderak,+ no saan koma a ti rupa ni Jehosafat nga ari ti Juda nga iti dayta addaanak iti konsiderasion,+ saanka nga imatangan wenno kitaen.+
15 Ket ita iyegandak iti tumutokar iti pagtokar nga adda kuerdasna.”+ Ket napasamak nga, apaman a nagtokar ti tumutokar iti pagtokar nga adda kuerdasna, naadda kenkuana ti ima+ ni Jehova.
16 Ket kinunana: “Daytoy ti kinuna ni Jehova, ‘Daytoy naapres a ginget mapagbalin koma nga aduan banawang;+
17 ta daytoy ti kinuna ni Jehova: “Saankayto a makakita iti angin, ket saankayto a makakita iti bayakabak; nupay kasta dayta a naapres a ginget mapnonto iti danum,+ ket sigurado nga uminumkayto iti dayta,+ dakayo ken dagiti dinguenyo ken ti naamo nga an-animalyo.”’
18 Ket pudno a nanumonto a banag daytoy kadagiti mata ni Jehova,+ ket sigurado nga iyawatnanto ti Moab iti imayo.+
19 Ket masapul a kabilenyo ti tunggal nasarikedkedan a siudad+ ken tunggal napili a siudad, ket ti tunggal nasayaat+ a kayo rebbeng a tuangenyo,+ ket amin dagiti ubbog ti danum rebbeng a pasardengenyo, ket tunggal nasayaat a benneg ti daga rebbeng a dadaelenyo iti batbato.”
20 Ket naaramid iti bigat,+ iti tiempo ti pannakaisang-at ti daton a bukbukel,+ nga, adtoy! ti danum um-umay idi manipud iti turong ti Edom, ket ti daga napno iti danum.
21 No maipapan kadagiti amin a Moabita, nangngegda a simmang-at ti ar-ari tapno makirupakda kadakuada. Iti kasta nangayabda nga agsangsangkamaysa iti lallaki manipud kadagiti isuamin nga agbarikes+ iti sinturon ken agpangato, ket nangrugida a nagtakder idiay beddeng.
22 Idi bimmangonda a nasapa iti bigat, ti met laeng init sinilnaganna ti danum, iti kasta dagiti Moabita manipud iti bangir a dasig nakitada ti danum a nalabaga a kasla dara.
23 Ket rinugianda a kunaen: “Dara daytoy! Ti ar-ari di pagduaduaan a napapatayda iti kampilan, ket kinabilda ti maysa ken maysa. Gapuna ita, iti panagsamsam,+ O Moab!”
24 Idi dimtengda iti pakarso ti Israel, dagus a timmakder dagiti Israelita+ ket rinugianda a kinabil dagiti Moabita iti kasta nagtalawda iti sanguananda.+ Gapuna dimtengda idiay Moab, a kinabilda dagiti Moabita bayat ti idadatengda.
25 Ket rinebbada dagiti siudad,+ ket, no maipapan iti tunggal nasayaat a benneg ti daga, ipuruakda tunggal maysa ti batona ket pudno a punnuenda dayta; ket ti tunggal ubbog ti danum pasardengenda,+ ket ti tunggal nasayaat a kayo tuangenda,+ agingga a dagiti laeng bato ti Kir-hareset+ ti imbatida iti dayta; ket dagiti pumapallatibong rinugianda a linikmut ken kinabil dayta.
26 Idi a nakita ti ari ti Moab a ti bakal napigsa unay idi maipaay kenkuana, dagus a nangikuyog iti pito gasut a lallaki nga agasut iti kampilan tapno sumarakusok a mapan iti ari ti Edom;+ ngem saanda a nabaelan.
27 Kamaudiananna innalana ti inauna nga anakna nga agturay idi a mangsandi kenkuana ket indatonna+ kas mapuoran a sakripisio iti rabaw ti pader. Ket adda dakkel a rurod maibusor iti Israel, iti kasta pimmanawda manipud ibubusor kenkuana ket nagsublida iti dagada.
