2 Ar-ari 24:1-20
24 Idi kaaldawanna simmang-at ni Nabucodonosor+ nga ari ti Babilonia, ket iti kasta nagbalin nga adipenna+ ni Jehoiaquim iti tallo a tawen. Nupay kasta, timmallikud ket nagrebelde kenkuana.
2 Ket rinugian ni Jehova ti mangibaon maibusor kenkuana kadagiti tulisan a buyot dagiti Caldeo+ ken kadagiti tulisan a buyot dagiti Sirio ken kadagiti tulisan a buyot dagiti Moabita+ ken kadagiti tulisan a buyot ti annak ni Ammon, ket intultuloyna nga imbaon ida maibusor iti Juda tapno dadaelenda dayta, maitunos iti sao ni Jehova+ a sinaona babaen kadagiti adipenna a mammadto.
3 Babaen laeng iti bilin ni Jehova a napasamak dayta maibusor iti Juda, tapno ikkatenna+ iti imatangna gapu kadagiti basol ni Manases,+ maitunos iti amin nga inaramidna;
4 ken kasta met gapu iti awanan basol a dara+ nga imbukbokna, iti kasta pinunnona ti Jerusalem iti awanan basol a dara, ket ni Jehova saan nga immannugot a mangipaay iti pammakawan.+
5 No maipapan iti dadduma pay kadagiti pasamak ni Jehoiaquim+ ken amin nga inaramidna, saanda aya a naisurat iti libro+ dagiti pasamak iti al-aldaw ti ar-ari ti Juda?
6 Kamaudiananna nakikaidda ni Jehoiaquim kadagidi ammana,+ ket ni Jehoiaquin nga anakna nangrugi nga agturay a mangsandi kenkuana.
7 Ket saanen a pulos+ rimmuar ti ari ti Egipto manipud iti dagana,+ ta ti ari ti Babilonia innalana ti amin a kukua idi ti ari ti Egipto+ manipud iti naapres a ginget+ ti Egipto agingga idiay karayan Eufrates.+
8 Sangapulo ket walo ti tawen ni Jehoiaquin+ idi nangrugi nga agturay, ket iti tallo a bulan nagturay idiay Jerusalem.+ Ket ti nagan ti inana Nehusta nga anak ni Elnatan ti Jerusalem.
9 Ket intuloyna nga aramiden no ania ti dakes kadagiti mata ni Jehova, maitunos iti amin nga inaramid ni amana.+
10 Bayat dayta a tiempo simmang-at idiay Jerusalem dagiti adipen ni Nabucodonosor nga ari ti Babilonia, iti kasta ti siudad naadda iti pannakalakub.+
11 Ket ni Nabucodonosor nga ari ti Babilonia immay a bumusor iti siudad, bayat a manglaklakub idi dagiti adipenna maibusor iti dayta.+
12 Idi agangay ni Jehoiaquin nga ari ti Juda rimmuar a napan iti ari ti Babilonia,+ isu agraman ni inana+ ken dagiti adipenna ken dagiti prinsipena ken dagiti opisialna ti palasio; ket isu innala ti ari ti Babilonia iti maikawalo+ a tawen ti panagarina.
13 Kalpasanna inruarna manipud sadiay dagiti amin a gameng ti balay ni Jehova ken dagiti gameng ti balay ti ari,+ ket pinutedputedna amin dagiti aruaten a balitok+ nga inaramid ni Solomon nga ari ti Israel idiay templo ni Jehova, kas iti sinao ni Jehova.
14 Ket indestierona+ ti isuamin a Jerusalem ken dagiti amin a prinsipe+ ken dagiti amin a maingel, nabileg+ a lallaki—sangapulo a ribu ti indestierona—ken kasta met ti tunggal nasigo a trabahador+ ken managibangon kadagiti baluarte. Awan ti asinoman a nabati malaksid ti klase nanumo+ kadagiti umili ti daga.
15 Gapuna indestierona ni Jehoiaquin+ idiay Babilonia;+ ket ti ina ti ari+ ken ti assawa ti ari ken dagiti opisialna ti palasio+ ken dagiti kangrunaan a lallaki ti daga impanawna kas naidestiero a tattao manipud Jerusalem agingga idiay Babilonia.
16 No maipapan kadagiti amin a maingel a lallaki, pito ribu, ken kadagiti nasigo a trabahador ken kadagiti managibangon iti balbaluarte, sangaribu, amin a nabileg a lallaki a makigubgubat, ti ari ti Babilonia impanna ida kas naidestiero a tattao idiay Babilonia.+
17 Kanayonanna, ti ari ti Babilonia+ pinagbalinna nga ari ni Matanias nga ulitegna+ a mangsandi kenkuana. Kalpasanna sinukatanna ti naganna iti Zedekias.+
18 Duapulo ket maysa ti tawen ni Zedekias+ idi nangrugi nga agturay, ket iti sangapulo ket maysa a tawen nagturay idiay Jerusalem. Ket ti nagan ti inana Hamutal+ nga anak ni Jeremias manipud Libna.
19 Ket intuloyna nga aramiden no ania ti dakes kadagiti mata ni Jehova, maitunos iti amin nga inaramid ni Jehoiaquim.+
20 Ta maigapu iti unget+ ni Jehova napasamak dayta idiay Jerusalem ken idiay Juda, agingga a napagtalawna ida iti imatangna.+ Ket ni Zedekias nangrugi nga agrebelde iti ari ti Babilonia.+
