2 Ar-ari 11:1-21
11 Ita no maipapan ken Athalia+ nga ina ni Ocozias,+ nakitana a natayen ti anakna. Gapuna timmakder ket dinadaelna ti isuamin a putot ti pagarian.+
2 Nupay kasta, ni Jehoseba+ nga anak a babai ni Ari Jehoram, ti kabsat a babai ni Ocozias, innalana ni Jehoas+ nga anak ni Ocozias ket inlibasna manipud iti annak ti ari a mapapatay koma idi, isu a mismo ken ti manangtagibina a babai, nga inserrekna iti makin-uneg a siled nga ayan dagiti sopa, ket pinagtalinaedda a silelemmeng+ manipud iti rupa ni Athalia, ket saan a napapatay.
3 Ket nagtalinaed a kaduana nga aglemlemmeng iti balay ni Jehova iti innem a tawen, bayat a ni Athalia agturturay idi iti daga.+
4 Ket iti maikapito a tawen nagbaon ni Jehoiada+ ket kalpasanna innalana dagiti panguluen ti ginasut dagiti Cariano+ a para-guardia ken dagiti tumataray+ ket inyegna ida kenkuana iti balay ni Jehova ket namatalged kadakuada iti maysa a tulag+ ket pinagsapatana+ ida iti balay ni Jehova, a kalpasan dayta impakitana kadakuada ti anak ti ari.
5 Ket binilinna ida, a kunkunana: “Daytoy ti banag nga aramidenyonto: Kakatlo kadakayo ti sumrek iti sabbath ken siiinget nga agbantay iti balay ti ari;+
6 ket kakatlo ti addanto iti Ruangan+ ti Pamuon, ket kakatlo ti addanto idiay ruangan iti likudan dagiti tumataray; ket ti balay masapul a siiinget a bantayanyo+ nga agsisinnublat.
7 Ket adda dua a benneg kadakayo a rummuar amin iti sabbath, ket masapul a siiinget a bantayanda ti balay ni Jehova maigapu iti ari.
8 Ket masapul a lakubenyo ti ari iti intero nga aglikmut, tunggal maysa a dagiti igamna adda iti imana; ket ti asinoman a sumrek iti uneg dagiti intar mapapatayto. Ket agtultuloykayo a kumuyog iti ari no rummuar ken no sumrek.”
9 Ket dagiti panguluen ti ginasut+ inaramidda ti maitunos iti amin nga imbilin ni Jehoiada a padi. Gapuna innalada tunggal maysa dagiti lallakina a sumsumrek idi iti sabbath,+ agraman dagidiay rumrummuar iti sabbath, ket kalpasanna immayda ken Jehoiada a padi.
10 Ti padi intedna ita kadagiti panguluen ti ginasut dagiti pika ken dagiti nagsirkulo a kalasag a kukua idi ni Ari David, nga adda iti balay ni Jehova.+
11 Ket nagtalinaed a sitatakder dagiti tumataray+ tunggal maysa a dagiti igamna adda iti imana, manipud iti makannawan a sikigan ti balay agingga iti makannigid a sikigan ti balay, iti sibay ti altar+ ken iti sibay ti balay, iti intero nga aglikmut iti asideg ti ari.
12 Idin inruarna ti anak+ ti ari ket insaadna kenkuana ti balangat+ ken ti Pammaneknek;+ ket ngarud isu pinagbalinda nga ari+ ket pinulotanda.+ Ket rinugianda a pagtipaten dagiti imada+ ket kinunada: “Agbiag koma ti ari!”+
13 Idi nangngeg ni Athalia ti daranudor dagiti umili nga agtataray, dagus a napan kadagiti umili idiay balay ni Jehova.+
14 Idin kimmita, ket sadiay sitatakder ti ari iti sibay ti adigi+ maitunos iti kaugalian, ken dagiti panguluen ken dagiti trumpeta+ iti sibay ti ari, ken amin dagiti umili ti daga nga agragrag-o+ ken mangpuypuyot kadagiti trumpeta. Dagus a rinay-ab ni Athalia+ dagiti kawesna ket rinugianna nga inyikkis: “Kumplot! Kumplot!”+
15 Ngem ni Jehoiada a padi binilinna dagiti panguluen ti ginasut, dagidiay nadutokan iti puersa militar,+ ket kinunana kadakuada: “Iruaryo manipud uneg dagiti intar, ket, no maipapan iti asinoman a sumurot kenkuana, maipakat koma ti ipapatay babaen ti kampilan!”+ Ta kinuna ti padi: “Dikay bay-an a mapapatay iti balay ni Jehova.”
16 Gapuna impatayda kenkuana dagiti imada ket immay a dimmalan iti serkan ti kabalio+ iti balay ti ari,+ ket napapatay sadiay.+
17 Idin pinatalgedan ni Jehoiada ti tulag+ iti nagbaetan ni Jehova+ ken ti ari+ ken dagiti umili, a paneknekanda koma ti bagbagida nga ili ni Jehova; ken kasta met iti nagbaetan ti ari ken dagiti umili.+
18 Kalpasan dayta immay dagiti amin nga umili ti daga iti balay ni Baal ket rinugpoda dagiti altarna;+ ket naan-anay a rinumekda dagiti ladawanna,+ ket pinapatayda ni Mattan+ a padi ni Baal iti sanguanan dagiti altar.+
Ket ti padi nangisaad kadagiti manangaywan iti balay ni Jehova.+
19 Kanayonanna, innalana dagiti panguluen ti ginasut ken dagiti Cariano+ a para-guardia ken dagiti tumataray+ ken amin dagiti umili ti daga, tapno maibabada ti ari manipud iti balay ni Jehova; ket nagin-inut nga immayda a dimmalan iti ruangan+ dagiti tumataray nga agturong iti balay ti ari; ket nangrugi nga agtugaw iti trono+ ti ar-ari.
20 Ket amin dagiti umili ti daga nagtultuloyda nga agrag-o;+ ket ti siudad, iti biangna, awanan pannakasinga idi, ket ni met laeng Athalia pinapatayda babaen ti kampilan iti balay ti ari.+
21 Pito ti tawen ni Jehoas+ idi nangrugi nga agturay.+
