2 Ar-ari 15:1-38
15 Iti maikaduapulo ket pito a tawen ni Jeroboam nga ari ti Israel, ni Azarias+ nga anak ni Amazias+ nga ari ti Juda nagbalin nga ari.
2 Sangapulo ket innem ti tawenna idi nangrugi nga agturay, ket iti limapulo ket dua a tawen nagturay idiay Jerusalem.+ Ket ti nagan ti inana Jecolia ti Jerusalem.
3 Ket intuloyna nga aramiden no ania ti nalinteg kadagiti mata ni Jehova, maitunos iti amin nga inaramid ni Amazias nga amana.+
4 Isuna laeng ta saan a nagpukaw dagiti nangato a disso.+ Agisaksakripisio pay laeng idi dagiti umili ken mangpatpataud iti asuk a sakripisio kadagiti nangato a disso.+
5 Kamaudiananna ni Jehova sinaplitna ti ari,+ ket nagtalinaed a maysa nga agkukutel+ agingga iti aldaw ti ipapatayna, ket nagnanaed iti balayna a nailaksid kadagiti annongen,+ bayat a ni Jotam+ nga anak ti ari ti namangulo iti balay, nga uk-ukomenna+ dagiti umili ti daga.
6 No maipapan iti dadduma pay kadagiti pasamak ni Azarias ken amin nga inaramidna, saanda aya a naisurat iti libro+ dagiti pasamak iti al-aldaw ti ar-ari ti Juda?
7 Idi agangay nakikaidda ni Azarias kadagidi ammana,+ ket intabonda a kadua dagidi ammana idiay Siudad ni David; ket ni Jotam nga anakna nangrugi nga agturay a mangsandi kenkuana.+
8 Iti maikatallopulo ket walo a tawen ni Azarias+ nga ari ti Juda, ni Zacarias+ nga anak ni Jeroboam nagbalin nga ari iti Israel idiay Samaria iti innem a bulan.
9 Ket inaramidna no ania ti dakes kadagiti mata ni Jehova, kas iti inaramid dagidi ammana.+ Saan a simmina kadagiti basol ni Jeroboam+ nga anak ni Nebat, a kadagita a napagbasolna ti Israel.+
10 Idin ni Sallum nga anak ni Jabes nakikumplot+ maibusor kenkuana ket isu kinabilna+ idiay Ibleam+ ket pinapatayna ket nangrugi nga agturay a mangsandi kenkuana.
11 No maipapan iti dadduma pay kadagiti pasamak ni Zacarias, sadiay naisuratda iti libro+ dagiti pasamak iti al-aldaw ti ar-ari ti Israel.
12 Dayta ti sao ni Jehova+ a sinaona ken Jehu, a kunkunana:+ “Ti met laeng annak+ agingga iti maikapat a kaputotan agtugawdanto maipaay kenka iti trono ti Israel.” Ket naaramid a kasta.+
13 No maipapan ken Sallum nga anak ni Jabes, nagbalin nga ari idi maikatallopulo ket siam a tawen ni Ozias+ nga ari ti Juda, ket nagtultuloy nga agturay iti intero a maysa a lunar a bulan idiay Samaria.+
14 Idin ni Menahem+ nga anak ni Gadi simmang-at manipud Tirza+ ket dimteng idiay Samaria ket kinabilna ni Sallum+ nga anak ni Jabes idiay Samaria ket pinapatayna; ket nangrugi nga agturay a mangsandi kenkuana.
15 No maipapan iti dadduma pay kadagiti pasamak ni Sallum ken ti kumplotna+ a nakikumplotanna, sadiay naisuratda iti libro dagiti pasamak iti al-aldaw ti ar-ari ti Israel.
16 Iti daydin a ni Menahem kinabilna ti Tifsa ken isuamin nga adda iti dayta ken ti teritoriana iti ruar manipud Tirza, agsipud ta saan a naglukat dayta, ket kinabilna dayta. Ginisaygisayna dagiti amin a masikog a babbai iti dayta.+
17 Iti maikatallopulo ket siam+ a tawen ni Azarias nga ari ti Juda, ni Menahem nga anak ni Gadi nagbalin nga ari iti Israel iti sangapulo a tawen idiay Samaria.
18 Ket intuloyna nga aramiden no ania ti dakes kadagiti mata ni Jehova.+ Saan a simmina kadagiti amin a basol ni Jeroboam+ nga anak ni Nebat, a kadagita a napagbasolna ti Israel,+ iti amin nga al-aldawna.
19 Ni Pul+ nga ari ti Asiria+ immay iti daga. Iti kasta ni Menahem inikkanna+ ni Pul iti sangaribu a talento a pirak,+ tapno maadda kenkuana dagiti imana tapno papigsaenna ti pagarian iti bukodna nga ima.+
20 Gapuna inruar ni Menahem ti pirak a gastos ti Israel, a gastos dagiti amin a maingel, nabileg a lallaki,+ tapno mangited iti ari ti Asiria iti limapulo a siklo a pirak maipaay iti tunggal lalaki. Iti kasta nagsubli ti ari ti Asiria, ket saan a nagyan idiay a daga.
21 No maipapan iti dadduma pay kadagiti pasamak ni Menahem+ ken amin nga inaramidna, saanda aya a naisurat iti libro+ dagiti pasamak iti al-aldaw ti ar-ari ti Israel?
22 Kamaudiananna nakikaidda ni Menahem kadagidi ammana, ket ni Pekaias+ nga anakna nangrugi nga agturay a mangsandi kenkuana.
23 Iti maikalimapulo a tawen ni Azarias nga ari ti Juda, ni Pekaias nga anak ni Menahem nagbalin nga ari iti Israel idiay Samaria iti dua+ a tawen.
24 Ket intuloyna nga aramiden no ania ti dakes kadagiti mata ni Jehova.+ Saan a simmina kadagiti basol ni Jeroboam+ nga anak ni Nebat, a kadagita a napagbasolna ti Israel.+
25 Idin ni Peca+ nga anak ni Remalias nga ayudantena+ nakikumplot+ maibusor kenkuana ket isu kinabilna idiay Samaria iti pagnaedan a torre ti balay ti ari+ a kaduana da Argob ken Arieh, ken adda a naikuyog kenkuana ti limapulo a lallaki iti annak ti Galaad. Gapuna isu pinapatayna ket nangrugi nga agturay a mangsandi kenkuana.
26 No maipapan iti dadduma pay kadagiti pasamak ni Pekaias ken amin nga inaramidna, sadiay naisuratda iti libro+ dagiti pasamak iti al-aldaw ti ar-ari ti Israel.
27 Iti maikalimapulo ket dua a tawen ni Azarias nga ari ti Juda, ni Peca+ nga anak ni Remalias+ nagbalin nga ari iti Israel idiay Samaria iti duapulo a tawen.
28 Ket intuloyna nga aramiden no ania ti dakes kadagiti mata ni Jehova.+ Saan a simmina kadagiti basol ni Jeroboam+ nga anak ni Nebat, a kadagita a napagbasolna ti Israel.+
29 Idi kaaldawan ni Peca nga ari ti Israel, immay ni Tiglat-pileser+ nga ari ti Asiria+ ket innalana ti Ijon+ ken ti Abel-bet-maaca+ ken ti Janoa ken ti Kedes+ ken ti Hasor+ ken ti Galaad+ ken ti Galilea,+ ti intero a daga ti Neftali,+ ket impanna ida iti pannakaidestiero idiay Asiria.+
30 Kamaudiananna ni Hosea+ nga anak ni Elah nangbukel iti kumplot+ maibusor ken Peca nga anak ni Remalias ket isu kinabilna+ ken pinapatayna; ket nangrugi nga agturay a mangsandi kenkuana iti maikaduapulo a tawen ni Jotam+ nga anak ni Ozias.
31 No maipapan iti dadduma pay kadagiti pasamak ni Peca ken amin nga inaramidna, sadiay naisuratda iti libro+ dagiti pasamak iti al-aldaw ti ar-ari ti Israel.
32 Iti maikadua a tawen ni Peca nga anak ni Remalias nga ari ti Israel, ni Jotam+ nga anak ni Ozias+ nga ari ti Juda nagbalin nga ari.
33 Duapulo ket lima ti tawenna idi nangrugi nga agturay, ket iti sangapulo ket innem a tawen nagturay idiay Jerusalem. Ket ti nagan ti inana Jerusa nga anak ni Sadok.+
34 Ket intuloyna nga aramiden no ania ti umiso kadagiti mata ni Jehova.+ Maitunos iti amin nga inaramid ni Ozias nga amana, inaramidna.+
35 Isuna laeng ta saan a nagpukaw dagiti nangato a disso. Agisaksakripisio pay laeng idi dagiti umili ken mangpatpataud iti asuk a sakripisio kadagiti nangato a disso.+ Isu ti nangbangon iti makinngato a ruangan ti balay ni Jehova.+
36 No maipapan iti dadduma pay kadagiti pasamak ni Jotam, ti inaramidna, saanda aya a naisurat iti libro dagiti pasamak iti al-aldaw ti ar-ari ti Juda?+
37 Kadagidiay nga aldaw rinugian ni Jehova nga ibaon+ maibusor iti Juda ni Rezin+ nga ari ti Siria ken ni Peca+ nga anak ni Remalias.
38 Kamaudiananna nakikaidda ni Jotam kadagidi ammana ket naitabon a kadua dagidi ammana idiay Siudad ni David nga amana;+ ket ni Acaz+ nga anakna nangrugi nga agturay a mangsandi kenkuana.
