Delphine anyị kwuru gbasara ya n’isiokwu bu nke a ụzọ, chọpụtara na ichegbu onwe ya gbasara nsogbu ndị o nwere na-eme ka ọ na-aṅụ oké mmanya. Baịbụl akagbughị ịṅụ mmanya. Ma, ọ sịrị: “Anọla n’etiti ndị na-aṅụ oké mmanya.” (Ilu 23:20) A chọpụtala na ịṅụbiga mmanya ókè na-akpata ọrịa ndị dị ezigbo njọ, na-akpata esemokwu, na-emekwa ka ọtụtụ nde mmadụ na-anwụchu ọnwụ kwa afọ. Mmadụ ga-ezereli ọtụtụ nsogbu ndị a ma ọ na-eme ihe Baịbụl kwuru.

Delphine zeere nsogbu ndị ahụ. Ọ sịrị: “Achọpụtala m na ịṅụ mmanya anaghị eme ka m kwụsị ichegbu onwe m. M mere ihe e kwuru ná Ndị Filipaị 4:6, 7. Ebe ahụ sịrị: ‘Unu echegbula onwe unu banyere ihe ọ bụla, kama . . . mee ka Chineke mara ihe unu na-arịọ.’ Ọ bụrụ na mụ echegbuwe onwe m n’abalị ọ bụla, m na-ekpe ekpere, gwa Chineke otú ọ dị m n’obi. Iwe jide m, e nwee ihe na-enye m nsogbu n’obi, ma ọ bụkwanụ obi na-ekoropụ m, m na-agwa ya. M na-arịọ ya ka o nyere m aka ka m ghara ịna-echegbu onwe m. Chi bọọ, m na-agbalị ka m ghara ịna-echegbuzi onwe m. Ikpe ekpere mgbe niile emeela ka m na-eche banyere ihe ndị m nwere, kama ịna-echegbu onwe m banyere ihe ndị m na-enweghị. M kpebiri na agaghịzi m na-aṅụ mmanya na-aba n’anya. Obi eruola m ala ugbu a. Achọghịkwa m ka ihe ọ bụla mee ka m chegbuwakwa m onwe m.”

Ịkwa iko so n’ihe ndị kacha akpata obi mgbawa na nsogbu. Ma, ihe Baịbụl kwuru ga-enyeliri anyị aka izere nsogbu ndị a. Dị ka ihe atụ, o kwuru ụfọdụ ihe kacha eme ka mmadụ kwaa iko. Ha bụ ịchụ nwaanyị ma ọ bụ nwoke na ile ndị gba ọtọ. Otu nwoke aha ya bụ Samuel kwuru, sị: “Ịchụ nwaanyị anaghị esiri m ike. Mgbe ụfọdụ, e nwee nwaanyị ihe ya na-anaghị amasị m, mana mụ achọpụta na ihe m na-amasị ya, ịchụ ya atọwa m ụtọ.” Samuel chọpụtara na ndị mmadụ na-ekwukarị na ọ na-achụ nwaanyị, ma mgbe ọ na-ebughị n’obi ịchụ nwaanyị. Ihe a meziri ka o kpebie na ya ga na-achụ nwaanyị. Ma, omume a nyere ya nsogbu n’obi. O mechara kwuo, sị: “Omume ahụ nwere ike itinye mmadụ ná nsogbu n’ihi na ọ na-eme ka mmadụ na-eme ihe na-achọghị ịma otú ihe ọ na-eme ga-esi emetụta ndị ọzọ.”

Samuel gụrụ otu akwụkwọ e dere maka ndị na-eto eto n’adres Ịntanet bụ́ jw.org. O chebakwaara ihe e kwuru n’Ilu 20:11 echiche. Ebe ahụ sịrị: “Nwatakịrị na-esi n’omume ya eme ka a mata onye ọ bụ, ma ihe ọ na-eme ọ̀ dị ọcha, ziekwa ezi.” Olee otú amaokwu Baịbụl a si nyere ya aka? Samuel ghọtara na ịchụ nwaanyị bụ omume na-adịghị ọcha, o zighịkwa ezi. O kwuru, sị: “M mụtakwara na onye na-achụ nwaanyị ma ọ bụ nwoke na-amụta àgwà ndị ga-eme ka ọ ghara ịbụ ezigbo di ma ọ bụ ezigbo nwaanyị. M bidoro chewe otú obi ga-adị nwaanyị m ga-alụ ma ọ hụ na m na-achụ nwaanyị. Ọ bụ ihe a mere m ji mata na omume a nwere ike itinye mmadụ ná nsogbu. Ọ bụ eziokwu na ịchụ nwaanyị na-adịrị m mfe, ma o meghị ka ọ bụrụ ihe ọma.” Samuel kwụsịrị ịchụ nwaanyị. O meekwala ka o zere ịkwa iko.

E nwere otu nwoke aha ya bụ Antonio. Ile ndị gba ọtọ gaara eme ka ọ kwaa iko ma banye n’ezigbo nsogbu. Ile ndị gba ọtọ riri ya isi. Ọ bụ eziokwu na ọ lụọla nwaanyị, hụkwa nwaanyị ya n’anya, ọ na-ele ndị gba ọtọ ọtụtụ mgbe. Ma, ọ sịrị na ichebara ihe e dere na 1 Pita 5:8 echiche nyeere ya ezigbo aka. Ebe ahụ sịrị: “Nweenụ uche ziri ezi, na-echenụ nche. Onye mmegide unu, bụ́ Ekwensu, na-ejegharị dị ka ọdụm na-ebigbọ ebigbọ, na-achọ onye ọ ga-eripịa.” Antonio kwuru, sị: “Foto ndị gba ọtọ juru ebe niile n’ụwa taa, ọ na-esikwa ike ya apụọ mmadụ n’obi ma o lee ya. N’eziokwu amaokwu Baịbụl ahụ nyeere m ezigbo aka iche banyere onye na-eji foto ndị ahụ anwa mmadụ. M mụtara na m kwesịrị icheta ozugbo m hụrụ foto ndị ahụ na ọ bụ Ekwensu ka ha si n’aka. Ugbu a, achọpụtala m na ọ bụ naanị Jehova ga-enyeliri m aka ‘inwe uche ziri ezi, ma na-eche nche’ iji nwee ike ịlụso ihe ndị ahụ na-emerụ uche m na obi m ma na-akpa alụmdi na nwunye anyị aka ọjọọ, ọgụ.” E nyeere Antonio aka, ya emechaakwa kwụsị omume ọjọọ ahụ. Ihe a nyekwaara ya aka izere nsogbu ndị ka njọ ọ gaara adaba na ha.

N’eziokwu, Baịbụl kwuru ihe ndị bara uru nwere ike inyere anyị aka izere ịba n’ezigbo nsogbu. Ma, ọ̀ bụrụkwanụ na e nwere nsogbu marala mmadụ ahụ́, ya ana-esikwara ya ike ịpụta na ya? Ka anyị lee otú Okwu Chineke nwere ike isi nyere anyị aka ịkwụsị ụdị nsogbu ahụ.