“Irikọ Nri Ọnụ Mere Ka Mmekọrịta Anyị Chikwuo Anya”
“Irikọ Nri Ọnụ Mere Ka Mmekọrịta Anyị Chikwuo Anya”
ÙNU na-erikọ nri ọnụ n’ezinụlọ unu, ọ dịkarịa ala, otu ugboro n’ụbọchị? Ọ dị mwute ikwu na n’ihi ndụ gbalụ gbalụ a na-ebi n’ụwa taa, ọtụtụ ezinụlọ adịghị erikọ nri ọnụ, onye ọ bụla na-eri nri mgbe o ji masị ya. Ma, ezinụlọ irikọ nri ọnụ adịghị egbo nanị mkpa anụ ahụ́, kama, ọ pụkwara igbo ọbụna mkpa ndị karịrị nke ahụ—ọ pụrụ ime ka a na-enwe ezigbo nkwurịta okwu na mmekọrịta chiri anya n’ezinụlọ.
E nwere otu nwoke a na-akpọ Algirdas. Ya na nwunye ya bụ́ Rima na ụmụ ha ndị nwanyị atọ bi n’obodo Lithuania nke dị n’Ebe Ugwu Europe. Algirdas kwuru, sị: “N’agbanyeghị na m na-arụ ọrụ, ụmụ m ana-agakwa akwụkwọ, anyị na-ahazi oge anyị iji hụ na anyị na-erikọ nri abalị ọnụ. N’oge anyị na-erikọ nri ọnụ, onye ọ bụla n’ime anyị na-akọ otú ụbọchị ya si gaa nakwa nsogbu ndị o nwere, kwuokwa ihe bụ́ echiche ya banyere ihe ụfọdụ, atụmatụ ndị ọ na-eme, ihe ndị na-amasị ya, na ihe ndị na-adịghị amasị ya. Anyị na-ejikwa oge a ekwurịta ihe ndị metụtara ofufe Chineke. Obi abụọ adịghị ya na irikọ nri ọnụ mere ka mmekọrịta anyị chikwuo anya.”
Rima kwukwara, sị: “Anyị na ụmụ anyị iso na-esi nri na-emekwa ka anyị nwee ohere ikwurịta ihe ndị dị anyị n’obi. Ụmụ anyị na-enwe mmasị n’imekọ ihe ọnụ na kichin, n’otu mgbe ahụ kwa, ha na-amụta ihe ndị bara uru. N’ụzọ dị otú a, anyị na-eme ka ọrụ isi nri bụrụ ihe na-enye anyị obi ụtọ.”
Algirdas, Rima, na ụmụ ha na-erite ọtụtụ uru n’ihi na ha na-ewepụta oge iji na-erikọ nri ọnụ. Ọ bụrụ na ezinụlọ gị amalitebeghị irikọ nri ọnụ, gịnị ma unu mee ndokwa ịdị na-eme ya, ma ọ́ dịghị ihe ọzọ, otu ugboro n’ụbọchị, n’agbanyeghị ma ị̀ bụ nne ma ọ bụ nna nanị ya na-azụ ụmụ. Uru unu ga-erite na ya ga-akarị nnọọ àjà ọ bụla unu chụrụ maka ya.