Wat John Wen Write 9:1-41
9 Az Jesus wuz walking, he seen one guy dat wuz blind since he wuz born.
2 An his guys ask him: “Rabbi, who wen sin so dat dis guy wuz born blind? Wuz him or his parents?”
3 Jesus ansa: “Not him or his parents wen sin, but dis iz so dat peopo can see God in action.
4 Da one who wen sen me get work he like us do, an we gotta do um while still yet day time, cuz night time stay coming wen nobody can work.
5 Az long az I stay in da world, I da light fo da world.”
6 Afta he tell all dis, he spit on da groun an make one paste wit his spit, an wipe um on da guy’s eyes
7 an sed to him: “Go wash yoa eyes in da Si·loʹam pool” (wen you translate um dat mean “Watta Dat Gush Out”). So he go wash, an wuz able fo see, den he go back.
8 Den da peopo living ova dea an dose dat use to see him begging tell: “Eh, dis not da guy dat use to beg?”
9 Some wuz saying: “Dass him.” Oddas wuz saying: “Nah, but kinda look like him.” Da guy keep telling: “Yeah az me.”
10 So dey ask um: “Den who wen make um so you can see?”
11 He ansa: “Da guy dey call Jesus wen make one paste an wipe um on my eyes an tell me, “Go wash um in da Si·loʹam pool.” So I wen do dat, an now I can see.”
12 So dey sed to him: “Wea dat guy?” He sed: “I donno.”
13 Dey bring da guy dat wuz blind to da Pharisees.*
14 Jus so happen, wuz da Sabbath wen Jesus make da paste an make him able fo see.
15 So dis time, da Pharisees ask him how he wuz able fo see. He tell: “He put one paste on my eyes, an I go wash um, den I could see.”
16 Some of da Pharisees start fo say: “Dis not one guy from God, cuz he no follow da Sabbath.” Oddas sed: “How one guy who iz one sinna can do stuff lidis?” So all dem neva agree.
17 Dey tell da blind guy again: “Wat you get fo say about him? Since he da one wen open yoa eyes.” Da guy tell: “He one prophet.”
18 Da Jews neva believe dat he use to be blind an could see now. So dey talk to da guy’s parents
19 an ask um: “Iz dis yoa boy? Wuz he born blind? How he can see now?”
20 His parents ansa: “Yeah dass oua boy an he wuz born blind.
21 But we donno how come he can see now. An we donno who wen make him able fo see. Ask him. He old enuff fo talk fo himself.”
22 His parents sed dis cuz dey wuz sked of da Jews, cuz da Jews wen awready decide fo kick out anybody from da synagog* if dey tell dat Jesus iz da Christ.
23 Dass why his parents sed: “He old enuff. Ask him.”
24 So one moa time, dey call ova da guy dat use to be blind an sed to him: “Tell da trut in front God. We know dis guy dat wen heal you iz one sinna.”
25 He ansa dem: “I donno if he one sinna or not. All I know iz, I wuz blind, an now I can see.”
26 Den dey tell him: “Wat he did to you? How he wen heal you?”*
27 He ansa dem: “I told you awready but you no lissen. How come you like me say um again? Wat, you like come his followas too?”
28 Dey talk down to him an tell: “You one followa of dat guy, but we followas of Moses.
29 We know dat God wen talk to Moses, but dis guy, we donno wea he get his powa* from.”
30 Da guy tell dem: “Iz unreal dat he wen heal me, an still yet you guys donno who wen sen him.
31 We know God no lissen to sinnaz, but if somebody respeck God plenny an do wat he tell, he lissen to dat guy.
32 Even from long time ago neva have somebody dat wen heal one guy born blind.
33 If God neva sen dis guy, he no could do notting.”
34 Den dey tell him: “You wuz one sinna from wen you wuz born, but you stay teaching us?” Den dey kick um out!
35 Jesus wen hea dat dey wen kick da guy out, an afta he find him, he sed: “You get faith in da Christ?”*
36 Da guy ansa: “Who dat, so I can put faith in him?”
37 Jesus sed to him: “You wen see him awready, an he stay talking to you right now.”
38 He sed: “Lord, I get faith in him.” An he bow down an show respeck to him.
39 Den Jesus sed: “I wen come into dis world so dat da tings I do can make da blind see, an da guys dat can see, come blind.”
40 Da Pharisees who wuz dea wen hea him say dis, an dey sed to him: “We not blind too ah?”
41 Jesus tell dem: “If you wuz blind, you no would be guilty. But cuz you say, “We see,” you stay guilty.”
Footnotes
^ In da original Greek dis wen mean “open yoa eyes”.
^ Or, “authority”.
^ In da original Greek dis wen mean “Son of man”. Go check out “Son Of Man” in Da Bible Dictionary.
