Wat John Wen Write 14:1-31
14 “No worry. Show faith in God, an show faith in me.
2 In my Faddah’s house, get plenny places fo stay. I neva woulda told you dis if no wuz tru. An az tru, cuz I goin dea fo make one place ready fo you.
3 An wen I get yoa place ready, I goin come back an take you wit me, so dat wea I stay you goin be too.
4 An wea I goin, you know da way fo get dea.”
5 Thomas sed to him: “Lord, how we goin know da way? We no even know wea you goin.”
6 Jesus tell him: “I da way, an da trut, an da life. Nobody can get to da Faddah unless dey go thru me.
7 If you guys know me, you goin know my Faddah too. From now on, you know him an wen see him.”
8 Philip sed to him: “Lord, if you show us yoa Faddah, dass good enuff fo us.”
9 Jesus sed to him: “Philip, I been wit you guys all dis time, an you still donno me? Whoeva seen me wen see da Faddah too. So how come you say, “Show us yoa Faddah”?
10 You no believe dat I stay one* wit da Faddah an da Faddah stay one wit me? Da tings I tell you, I neva come up wit um on my own. But da Faddah, who I stay one wit, he doin wat he like thru me.
11 Believe dat I stay one wit da Faddah an da Faddah stay one wit me. An if you no believe wat I say, den believe cuz of da tings I do.
12 I telling you fo shua, whoeva show faith in me goin do da tings I do too. An he goin do even bigga tings den dese, cuz I stay goin away to my Faddah.
13 An wateva you ask in my name,* I goin do um, so dat da Son can show how awesome da Faddah stay.
14 If you ask fo anyting in my name, I goin do um.
15 “If you love me, you goin do wat I tell you fo do.
16 An I goin ask da Faddah fo give you anodda helpa* fo be wit you foeva.
17 He goin give you his powa dat show wass tru. Da world no can get dat powa, cuz dey donno um an dey no can see um. But you know um, cuz you get um in you, an goin stay wit you.
18 I not goin leave you by yoaself.* Fo shua I goin come back to you.
19 Pretty soon, da world not goin see me anymoa. But you goin see me, cuz I goin keep living an you goin live too.
20 Dat time, you goin know dat I stay one* wit da Faddah, an you stay one wit me, an I stay one wit you.
21 Whoeva know da rules I tell an do um, dass da one dat love me. An whoeva love me, my Faddah goin love him. An I goin love him an goin make him know me real good.”
22 Judas, not Judas Is·carʹi·ot, sed to him: “Lord, how come you ony like us know you real good an not da peopo in da world too?”
23 Jesus tell him: “If anybody love me, he goin do wat I tell, an my Faddah goin love him. We goin come to him an make house* wit him.
24 Whoeva no love me not goin do wat I tell. Wat you hearing no come from me, but come from da Faddah who wen sen me.
25 “I tell you all dese tings while I still stay wit you.
26 But da helpa, God’s powa dat He goin sen in my name, dass wat goin teach you evryting an help you rememba all da tings I told you.
27 I goin keep giving you da peace dat you get wit me now. Da peace I give you stay diffren from da peace da world give you. No worry an no be sked.
28 You wen hea me tell you, “I goin go away an I goin come back to you.” If you love me, you would be happy dat I goin away to da Faddah, cuz da Faddah iz moa higha* den me.
29 So I telling you all dis stuff now, so dat wen it happen, you goin believe.
30 I no moa too much time lef fo talk cuz da rula of da world stay coming awready, but he no moa control ova me.*
31 But so dat da world know I love da Faddah, I stay doin evryting jus like da Faddah told me fo do. Get up, we go.
Footnotes
^ Or, “united”.
^ Or, “thru me”.
^ In da original Greek dis wen mean “one called to somebody’s side” fo give dem help. Ova hea dis stay talking about God’s powa az if iz one person.
^ Or, “az orphans”.
^ Or, “united”.
^ Or, “he goin be wit us”.
^ Or, “get moa powa”.
^ Or, “no moa powa ova me”.
