Wat John Wen Write 15:1-27
15 “I da real vine, an my Faddah iz da farma dat take kea da vine.
2 He cut off evry branch dat no moa fruit. An evry branch dat make fruit, he prune um fo clean um up so dat it can make moa fruit.
3 You stay clean awready cuz of da tings I told you.
4 Stay one* wit me, an I goin stay one wit you. Jus like one branch no can make fruit by itself unless stay part of da vine, you no can make fruit eidda unless you stay one wit me.
5 I da vine an you da branches. Whoeva stay one wit me, an me one wit dem, dey goin make plenny fruit. Cuz witout me, you no can do notting.
6 If anybody no stay one wit me, he goin be like one branch dat get thrown away an dry up. Guys take dat kine branches an throw um in da fiyah an burn um.
7 If you stay one wit me an you lissen wat I tell, ask fo wateva you like, an goin happen.
8 You make my Faddah look awesome wen you keep making plenny good fruit an show you really my followas.
9 Da same way da Faddah love me, dass how I love you. Ack in one way dat goin let me keep loving you.
10 If you do wat I tell you fo do, I goin keep loving you, jus like I do wat my Faddah tell me an he keep loving me.
11 “I tell you dese tings so dat you can be happy to da max, jus like I stay happy.
12 Dis wat I telling you fo do,* you gotta love each odda jus like I wen love you.
13 Nobody get moa love den one guy dat give up his life* fo his frenz.
14 You my frenz if you do wat I telling you fo do.
15 I not goin call you slaves anymoa, cuz one slave donno wat his masta do. But I call you frenz, cuz I wen tell you all da tings I heard from my Faddah.
16 You neva choose me, but I wen choose you. An I wen pick you fo keep making fruit dat goin las, so dat no matta wat you ask da Faddah fo in my name, he goin give um to you.
17 “Dese tings I telling you fo do so dat you love each odda.
18 If da world hate you, rememba dat it wen hate me befoa it wen hate you.
19 If you wuz part of da world, da world would love you. But cuz I wen choose you from da world an you no stay part of um, dass why da world hate you.
20 No foget wat I told you: One worka not moa importan den his boss. If dey wen make me suffa, dey goin make you suffa too. An if dey do wat I tell, dey goin do wat you tell too.
21 But dey goin treat you lidis cuz you my guys, an cuz dey donno da One who wen sen me.
22 If I neva come an talk to dem, dey no would be guilty of sin. But now, dey no moa excuse fo dea sin.
23 Whoeva hate me, hate my Faddah too.
24 If dey neva see da miracles I did dat nobody else wen do, dey no would be guilty of sin. But dey wen see me an hate me an my Faddah too.
25 But dis happen so dat wat stay in da Law would come tru: “Dey wen hate me fo no reason.”
26 I goin sen you da helpa* from da Faddah, dass his powa dat show wass tru. Wen it come, it goin help you undastan tings about me moa betta.
27 Den you gotta go help oddas undastan tings about me moa betta, cuz you been wit me from da start.
