Wat John Wen Write 3:1-36
3 Had one Pharisee* guy named Nic·o·deʹmus, an he wuz one leada fo da Jews.
2 Dis guy wen go to Jesus night time an sed to him: “Rabbi, we know dat you one teacha God wen sen, cuz nobody can do da miracles you doin if God no stay wit him.”
3 So Jesus sed to him: “I tell you fo shua, if somebody not born again,* he no can see God’s Govament.”
4 Nic·o·deʹmus sed to him: “How one guy can be born wen he stay old? He no can go back inside his maddah one moa time fo be born again ah?”
5 Jesus tell um: “Fo shua, if somebody not born from watta an da powa from God, he no can go inside God’s Govament.
6 Somebody born from one human belong to da earth, an somebody born from God’s powa belong to da heavens.
7 No be shock cuz I tell you dat you guys gotta be born again.
8 Da wind blow wea it like, an you hea um, but you donno wea come from or wea stay goin. Az da same fo evrybody dass born from God’s powa.”
9 Nic·o·deʹmus sed to him: “How can?”
10 Jesus tell: “You donno wat I talking about? You one teacha fo Israel yeah?
11 I telling you, we talk about da tings we know, an we tell about da tings we see, but you no believe um.
12 If I wen tell you about tings on da earth an you still neva believe um, how you goin believe wen I tell you tings about heaven?
13 Nobody wen go up heaven but da one dat wen come down from heaven, da Son of man.*
14 An jus like Moses wen lif up da snake in da boonies, da Son of man goin get lif up too,
15 so dat evrybody who believe in him can get fo live foeva.
16 “Cuz God wen love da peopo in da world so much, he wen give his one an ony Boy fo dem, so dat evrybody who show faith in him can live foeva an no get wipe out.
17 God neva sen his Boy in da world fo him judge da world, but fo da world get saved cuz of him.
18 Whoeva show faith in him no goin get judge. Whoeva no show faith wen get judge awready, cuz he neva show faith in God’s one an ony Boy.*
19 Dis iz why peopo goin get judge: da light wen come in da world, but dey wen love da dark radda den da light, cuz da tings dey do iz bad.
20 Whoeva do bad tings hate da light an no come to da light, so dat wat he do no come out in da open.
21 But whoeva do wass right come to da light, so az clear fo see dat wat he do match up wit wat God like.”
22 Afta dis Jesus an his guys go to da Ju·deʹa countryside. Ova dea he wen spen time wit dem an dey wuz baptizing peopo.
23 John wuz baptizing peopo too in Aeʹnon by Saʹlim, cuz had plenny watta ova dea. An peopo wen keep coming an getting baptize.
24 Dat time, John neva get thrown in jail yet.
25 John’s followas wen argue wit one Jew about how fo be clean in God’s eyes.
26 So dey go to John an tell um: “Rabbi, da guy dat wuz wit you on da odda side of da Jordan, da one you wen tell us about, try look, he stay baptize peopo, an evrybody goin to him.”
27 John tell dem: “One guy no can do notting unless God let him do um.
28 You guys wuz dea wen I sed, “I not da Christ, but God wen sen me befoa dat one.”
29 Da bride belong to da groom. But wen da groom’s fren stan dea an hea him talk, he happy. Same lidat, I happy too.
30 Da Christ goin get moa an moa followas, but I goin get less an less.”
31 Da one dat come from above stay ova evrybody. Da one dass from da earth talk about earth kine stuff, cuz he from da earth. Da one dat come from heaven stay ova evrybody.
32 He tell da tings he wen see an hea,* but nobody believe wat he say.
33 Whoeva believe him, believe full on* dat God iz tru.
34 Cuz da one God wen sen tell tings from Him, cuz God no hold back wen he give his powa.
35 Da Faddah love da Son an wen give evryting to him.*
36 Da one dat show dea faith in da Son get fo live foeva. Da one dat no lissen da Son not goin get life, but God goin stay mad wit him.
Footnotes
^ Or might be, “born from above”.
^ Go check out “Son Of Man” in Da Bible Dictionary.
^ In da original Greek dis wen mean “in da name of God’s one an ony Boy”.
^ Dass da tings he wen see an hea in heaven.
^ Or, “confirm”. In da original Greek dis wen mean “wen put his seal to it”. Go check out “Seal” in Da Bible Dictionary.
^ Or, “give him authority ova evryting”.
