Wat John Wen Write 10:1-42
10 “I tell you fo shua, da guy dat no go into da sheep pen thru da gate but he climb in anodda way, dat guy iz one thief dat wen come fo steal da sheep.
2 But da guy dat go in thru da gate iz da shepherd fo da sheep.
3 Da gate keepa open da gate fo da shepherd, an he call his sheep by dea name. Da sheep lissen to his voice an dey go to him an follow him outa da pen.
4 Afta he bring out all his sheep, he go in front dem an dey follow him, cuz dey know his voice.
5 No ways dey goin follow one stranger but dey goin run away from him, cuz dey donno his voice.”
6 Jesus wen tell dis story, but da Jews neva undastan wat he wuz trying fo say.
7 So Jesus tell dem again: “Fo shua, I da gate fo da sheep.
8 Evrybody dat pretend fo be da good shepherd iz crooks. But da sheep neva lissen to dem.
9 I da gate. Whoeva come to me fo go inside da pen, goin get saved. An he goin go in an out an find food.
10 Da crook come fo steal, slaughta, an wipe um out. I wen come so da sheep can get life an keep living.
11 I da good shepherd. An da good shepherd give up his life* fo da sheep.
12 One guy dass hired fo watch ova da sheep, he not da shepherd an da sheep no belong to him. Wen he see one wolf coming, he dig out from da sheep. An da wolf kill some of da sheep an da res of dem scatta.
13 Dis happen cuz he ony one hired guy an he no kea about da sheep.
14 I da good shepherd. I know my sheep an my sheep know me,
15 jus like da Faddah know me an I know da Faddah. An I give up my life fo da sheep.
16 “An I get odda sheep, dass not from da same pen. An even dose ones I gotta bring inside, an dey goin lissen to my voice, an all dem goin come one group of sheep, unda one shepherd.
17 Dis how come da Faddah love me, cuz I give up my life, so dat I can get um back.
18 Nobody take away my life from me, but az my choice fo give um up. I get da right fo give um up, an I get da right fo get um back. Dass wat my Faddah wen tell me.”
19 Again, all da Jews no could agree cuz of wat Jesus wuz saying.
20 Plenny of dem tell: “He get one demon inside him an he stay outa his mind. Why you lissen to him fo?”
21 Oddas sed: “One guy wit one demon not goin say dese tings. One demon no can heal da blind right?”
22 Wuz da time wen da Jews had celebrate da giving of da tempo to God in Jerusalem.* Wuz winta time,
23 an Jesus wuz walking in da tempo in one covered walkway dat wuz named afta Solʹo·mon.
24 Da Jews wen surround him an start fo say: “How long you goin keep us waiting befoa you tell us if you da Christ or not? Jus say if you da Christ.”
25 Jesus ansa dem: “I wen tell you awready, but you neva believe. Da tings I do fo my Faddah show who me.
26 But you no believe cuz you not my sheep.
27 My sheep lissen to my voice. I know dem, an dey follow me.
28 I give dem life dat las foeva, an dey neva goin be wipe out. Nobody goin rip dem outa my hand.
29 Da sheep my Faddah wen give me stay moa importan den evryting else, an nobody can rip dem outa my Faddah’s hand.
30 Az jus like me an da Faddah stay one.”*
31 Da Jews pick up stones fo kill him again.
32 Jesus tell dem: “I wen show you guys plenny good tings dat come from da Faddah. Which one making you guys like kill me?”
33 Da Jews ansa him: “We not goin kill you fo da good tings you doin, but cuz you talk agains God. Cuz even tho you jus one guy, you saying you one god.”
34 Jesus ansa dem: “Da Scripchas* tell, “I sed: “You stay gods”* right?
35 So den, if God sed da guys dat deserve fo get punish wuz “gods”—an you no can change da Scripchas—
36 how you can say to me, da one da Faddah wen set apart fo serve him an wen sen into da world, “You talk agains God,” cuz I sed, “I God’s Son”?
37 If I not doin da tings my Faddah like me do, den no believe me.
38 But if I doin um, even if you no believe me, believe cuz of da tings I doin, so dat you can learn an undastan moa clear dat da Faddah stay wit me, an I stay wit da Faddah.”
39 So dey try again fo grab um fo arrest him, but he wen get away.
40 Den he wen go away across da Jordan to wea John wuz baptizing befoa, an he stay dea.
41 An plenny peopo wen come to him an tell each odda: “John neva do one miracle, but all da tings he sed about dis guy wuz tru.”
42 An ova dea plenny guys wen put faith in Jesus.
Footnotes
^ In da original Greek dis wen mean “Festival Of Da Tempo Dedication”. Go check out “Festival Of Da Tempo Dedication” in Da Bible Dictionary.
^ Or, “Me an da Faddah stay united”.
^ In da original Greek dis wen mean “Law”.
^ Or, “like God”. Dat mean, guys dat rep God an talk fo him.
