Wat John Wen Write 2:1-25
2 Two days layta, had one wedding party in Caʹna, dass in Galʹi·lee, an Jesus maddah wuz dea.
2 Jesus an his guys wuz invited to da party too.
3 Wen da wine wuz about fo run out, Jesus maddah sed to him: “Dey no moa wine.”
4 But Jesus sed to her: “Eh Ma, dass not someting fo me an you worry about.* Iz not da time fo me do stuff yet.”
5 His maddah tell da servas: “Do wateva he tell you fo do.”
6 Ova dea had six stone watta jars, cuz dass wat da rules fo da Jews sed fo have, so dat da peopo could wash dea hands befoa dey eat. Evry jar wuz able fo hold aroun 12 to 17 gallons* of watta.
7 Jesus sed to dem: “Fill da jars wit watta.” So dey fill um up to da top.
8 Den he sed to dem: “Now take some out an bring um to da guy in charge of da party.” So dey took um.
9 Da guy in charge of da party wen taste da watta dat wuz turned into wine. He neva know wea came from (but da servas dat wen take out da watta wen know). Wen he taste um, he call da groom
10 an tell um: “Evrybody bring out da good wine firs, den wen guys stay drunk, dey bring out da cheapa stuff. But you, ony now you buss out da good stuff.”
11 Jesus do dis in da town of Caʹna in Galʹi·lee. Dis wuz da start of his miracles wea he wen show his awesome powa, an his guys wen start fo have faith in him.
12 Afta dis, Jesus, his maddah, his braddahs, an his guys wen go down to Ca·perʹna·um, but dey neva stay dea dat long.
13 Da Passova* fo da Jews wuz close, an Jesus wen go up to Jerusalem.
14 In da tempo he see da guys selling cows, sheep, an doves. An he see da guys dat change money sitting down at dea tables.
15 So he make one whip outa ropes an go chase outa da tempo all da guys wit dea sheep an cows. He dump all da coins on da groun an flip da tables of da guys changing money.
16 An he sed to da guys selling da doves: “Get dis stuff outa hea! Stop doin bizness in my Faddah’s house!”
17 His followas wen rememba wat da Scripchas sed: “Da love I get fo yoa house iz like one fiyah dat burn inside me.”
18 Cuz of wat Jesus did, da Jews tell him: “Show us one sign fo prove you get da right fo do dese tings.”
19 Jesus sed to dem: “Broke down dis tempo an in three days I goin raise um up.”
20 Den da Jews sed: “Dis tempo took 46 years fo build, an you goin raise um up in three days?”
21 But wen he sed tempo, he mean his body.
22 Bumbye wen he wuz raise up from da dead, his followas rememba dat he used to say dis, an dey wen believe da scripcha an wat Jesus sed.
23 But wen he wuz in Jerusalem at da Passova festival, plenny peopo start fo put faith in him wen dey see da miracles he wuz doin.
24 But Jesus neva trus dem full on cuz he know wat stay in dea heart.
25 He neva need nobody fo tell him anyting about how peopo stay, cuz he know all about dem.
Footnotes
^ In da original Greek dis wen mean “Wass dat to me an you, woman?” Dis phrase show he neva agree. Calling his maddah “woman” no mean he wuz showing disrepeck.
^ In da original Greek dis wen mean “two or three measures”. Ova hea dis probly wuz da bath measure. One bath equal about 6 gallons.
