Wat John Wen Write 17:1-26
17 Afta Jesus sed dese tings, he look up to da sky an tell: “Faddah, da time stay hea. Lif up yoa son an make him come awesome so dat he can bring praise to you,
2 jus like you awready wen make him awesome by giving him da powa* ova all peopo, so dat he can give dem life dat las foeva.
3 Da guys dat goin live foeva gotta get fo know you,* da ony tru God, an da one you wen sen, Jesus Christ.
4 I had bring praise to you on da earth cuz I pau da work you wen give me fo do.
5 So now, Faddah, let me be nex to you in all awesomeness an have da position I had befoa da world* wuz made.
6 “Fo da guys dat wuz in da world dat you wen give me, I wen let dem know who you.* Dey wuz yoas, an you give dem to me, an dey lissen to wat you tell.
7 Dey got fo see dat evryting I get iz from you.
8 Dey know dis cuz I told dem da tings you told me, an dey believe um an know fo shua dat I yoa rep an you wen sen me.
9 I pray to you about dem. I no pray about da world,* but about da guys dat you wen give me, cuz dey yoas.
10 Evryting dass mines iz yoas an yoas iz mine, an I wen come awesome in front dem.
11 “I goin leave dis world an come to you, but dey goin stay in da world. Holy Faddah, please look afta dem cuz of yoa name, which you wen give me, so dat dey can be one* jus like we stay one.
12 Wen I wuz wit dem, I would look afta dem cuz of yoa name, which you wen give me. I wen proteck dem an I neva lose nobody, except one. He da one dat goin get wipe out so dat da scripcha can come tru.
13 But now I coming to you, an I saying all dis while I still in da world, so dat dey can be happy to da max jus like me.
14 I wen tell dem yoa words, but da world hate dem cuz dey no stay part of da world, jus like I no stay part of um.
15 “I not asking dat you take dem outa da world, but dat you look afta dem cuz of da Devil.*
16 Dey no stay part of da world, jus like I no stay part of um.
17 Use yoa words dat stay tru fo make dem holy.*
18 Jus like you wen sen me into da world, I wen sen dem into da world too.
19 An I keep myself holy fo dem, so dat dey can come holy too cuz of da trut.
20 “I pray not ony fo dese guys, but also fo oddas dat lissen to dem an put faith in wat dey say,
21 so dat all dem can be one, jus like you, Faddah, stay one wit me an me wit you, so dat dey can be one wit us. Den da world can believe dat you wen sen me.
22 I wen honor dem jus like you wen honor me, so dat dey can be one jus like we stay one.
23 I stay one wit dem an you stay one wit me, so dat dey really can be one.* Den da world goin know dat you wen sen me an dat you love dem jus like you love me.
24 Faddah, I like ask dat da ones you wen give me be wit me wea I stay, so dat dey can see me wit da awesome powa you give me, cuz you had love me befoa da start of da world.*
25 Faddah, da one dat always do wass right, da world donno you. But I know you, an dese guys know you wen sen me.
26 I wen let dem know who you* an I goin keep doin dat, so dat dey can love oddas da same way you love me, an den I can be one wit dem.”
Footnotes
^ Or, “authority”.
^ Or, “keep learning about you”. Da Greek verb ova hea show action dass nonstop.
^ Or, “humans”.
^ Or, “yoa name”. Dis no wuz ony talking about knowing Jehovah’s name but also da person behind da name.
^ Ova hea, dis stay talking about da guys dat no stay worshipping Jehovah.
^ Or, “united”.
^ In da original Greek dis wen mean “da wicked one”.
^ Or, “set dem apart”.
^ Or, “united all da way”.
^ Dis probly talking about from da time Adam an Eve wen have kids.
^ Or, “yoa name”. Dis no wuz ony talking about knowing Jehovah’s name but also da person behind da name.
