Wat John Wen Write 21:1-25
21 Afta dis Jesus wen show himself to his followas again at da Sea of Ti·beʹri·as.* Dis how he wen show himself.
2 Ova dea had Simon Peter, Thomas (dat wuz called da Twin), Na·thanʹa·el from Caʹna in Galʹi·lee, da sons of Zebʹe·dee, an two odda followas.
3 Simon Peter sed to dem: “I goin fishing.” Dey sed to him: “We coming too.” So dey went out on dea boat, but dey neva catch notting all night.
4 But wen da sun wuz starting fo come up, Jesus wuz standing on da beach, but da followas neva know wuz him.
5 Den Jesus sed to dem: “My frenz,* you no moa notting* fo eat ah?” Dey ansa: “No!”
6 He tell dem: “Throw yoa net on da right side of da boat an you goin get action.” So dey throw um, but dey no could pull in da net cuz had choke fish.
7 Den da followa dat Jesus love plenny sed to Peter: “Az da Lord!” Wen Simon Peter hea dat, he put on his clothes, cuz he wuz half naked,* an he jump inside da watta.
8 But da odda followas come in da small boat, dragging da net loaded wit fish. Dey no wuz dat far from da shore, ony about 300 feet.*
9 Wen dey get to shore, dey see one charcoal fiyah wit fish on top um an bread.
10 Jesus sed to dem: “Bring some of da fish you jus wen catch.”
11 So Simon Peter go back on da boat an pull da net to shore. Da net wuz full of big fish, had 153 of dem. An even tho had so much, da net neva buss.
12 Jesus sed to dem: “Come eat breakfast.” None of da followas had da guts fo ask him: “Who you?” cuz dey knew he wuz da Lord.
13 Jesus take da bread an give um to dem, an did da same ting wit da fish.
14 Dis wuz da third time Jesus wen show himself to his followas afta coming back alive.
15 Wen dey pau breakfast, Jesus sed to Simon Peter: “Simon son of John, you love me moa den dese tings?”* He tell: “Yeah Lord, you know I love you.” Jesus tell um: “Feed my lambs.”
16 One moa time he tell him: “Simon son of John, you love me?” He sed: “Yeah Lord, you know I love you.” He sed to him: “Take kea my litto sheep.”
17 Fo da third time he ask him: “Simon son of John, you love me?” Wen bodda Peter dat Jesus ask him one moa time: “You love me?” So he sed to him: “Lord, you know evryting. You know fo shua I love you.” Den Jesus tell um: “Feed my litto sheep.
18 Wen you wuz younga, you used to put on yoa own clothes an go wea eva you like. But I telling you fo shua, wen you come old, you goin hold out yoa hands an somebody else goin put on yoa clothes an take you wea you no like go.”
19 He sed dis fo show da way Peter wuz goin die an bring praise to God. Afta he sed dis, he tell um: “No stop following me.”
20 Peter turn aroun an see da guy dat Jesus love plenny following dem. He wuz da one who wen lean back on Jesus ches at da dinna an ask um: “Lord, who da guy dat goin stab you in da back?”
21 So wen Peter see him, he ask Jesus: “Lord, wat about dis guy?”
22 Jesus sed to him: “If I like him stick aroun til I come back, why you gotta worry about um? You jus keep following me.”
23 So da talk among da braddahs wuz dat dis followa wuzn’t goin die. But Jesus neva say dat he no would die, he sed: “If I like him stick aroun til I come back, why you gotta worry about um?”
24 Dis followa iz da one who stay tell an write dese tings, an we know dat wat he tell iz tru.
25 In fact, had plenny odda tings Jesus did. An if somebody eva try write about all dat stuff, I no tink would have enuff room in da world fo hold all dose scrolls.*
Footnotes
^ Dass da Sea of Galilee.
^ Or, “Litto kids”. Dis wuz one nice way fo show he kea about dem.
^ Or, “any fish”.
^ Or, “wit ony his undawear”.
^ In da original Greek dis wen mean “about 200 cubits”. Go check out “Cubit” in Da Bible Dictionary.
^ Jesus wuz probly talking about tings dat had fo do wit da fishing bizness.
