Wat John Wen Write 5:1-47
5 Afta dis had one festival fo da Jews, an Jesus go up to Jerusalem.
2 In Jerusalem had one gate called da Sheep Gate.* Get one pool by um dass called Beth·zaʹtha in Hebrew, wit five walkways wit pillars.
3 Unda dese walkways had plenny guys lying down dat wuz sick, blind, an cripple, an wit hands or feet dat no work.
4 * ——
5 Had one guy dea dat wuz sick fo 38 years.
6 Jesus see him lying dea an wen awready know he wuz sick fo long time. So he sed to him: “You like get betta?”
7 Da sick guy ansa him: “Mista, I no moa nobody fo put me in da pool wen da watta stir up. An wen I try go in, somebody else go in front me.”
8 Jesus tell him: “Get up! Pick up yoa mat an walk aroun.”
9 An right den an dea da guy wen come good. Den he pick up his mat an start fo walk.
Dat wuz da Sabbath* day.
10 So some Jews start fo tell da guy dat wuz healed: “Dis da Sabbath, az not right fo carry yoa mat on da Sabbath.”
11 But he tell dem: “Da same guy dat wen heal me told me, “Pick up yoa mat an walk aroun.””
12 Dey ask him: “Who da guy dat wen tell you, “Pick um up an walk”?”
13 But da guy dat wuz healed neva know who he wuz, cuz Jesus wen disappea in da crowd.
14 Afta dis, Jesus find da guy in da tempo an tell um: “You wen come good. No sin anymoa, so dat someting moa worse no happen to you.”
15 Da guy go away an tell da Jews wuz Jesus dat wen make him betta.
16 Dass how come some of da Jews wen start fo make trouble to Jesus, cuz he wuz doin dese kine tings on da Sabbath.
17 But he tell dem: “My Faddah been working til now, az why I keep working.”
18 Dass why even moa so, some Jews like try kill um, cuz dey tink he not jus breaking da Sabbath, but he even call God his Faddah, making like he equal to God.
19 So Jesus tell dem: “I tell you fo shua, da Son no do notting on his own. He ony do wat he see da Faddah do. Cuz wateva tings dat One do, da Son do da same tings too.
20 Da Faddah really love* da Son an He show him evryting He do. An He goin show him even moa betta tings den dis fo make you guys trip out.
21 Jus like how da Faddah bring da dead back to life, da Son bring back to life whoeva he like.
22 Da Faddah no judge nobody, but he give dat kuleana to da Son,
23 so dat evrybody respeck da Son jus like dey respeck da Faddah. Whoeva no respeck da Son no respeck da Faddah who wen sen him.
24 I tell you fo shua, da guy dat hea wat I tell an believe da One dat wen sen me goin get fo live foeva. He not goin get judge, but goin go from bein dead to bein alive.
25 “I telling you fo shua, da time stay coming, an az now, wen da dead goin hea da voice of da Son of God, an da ones dat had pay attention goin live.
26 Jus like da Faddah get da powa fo give life,* he give da Son da powa fo give life too.
27 An he give him da right fo judge cuz he da Son of man.*
28 No let dis blow yoa mind, cuz da time stay coming wen all da guys in da grave* goin hea his voice
29 an come back alive. Da guys dat wen do good stuff goin come back fo live, an da guys dat wen do pilau tings goin come back fo get judge.
30 I no do notting on my own. Wat I hea from da Faddah, dass how I judge. An I judge da right way, cuz I no do wat I like, but I do wat da one dat wen sen me like.
31 “If I da ony one dat tell peopo about me, dey not goin believe wat I say.
32 Get anodda one* dat tell peopo about me, an I know wat he tell about me stay tru.
33 You wen sen guys to John an wat he had tell about me wuz da trut.
34 I no need nobody fo tell oddas about me, but I telling you all dis so dat you can get life.
35 John wuz like one lamp dat wuz burning bright, an fo litto while you wuz supa happy fo be in his light.
36 But I get someting moa betta den wat John wuz saying about me. Da unreal tings my Faddah wen give me da kuleana fo do, I doin um, an dey show dat da Faddah wen sen me.
37 Da Faddah himself sed he wen sen me. You neva hea his voice or see his face,
38 an his words no stay in yoa heart, cuz you no even believe da one he wen sen.
39 “You keep digging thru da Scripchas cuz you like live foeva. All dese Scripchas stay talking about me.
40 But you no like follow me so dat you can get life.
41 I not looking fo peopo praise me.
42 You guys not lidat. An I know fo shua you no moa love fo God inside you.
43 I wen come fo rep* my Faddah, but you neva welcome me. But if some odda guy wen come jus cuz he like, you guys would welcome him ah?
44 You no can believe in me cuz you like peopo praise you, an you no kea about making da ony God happy an fo Him praise you.
45 No tink dat I goin tell da Faddah dat you wen do wrong. Moses, da one you trus, he da one tell dat you do wrong.
46 In fact, if you wen believe Moses, you would believe me, cuz he wen write about me.
47 But if you no believe wat he wen write, how you goin believe wat I say?”
Footnotes
^ Dis gate coulda get it’s name cuz dey would bring sheep an goats fo sacrifice thru um, or maybe had one market close by.
^ Dis verse iz in some Bible translations but no stay in some of da mos oldes Greek writings.
^ Or, “get da gif of life inside him”.
^ Go check out “Son Of Man” in Da Bible Dictionary.
^ Or, “memorial tombs”. Dis talking about da guys dat had mahke an stay in God’s memory.
^ Dis talking about da Faddah.
^ In da original Greek dis wen mean “in da name of”.
