1. Ngaa nabudlayan na magtuon ang iban?

DAPAT gid magpanikasog ang madamo nga tawo nga makakita sing kuarta para sa ila mga kinahanglanon sa kabuhi. Ang kalabanan sang aton mga kauturan nagatrabaho sing madamo nga inoras para maaman ang mga kinahanglanon sang ila pamilya. Ang iban nagabiyahe sing madamo nga oras kada adlaw pakadto sa ila trabaho kag pauli sa ila balay. Madamo ang may mabug-at nga mga obra. Kapoy gid katama ining mapisan nga mga kauturan pagpauli nila sa gab-i! Halos wala na sila sing kusog para magtuon.

2. San-o ka nagatuon?

² Pero dapat naton hatagan sing tion ang pagtuon sang Pulong sang Dios kag sang aton mga publikasyon. Importante gid ini para may maayo kita nga kaangtanan kay Jehova kag para mabaton naton ang kabuhi nga wala sing katapusan! (1 Tim. 4:15) Ang iban aga pa nagabugtaw kada adlaw para magtuon, kay amo ini ang tion nga malinong sa ila balay kag nakapahuway na sila. Ang iban naman nagatuon kag nagapamalandong sing pila ka minuto sa gab-i kon matawhay na kag wala sing mga tublag.

3-4. Ano nga mga pagbag-o ang ginhimo sa kadamuon sang aton mga publikasyon, kag ngaa?

³ Mahimo nga nagapati ka man nga importante nga hatagan sing tion ang pagtuon. Pero ano ang dapat naton tun-an? Basi nagapamensar ka, ‘Kadamo sang balasahon. Daw indi ko na ini mabasa tanan.’ Ang iban makabasa sang tanan naton nga publikasyon kag makalantaw sang tanan naton nga video, pero madamo sang aton mga kauturan ang indi makahimo sini. Nabal-an ini sang Nagadumala nga Hubon. Gani sang nagligad lang nga mga tuig, nagdesisyon sila nga ibanan ang kadamuon sang mga  publikasyon nga ginaimprinta kag makita sa internet.

⁴ Halimbawa, wala na kita sang Tuigan nga Libro sang mga Saksi ni Jehova, kay madamo na sang makapalig-on nga mga eksperiensia sa jw.org^® kag sa mga programa sa JW Broadcasting^® kada bulan. May tatlo na lang ka isyu sang publiko nga edisyon sang Ang Lalantawan kag tatlo ka isyu sang Magmata! kada tuig. Ginhimo ini nga mga pagbag-o indi para may tion kita sa mga hilikuton nga wala labot sa aton pagsimba. Ginhimo ini para makakonsentrar kita sa “mas importante nga mga butang.” (Fil. 1:10) Binagbinagon naton kon paano naton mauna ang mas importante kag kon paano kita makabenepisyo pa gid sa aton pagtuon sang Biblia.

5-6. Ano nga mga publikasyon ang dapat naton tun-an sing maayo?

⁵ Ano ang unahon naton nga tun-an? Dapat naton hatagan sing tion kada adlaw ang pagtuon sa Pulong sang Dios. Malip-ot na lang ang nakaiskedyul nga pagabasahon sa Biblia kada semana para may madamo kita nga tion sa pagpamalandong sa aton nabasa kag sa dugang nga pag-research. Dapat tinguhaan naton nga indi lang basta mabasa ini, kundi magtudok gid sa aton tagipusuon ang mensahe sang Biblia kag magsuod pa gid kita kay Jehova.—Sal. 19:14.

⁶ Ano pa gid ang aton tun-an sing maayo? Dapat man naton handaan ang Pagtinuon sa Ang Lalantawan, ang Pagtinuon sang Kongregasyon sa Biblia, kag ang iban pa nga pagabinagbinagon sa miting kon midweek. Dapat man naton basahon ang kada isyu sang Ang Lalantawan kag Magmata!

7. Dapat bala kita maluyahan sing buot kon indi naton mabasa kag malantaw ang tanan nga makita sa aton website kag sa JW Broadcasting?

⁷ ‘Dapat gid man basahon ang Biblia kag ang aton mga publikasyon,’ mahimo isiling mo, ‘pero may mga impormasyon pa gid sa aton website nga jw.org kag mga video sa JW Broadcasting. Ti, indi ko na ini mabasa kag malantaw tanan!’ Binagbinaga ini nga ilustrasyon: Kadamo sang manamit nga pagkaon sa isa ka restawran. Indi posible nga matilawan sang mga nagakaon sa sini ang tanan nga pagkaon diri. Gani nagapili lang sila sang ila kaunon. Pareho man sa sini kon indi naton mabasa kag malantaw ang tanan nga makita sa aton website kag JW Broadcasting. Gani indi maluyahan sing buot. Basaha ukon lantawa kon ano lang ang masarangan mo. Binagbinagon naman naton kon ano ang buot silingon sang pagtuon kag kon ano ang himuon naton para makabenepisyo pa gid kita sa sini.

8. Ano ang himuon naton kon nagahanda kita para sa Pagtinuon sa Ang Lalantawan, kag ano ang mabenepisyo mo sa sini?

⁸ Kon nagatuon ka, nagakonsentrar ka sa imo ginabasa para may importante ka nga matun-an. Indi lang ini pahapyaw nga pagbasa sa isa ka artikulo kag pagkurit sa mga sabat. Halimbawa, kon nagahanda ka para sa Pagtinuon sa Ang Lalantawan, basaha anay ang seksion nga “Ang Binagbinagon sa Sini nga Artikulo.” Masunod, basaha kag binagbinaga ang tig-ulo sang artikulo, ang mga subtitulo, kag ang mga pamangkot sa repaso. Dayon, basaha sing maayo ang artikulo nga wala nagadali. Pangitaa ang dinalan nga nagasumaryo sang panguna nga punto, nga masami amo ang una nga dinalan sa parapo. Magabulig ini sa imo nga mabal-an kon ano ang ginapaathag sang parapo. Samtang ginabasa mo ang artikulo, pamensara kon paano ginapaathag sang kada parapo ang subtitulo kag ang panguna nga tema sang artikulo. Isulat ang mga tinaga nga indi mo maintiendihan kag ang bag-o nga mga punto nga gusto mo pa gid mahangpan paagi sa pag-research.

9. (a) Ngaa dapat naton binagbinagon sing maayo ang mga teksto kon nagahanda kita para sa Pagtinuon sa Ang Lalantawan, kag paano naton ini himuon? (b) Suno sa Josue 1:8, ano pa ang himuon naton samtang ginabasa naton ang mga teksto?

 ⁹ Ginabuligan kita sang Pagtinuon sa Ang Lalantawan nga mahangpan ang Biblia. Gani kon nagahanda para sa sini, binagbinaga sing maayo ang mga teksto, ilabi na ang mga pagabasahon kon tun-an na sa kongregasyon ang artikulo. Binagbinaga kon paano ginasuportahan sang importante nga mga tinaga ukon prase sa mga teksto ang panguna nga punto sa parapo. Isa pa, samtang ginabasa mo ang mga teksto, pamalandungi ini kag hunahunaa man kon paano mo ini maaplikar sa imo kabuhi.—Basaha ang Josue 1:8.

10. Suno sa Hebreo 5:14, ngaa dapat man tudluan sang mga ginikanan ang ila kabataan kon paano magtuon kag mag-research sa ila pangpamilya nga pagsimba?

¹⁰ Gusto gid sang mga ginikanan nga malipay ang ila kabataan sa ila Pangpamilya nga Pagsimba kada semana. Dapat nila pirme planuhon kon ano ang ila pagabinagbinagon sa ila pangpamilya nga pagsimba, pero indi buot silingon nga dapat may ara gid sila espesyal kag makawiwili nga mga proyekto kada semana. Puede sila maglantaw sang isa ka programa sa JW Broadcasting nga ginapagua kada bulan ukon maghimo sang isa ka proyekto, pareho sang paghimo sang isa ka modelo sang arka ni Noe. Pero dapat man tudluan ang mga bata kon paano magtuon. Halimbawa, dapat matun-an nila kon paano maghanda para sa mga miting sang kongregasyon ukon paano mag-research parte sa isa ka sitwasyon nga naatubang nila sa eskwelahan. (Basaha ang Hebreo 5:14.) Kon tun-an nila ang isa ka topiko sa Biblia sa balay, madali nila maintiendihan ang mga ginatudlo sa mga miting sang kongregasyon, mga asembleya, kag mga kombension, nga kon kaisa wala sing nalakip nga video. Pero nagadepende gihapon sa edad kag kinaiya sang mga bata ang kalawigon sang kada pagtuon.

11. Ngaa dapat naton tudluan ang aton mga ginatudluan sang Biblia kon paano magtuon?

¹¹ Dapat man matun-an sang mga ginatudluan naton sang Biblia kon paano magtuon. Sang nagsugod sila sa pagtuon, nalipay kita kon nagahanda sila para sa pagtuon ukon para sa mga miting sang kongregasyon paagi sa pagkurit sang mga sabat sa ila ginatun-an. Pero dapat naton sila tudluan kon paano mag-research kag magtuon. Gani, kon may problema sila, imbes nga mamangkot dayon sa iban sa kongregasyon kon ano ang ila himuon, kabalo sila mangita sang impormasyon nga makabulig sa ila paagi sa pag-research sa aton mga publikasyon.

12. Ano ang puede nga mangin mga tulumuron naton kon nagatuon kita?

¹² Kon indi ka palatuon, basi magsiling ka nga indi ka gid manamian sa pagtuon. Pero posible nga manamian ka. Sa primero, magtuon sing malip-ot lang anay, kag dayon amat-amat nga palawiga ini. Pamensara kon ngaa nagatuon ka. Ang aton pinakaimportante nga tulumuron amo nga gusto naton mangin suod pa gid kay Jehova. Ang isa pa nga puede nga mangin tulumuron naton amo nga masabat naton ang ginpamangkot sa aton ukon mag-research parte sa aton problema.

13. (a) Ano ang puede himuon sang isa ka pamatan-on nga nagaeskwela para mapaathag ang iya mga ginapatihan? (b) Paano mo masunod ang laygay sa Colosas 4:6?

¹³ Halimbawa, isa bala ikaw ka pamatan-on nga nagaeskwela? Mahimo nga ang tanan mo nga klasmeyt nagapati sa ebolusyon. Gusto mo ipaathag sa ila kon ngaa nagapati ka sa ginatudlo sang Biblia nga gintuga kita, pero daw nabudlayan ka. Gani dapat mo ini tun-an sing maayo. Duha ang puede nga mangin tulumuron mo: (1) mapabakod ang imo pagpati nga gintuga sang Dios ang tanan nga butang kag (2) mabal-an mo kon paano mapaathag sing maayo ang kamatuoran. (Roma 1:20; 1 Ped. 3:15) Mahimo ka anay mamangkot, ‘Ano ayhan ang isiling sang akon mga klasmeyt kon ngaa nagapati sila sa ebolusyon?’ Dayon mag-research sing maayo sa aton mga publikasyon. Makita mo nga indi gid man gali mabudlay ipaathag ang imo mga ginapatihan. Ang kalabanan nagapati sa ebolusyon bangod amo ini ang ginasiling sang isa nga ginarespeto nila. Puede mo masugid sa ila ang isa ukon duha ka punto nga imo natun-an, kag mahimo nga may mabuligan ka nga gusto gid makatuon sang kamatuoran.—Basaha ang Colosas 4:6.

14-16. (a) Ano ang himuon mo para madugangan ang nabal-an mo sa isa ka libro sa Biblia? (b) Ipaathag kon paano ka mabuligan sang mga teksto nga ginsambit sa parapo para mahangpan mo pa gid ang libro ni Amos. (Tan-awa man ang kahon nga “ Kilalaha Pa Gid ang mga Tawo nga Ginsambit sa Biblia.”)

¹⁴ Ibutang ta nga sa masunod nga miting sang kongregasyon, basahon naton kag binagbinagon ang isa sa malip-ot nga mga libro sang mga tagna sa Biblia, kag mahimo nga diutay lang ang nabal-an mo sa sini. Para makabenepisyo ka sa pagbinagbinag sa sini, dapat ka mangin interesado nga madugangan ang nabal-an mo sa sini nga libro. Ano ang himuon mo?

¹⁵ Una, pamangkuta ang imo kaugalingon: ‘Ano ang nabal-an ko parte sa manunulat sini nga libro? Sin-o sia, diin sia nagaistar, kag ano ang iya obra?’ Kon magtuon pa gid kita parte sa manunulat, mas mahangpan naton ang gingamit niya nga mga tinaga ukon mga ilustrasyon. Samtang ginabasa mo ini nga libro sa Biblia, pangitaa ang mga tinaga nga nagapakita sang mga kinaiya sang manunulat.

¹⁶ Masunod, makabulig man kon mabal-an mo kon san-o ginsulat ini nga libro. Makita mo ini sa “Listahan sang mga Libro sa Biblia” sa katapusan nga bahin sang Bag-ong Kalibutan nga Badbad sang Balaan nga Kasulatan. Puede mo man tan-awon ang tsart parte sa mga manalagna kag mga hari sa Apendise A6. Bangod ang imo ginatun-an isa ka libro sang mga tagna, mas maayo kon mabal-an mo ang kahimtangan sang mga tawo sang panahon nga ginsulat ini. Ano ang malain nga mga panimuot ukon mga ginahimo sang mga tawo sadto nga nangin rason kon ngaa ginpadala ang manalagna sa ila? Sin-o ang iban pa nga nagkabuhi sadto sang panahon sang manunulat? Para mahangpan mo pa gid ini, basi kinahanglan mo man basahon ang iban pa nga mga libro sa Biblia. Halimbawa, para mahangpan mo pa gid  ang kahimtangan sang panahon ni manalagna Amos, makabulig ang pagbasa sa pila ka teksto sa 2 Hari kag 2 Cronica, nga nalakip sa marhinal nga mga reperensia sang Amos 1:1. Mahimo mo man basahon ang libro ni Oseas, nga posible nga nagkabuhi sang panahon ni Amos. Makabulig ini nga mga libro para mahangpan mo pa gid ang kahimtangan sang panahon ni Amos.—2 Hari 14:25-28; 2 Cron. 26:1-15; Os. 1:1-11; Amos 1:1.

17-18. Gamita ang mga halimbawa sa mga parapo ukon maghatag sang imo halimbawa para ipakita nga manamian ka pa gid sa pagtuon sa Biblia kon talupangdon mo ang mga detalye nga daw indi importante.

¹⁷ Kon nagabasa sang Biblia, mas maayo kon gusto gid naton nga madamo kita sang matun-an. Halimbawa, ibutang ta nga ginabasa mo ang ika-12 nga kapitulo sang mga tagna ni Zacarias parte sa kamatayon sang Mesias. (Zac. 12:10) Sang ara ka na sa bersikulo 12, nabasahan mo nga “ang pamilya sang panimalay ni Natan” magahibi kag masubuan gid kon mapatay ang Mesias. Sa baylo nga lampasan lang ini nga detalye, nagpundo ka sa pagbasa kag namangkot: ‘Ano ang kaangtanan sang panimalay ni Natan sa Mesias? Sa diin ayhan ako makakuha sang dugang nga impormasyon parte sa sini?’ “Nag-imbestigar” ka paagi sa pag-research. Nakita mo sa marhinal nga mga reperensia ang 2 Samuel 5:13, 14, kag natun-an mo sa sini nga si Natan isa sa mga anak ni Hari David. Ang ikaduha nga teksto sa marhinal nga mga reperensia amo ang Lucas 3:23, 31, kag ginapakita sini nga si Jesus kaliwat ni Natan, nga isa ka katigulangan ni Maria. (Tan-awa ang publiko nga edisyon sang Ang Lalantawan, Num. 3, 2016, p. 9, par. 1-3.) Nagdayaw ka gid sa imo nadiskobrehan! Kabalo ka nga gintagna nga si Jesus magahalin sa pamilya ni David. (Mat. 22:42) Pero si David may sobra 20 ka anak nga lalaki. Gani dalayawon gid nga  ginpakilala ni Zacarias ang panimalay ni Natan nga may rason nga magkasubo kon mapatay si Jesus.

¹⁸ Binagbinaga ang isa pa ka halimbawa. Sa Lucas kapitulo 1, mabasa naton nga ginduaw sang anghel nga si Gabriel si Maria kag ginsugiran sia sang matabo sa ibun-ag niya nga bata: “Mangin halangdon sia kag tawgon nga Anak sang Labing Mataas, kag ihatag ni Jehova nga Dios sa iya ang trono ni David nga iya amay, kag magahari sia sa panimalay ni Jacob sing dayon.” (Luc. 1:32, 33) Mahimo nga matalupangdan lang naton ang una nga ginsiling ni Gabriel, nga si Jesus tawgon nga “Anak sang Labing Mataas.” Pero gintagna man ni Gabriel nga “magahari” si Jesus. Gani mahimo naton pamensaron kon ano ayhan ang ginhunahuna ni Maria sa ginsiling ni Gabriel. Naghunahuna ayhan sia nga buslan ni Jesus si Hari Herodes ukon ang isa sa mga magabulos kay Herodes bilang manuggahom sa Israel? Kon mangin hari na si Jesus, si Maria ang mangin iloy sang hari, kag magaistar ang iya pamilya sa palasyo. Pero wala sing rekord sa Biblia nga nahunahuna ini ni Maria ukon ginpamangkot niya si Gabriel parte sa sini. Wala man kita sing mabasa nga nagpangabay si Maria nga hatagan sia sing pinasahi nga posisyon sa Ginharian, pareho sang ginhimo sang duha ka disipulo ni Jesus. (Mat. 20:20-23) Paagi sa sini nga detalye, makumbinsi pa gid kita nga mapainubuson gid nga babayi si Maria!

19-20. Suno sa Santiago 1:22-25 kag 4:8, ano ang mga tulumuron naton kon nagatuon kita?

¹⁹ Dumdumon naton nga ang aton pinakaimportante nga tulumuron sa pagtuon sang Pulong sang Dios kag sang aton mga publikasyon amo nga gusto naton mangin suod pa gid kay Jehova. Gusto man naton makita “kon ano [gid kita] nga sahi sang tawo” kag kon ano ang mga dapat naton bag-uhon para kahamut-an kita sang Dios. (Basaha ang Santiago 1:22-25; 4:8.) Gani antes kita magsugod sa pagtuon, mangamuyo kita kay Jehova nga hatagan niya kita sang iya balaan nga espiritu. Pangabayon naton sia nga buligan kita nga makabenepisyo pa gid sa aton pagatun-an kag makita naton ang mga dapat naton bag-uhon sa aton kaugalingon.

²⁰ Kabay pa nga mangin pareho kita sang matutom nga alagad sang Dios nga ginlaragway sang salmista: “Nagakalipay sia sa kasuguan ni Jehova, kag ginabasa niya sa mahinay nga tingog ang Iya kasuguan adlaw kag gab-i. . . . Ang tanan nga ginahimo niya magamadinalag-on.”—Sal. 1:2, 3.