Ang Pagtamod sang Biblia

Ano ang Maalamon nga Pagtamod sa Kuarta?

“ANG kuarta pangamlig,” siling sang Biblia. (Manugwali 7:12) Ang kuarta makabakal sing pagkaon, panapton, kag puluy-an, gani pangamlig ini sa mga problema nga tuga sang kapigaduhon. Sa pagkamatuod, mabakal sang kuarta ang halos tanan nga materyal nga butang. Ini “nagasabat sang tanan nga butang,” siling sang Manugwali 10:19.

Ginapalig-on kita sang Pulong sang Dios nga mangin mapisan agod maatipan naton ang aton mga kinahanglanon kag sang aton pamilya. (1 Timoteo 5:8) Kon bunayag kita kag mapisan may kaayawan kita, dignidad, kag kalig-unan.—Manugwali 3:12, 13.

Dugang pa, ang aton kapisan makabulig sa aton nga mangin maalwan. “May kapin nga kalipay sa paghatag sangsa pagbaton,” siling ni Jesus. (Binuhatan 20:35) Ini nga kalipay matigayon kon malipayon naton nga ginagamit ang aton manggad agod buligan ang nagakinahanglan, ilabi na ang mga masigka-Cristiano, ukon magbakal sing regalo para sa isa nga aton ginahigugma.—2 Corinto 9:7; 1 Timoteo 6:17-19.

Ginpalig-on ni Jesus ang iya mga sumulunod nga mangin maalwan, indi sa pila ka higayon lamang kundi subong kinabatasan, subong isa ka dalanon sang kabuhi. “Ugalia ang paghatag,” siling niya. (Lucas 6:38) Amo man nga prinsipio ang naaplikar sa paghatag agod pasanyugon ang intereses sang Ginharian sang Dios. (Hulubaton 3:9) Sa pagkamatuod, ang aton pagkaalwan sa sining paagi nagabulig sa aton nga “magpakig-abyan” kay Jehova kag sa iya Anak.—Lucas 16:9.

Mag-andam sa “Gugma sa Kuarta”

Ang makagod nga mga tawo talagsa lang nagapanghatag, kag kon manghatag man sila, may malain sila nga motibo. Masami nga ang kabangdanan  sini amo ang ila gugma sa kuarta, nga sa baylo sang pagdumdom nila nga makahatag sing kalipay, masami nga ginabangdan sang kasubo. “Ang gugma sa kuarta amo ang gamot sang tanan nga sahi sang makahalalit nga mga butang, kag paagi sa paghingamo sini nga gugma ang iban nagtalang gikan sa pagtuo kag nagbuno sang ila kaugalingon sang madamo nga kasakit,” siling sang 1 Timoteo 6:10. Ngaa ang gugma sa kuarta indi gid makaalayaw kag makasakit pa gani?

Ang isa sa mga rason amo nga ang handum sang makagod nga tawo para sa manggad wala gid sing kabulusgan. “Ang nagahigugma sang pilak indi mabusog sing pilak,” siling sang Manugwali 5:10. Busa, ang mga mahigugmaon sa kuarta ‘nagbuno sang ila kaugalingon’ sing dayon nga kabang-awan. Dugang pa, ang ila kakagod nangin kabangdanan sang mahuyang nga mga kaangtanan, di-malipayon nga pamilya, kag kakulang sing nagakaigo nga pahuway pa gani. “Matam-is ang katulugon sang isa nga nagaalagad, bisan nagakaon sia sing diutay ukon madamo; apang ang pagkabusog sang manggaranon indi magtugot sa iya sa pagtulog.” (Manugwali 5:12) Labaw sa tanan, ang gugma sa kuarta di-kalahamut-an sa Dios.—Job 31:24, 28.

May madamo nga halimbawa sa Biblia kag sa sekular nga kasaysayan tuhoy sa mga tawo nga nangawat, nagpatiko sang katarungan, nakighilawas, nagpatay, nagluib sa iban, kag nagbutig—agod makakuarta. (Josue 7:1, 20-26; Miqueas 3:11; Marcos 14:10, 11; Juan 12:6) Sa tion sang ministeryo ni Jesus sa duta, gin-agda niya ang “manggaranon gid” nga pamatan-on nga manuggahom nga magsunod sa iya. Sing makapasubo, ginbalibaran sang tawo ining tumalagsahon nga pangagda bangod may daku ini nga epekto sa iya pinansial. Bangod sini, si Jesus nagtuaw: “Mabudlay gid para sa mga may kuarta ang magsulod sa ginharian sang Dios!”—Lucas 18:23, 24.

Sa karon nga “katapusan nga mga adlaw,” ilabi na nga dapat magbantay ang mga Cristiano bangod subong sang gintagna, ang mga tawo sa kabilugan “mahigugmaon sa kuarta.” (2 Timoteo 3:1, 2) Ang matuod nga mga Cristiano nga padayon nga nagahunahuna sang ila espirituwal nga kinahanglanon wala maimpluwensiahan sini nga kakagod, kay may ginapanag-iyahan sila nga labaw pa sa kuarta.

Isa ka Butang nga Labaw Pa sa Kuarta

Bisan pa nagsiling si Hari Solomon nga ang kuarta pangamlig, nagsiling man sia nga ang “kaalam pangamlig” bangod “ginatipigan nga buhi sang kaalam ang may iya sini.” (Manugwali 7:12) Ano ang buot niya silingon? Ginpatuhuyan diri ni Solomon ang kaalam nga napasad sa sibu nga ihibalo sang Kasulatan kag sa nagakaigo nga kahadlok sa Dios. Ang diosnon nga kaalam labaw pa sa kuarta kay makaamlig ini sa isa ka tawo gikan sa madamo nga tugalbong sa kabuhi kag sa hilaw nga kamatayon pa gani. Subong man, kaangay sang korona, ang mga tawo nga nagapakita sing matuod nga kaalam ginabayaw kag ginatahod. (Hulubaton 2:10-22; 4:5-9) Kag bangod nagabulig ini agod kahamut-an sang Dios, gintawag ini nga “kahoy sang kabuhi.”—Hulubaton 3:18.

Ang mga luyag gid makatigayon sining kaalam kag handa nga pangitaon ini, nakahibalo nga mahapos lang ini matigayon. “Anak ko, kon . . . magtuaw ka para sa paghangop kag magbayaw sang imo tingog para sa paghantop, kon padayon mo ini nga pangitaon subong sang pilak, kag padayon mo ini nga pangitaon subong sang tinago nga mga bahandi, nian mahangpan mo ang kahadlok kay Jehova, kag masapwan mo ang ihibalo gid sa Dios. Kay si Jehova nagahatag sing kaalam; gikan sa iya baba nagagua ang ihibalo kag paghantop.”—Hulubaton 2:1-6.

Bangod ginapabaloran sang matuod nga mga Cristiano ang kaalam sangsa kuarta, nabatyagan nila ang paghidait, kalipay, kag kalig-unan nga wala sa mga mahigugmaon sa kuarta. Ang Hebreo 13:5 nagasiling: “Ang inyo paagi sang pagkabuhi mangin wala sing gugma sa kuarta, samtang kontento kamo sa mga butang karon. Kay [ang Dios] nagsiling: ‘Indi ko gid kamo pagbayaan ukon pagpatumbayaan.’” Indi gid mahatag sang kuarta ini nga kalig-unan.

NAPALIGBAN MO NA BALA?

▪ Paano ang kuarta mangin isa ka pangamlig?—Manugwali 7:12.

▪ Ngaa ang diosnon nga kaalam labaw pa sa kuarta?—Hulubaton 2:10-22; 3:13-18.

▪ Ngaa dapat naton likawan ang gugma sa kuarta?—Marcos 10:23, 25; Lucas 18:23, 24; 1 Timoteo 6:9, 10.