Magdiretso sa kaundan

Magdiretso sa listahan sang kaundan

Determinado nga Magmanggaranon sa Espirituwal

Determinado nga Magmanggaranon sa Espirituwal

 Determinado nga Magmanggaranon sa Espirituwal

AGOD magmanggaranon ka sa materyal, kinahanglan ang bug-os nga panikasog kag sakripisyo. Amo man sa espirituwal nga butang. Amo sini ang buot silingon ni Jesus sang magsiling sia: “Magtipon kamo para sa inyo kaugalingon sing mga bahandi sa langit.” (Mateo 6:20) Ang espirituwal nga manggad wala nagatipon sang ila kaugalingon. Ang isa ka tawo indi magmanggaranon sa espirituwal bangod lamang may relihion sia subong nga ang isa ka tawo indi man magmanggaranon sa materyal bangod lamang may patago sia sa bangko. Agod mapalambo mo ang suod nga kaangtanan sa Dios kag mangin espirituwal nga tawo ikaw nga may espirituwal nga mga kinaiya, kinahanglan ang determinasyon, tion, bug-os nga panikasog, kag sakripisyo.—Hulubaton 2:1-6.

Matigayon Mo Bala Ining Duha ka Butang?

Mahimo bala nga ang isa ka tawo mangin manggaranon sa espirituwal kag bugana man sa materyal nga mga butang? Siguro, apang agod magmadinalag-on ka, isa lamang sini ang dapat mo tinguhaan. Nagsiling si Jesus: “Indi kamo makapaulipon sa Dios kag sa Manggad.” (Mateo 6:24b) Ngaa indi? Bangod ang pagtinguha sa espirituwal nga mga manggad kag sa materyal nga mga manggad nagasumpakilay. Amo kon ngaa, antes singganan ang iya mga disipulo nga magtipon sing espirituwal nga mga manggad, nagsiling si Jesus: “Untati ninyo ang pagtipon para sa inyo kaugalingon sing mga bahandi sa duta.”—Mateo 6:19.

Kon supakon sang isa ang laygay ni Jesus kag tinguhaan niya ang espirituwal kag materyal nga mga manggad, ano ang matabo? Nagsiling si Jesus: “Wala sing makapaulipon sa duha ka agalon; kay dumtan niya ang isa kag higugmaon ang isa, ukon unungan niya ang isa kag tamayon ang isa. ” (Mateo 6:24a) Kon dunganon sang isa ining duha ka butang, bisan pa ginaatipan niya ang espirituwal nga mga butang bangod dapat niya ini himuon, mahimo ini mangin isa ka sablag nga daw pirme nagaupang sa iya. Sa baylo nga magsandig sa Dios, mahimo pa gani nga tamdon sang isa ang kuarta kag ang mabakal sini subong amo ang panguna nga paagi sa paglubad sa mga problema. Matuod gid ang ginsiling ni Jesus: “Kon diin ang imo manggad didto man ang imo tagipusuon.”—Mateo 6:21, Today’s English Version.

Dapat pamensaran gid sang tagsa ka Cristiano ini nga laygay sang Biblia antes sia magdesisyon kon diin isentro ang iya tion, igtalupangod, kag ang iya tagipusuon. Bangod ang Dios wala nagabutang sing espesipiko nga limite kon sig-ano ang sarang matigayon sang isa ka Cristiano, wala ini nagakahulugan nga ang paglalis sa Iya mga paandam batok sa kakagod wala sing silot. (1 Corinto 6:9, 10) Subong sang nabinagbinag na naton, apektado ang espirituwal, hunahuna, kag emosyon sang bisan sin-o nga nagasupak sa laygay sang Biblia kag nagapalambo sing determinasyon nga magmanggaranon. (Galacia 6:7) Sa pagpatuhay, nagsiling si Jesus nga malipayon ang bisan sin-o nga mahunahunaon sa iya espirituwal nga mga kinahanglanon. (Mateo 5:3) Nahibaluan gid sang aton Manunuga kag sang iya Anak kon ano ang labing maayo para sa aton kalipay kag kaayuhan!—Isaias 48:17, 18.

 Isa ka Desisyon nga Indi Mo Paghinulsulan

Ano ang pilion mo, ang Dios ukon ang Manggad? Matuod, dapat man kita magtrabaho para sa aton materyal nga mga kinahanglanon. Sa iya nahauna nga sulat kay Timoteo, nagsiling si apostol Pablo: “Kon sin-o man ang wala nagaaman para sa mga natungod sa iya, kag ilabi na para sa mga katapo sang iya panimalay, ginapanghiwala niya ang pagtuo kag malain pa sa tawo nga wala sing pagtuo.” Ginpalig-on man ni Pablo ang mga Cristiano nga ipahamtang ang ila paglaum, indi sa kuarta, kundi sa Dios kag “mangin manggaranon sa maayong mga buhat.” (1 Timoteo 5:8; 6:17, 18) Ano ang imo dapat unahon? Ano ang imo tinguhaan? Ang una gid sa maayo nga mga buhat nga ginpatuhuyan ni Pablo amo ang pagbantala kag paghimo sing disipulo nga hilikuton nga gintugyan ni Jesus sa iya mga disipulo. (Mateo 28:19, 20) Kon boluntaryo nga ginapasimple sang mga Cristiano ang ila kabuhi, indi lamang agod magtulutawhay kag mangin makalilipay ang ila kabuhi kundi agod madugangan pa ang ila pagpakigbahin sa sining mapuslanon nga hilikuton, “nagatipon [sila] para sa ila kaugalingon sing maayo nga sadsaran para sa palaabuton.” Kag bisan sa karon mapamatud-an nila nga ang espirituwal nga manggad “O daw ano kaayo pa sangsa bulawan!”—1 Timoteo 6:19; Hulubaton 16:16; Filipos 1:10.

Binagbinaga ang eksperiensia ni Eddie, nga ang iya pamilya nangin mga Saksi ni Jehova sang gamay pa sia. Natabo nga nagtalabog ang tanan nga pagkabutang sang ila pamilya kag napilitan sila nga maghalin sa ila balay. Nagpaathag si Eddie: “Nagakabalaka gid ako anay kon ano ang matabo kon mawad-an gid kami sang tanan nga butang. Nawad-an kami matuod sadto. Kag nahibaluan mo bala kon ano ang natabo? Wala lang! Wala kami mawad-an sing kalan-on, sing mainom, kag sing biste. Wala kami ginpabay-an ni Jehova, kag sang ulihi nakabawi kami. Gintudluan ako sini nga eksperiensia nga patihan gid ang ginsaad ni Jesus sa Mateo 6:33—nga kon unahon naton ang Ginharian sang Dios, indi gid kita dapat mabalaka tuhoy sa aton materyal nga mga kinahanglanon.” Nagaalagad karon si Eddie, upod sa iya asawa, subong isa ka bug-os tion nga nagalakbay nga ministro. Bastante sila sa materyal. Mas importante, manggaranon sila sa espirituwal.

Indi Matakus nga mga Benepisyo

Indi kaangay sang mga bahandi sa duta, nga sarang makawat, ang espirituwal nga mga manggad mahimo mangin permanente. (Hulubaton 23:4, 5; Mateo 6:20) Matuod, mabudlay takson ang espirituwal nga pag-uswag. Indi subong sang pag-uswag sa materyal, mabudlay hambalon kon tubtob sa ano na nga kasangkaron ang gin-uswag sang isa kon tuhoy sa gugma, kalipay, ukon pagtuo. Apang indi matakus ang padya sang espirituwal nga mga manggad. Tuhoy sa mga disipulo nga magabiya bisan sa ila mga balay kag mga uma, huo, sa ila palangabuhian, agod atipanon ang espirituwal nga mga butang, nagsiling si Jesus: “Sa pagkamatuod nagasiling ako sa inyo, Wala sing bisan sin-o nga nagbiya sang balay ukon mga utod nga lalaki ukon mga utod nga babayi ukon iloy ukon amay ukon mga anak ukon mga uma tungod sa akon kag tungod sa maayong balita ang indi makabaton sing isa ka gatos ka pilo karon sa sini nga panag-on, sing mga balay kag mga utod nga lalaki kag mga utod nga babayi kag mga iloy kag mga anak kag mga uma, upod sang mga paghingabot, kag sa nagapakari nga sistema sing mga butang sang kabuhi nga walay katapusan.”—Marcos 10:29, 30.

Ano ang unahon mo? Ang Dios ukon ang manggad?

[Mga retrato sa pahina 8, 9]

Ginapanikasugan mo bala ang materyal nga mga manggad . . .

. . . ukon ang espirituwal nga mga manggad?