Yaba nanaid daggega

Menú baid daggega

Índice daggega

Jehovági sunmagmalad

dule

Bibliagine ¿nue igi soglenai?

 CAPÍTULO 13

Bab abesulid anmar na sabsur saed

Bab abesulid anmar na sabsur saed
  • ¿Igi Bab Dummad anmar dagge?

  • ¿Igi Bab goe osuloged dagge?

  • ¿Ibu be imaggosuli mag be iddoger Bab dula be sedii?

1. ¿Doa bela ibmar obinyisa?

PROFETA Jeremías sogsad: “Bab Jehovádi, Bab Dummad nabbiragwadid, Bab Dummad dula sagla maidid” (Jeremías 10:10). Anba Jehová bela ibmar obinyisbalid. Aaga ángelmar sogsad: “Ar bela ibmar naid be obinyisad, be sogedba bela ibmar gudiid, bela be sogedba ibmar binyis buggwabalid” (Apocalipsis 4:11). Geb rey David, Jehová nug odummogega namasad: “Bee be bela ibmar dula sediidid” (Salmo 36:9TNM). Degsoggu, Bab nuggi anmar dula gudiid.

2. ¿Ibu Bab Dummad anmarga ugmai anmar dula gudi guega?

2 Jehová bane bane dula anmar sediidbalid (Gusmalad 17:28). Geb anmar nued iddodi guega anmarga ugmaid: masi, burwa, dii, geb anmarga nabbaneg nasisbalid (Gusmalad 14:15-17 absogo). Auggine, bur bule nued iddodi guega, anmar, Bab igarmar mamaid wisguer gebed, geb eba dabalir gebed (Isaías 48:17, 18).

MER NA SABSUR SAO

3. ¿Igi Bab Dummad, Abel oburgwilesgu dagsa?

3 Bab abesulid anmar na sabsur saedi, geb anba abesurbalid anmar dulemar bamalad sabsur sabalid. Be iddogena,  Adán massi, Caín, sae e urba Abel abin iddosgua, Jehová ega sogsad, be sae iddodiidba sun ibmar isgana imadoye, auggine Caíndina Jehová iddossulid. “Caín, e urba Abel sarsosad, geb oburgwisad” (Génesis 4:3-8). Bibliagi soglenaid, Jehová, Caín gaamagdii imasye e urba oburgwisadba (Génesis 4:9-11).

4. Bab Dummad, Moisésga igar ugsadgi, ¿igi mer anmar emar saoye sognai?

4 Diggasur gus we ibmar gusad sorba, Jehová, Israel dulemarga igarmar ugsad e sogedba ega arbamalaga. Ar profeta Moisés, we igar ugsasoggua aaga biledaed Moisés igarmarye. Moisés igargi soglenaid: “Melle be dule oburgo” (Deuteronomio 5:17). Mer we ibmar imaggoye soglesadgi Israel dulemarga soglesad, Bab abesurye dulemar sabsur saleged, geb abesurbarye na sabsur samaladi.

5. Goe yoo gwalulegele, ¿igi imaglegedsuli?

5 Goe yoo gwalulegele, ¿Jehová igi dagge? Moisés igargi soglesa goe anba yoo gwaluleged mer osulogoye. Ar bad Jehovágardina dulemogad (Éxodo 21:22, 23 geb Salmo 127:3 absogo). Degsoggu nuedsulid goe yoo gwaluleged osuloged.

6. ¿Ibigala anmar emar isdar daggedsuli?

6 Mag anmar iddogele Bab nuggi anmar dula gudii, anmar emar isdar daggosulid. Bibliagi soglenaid: “Ar dule e gwenad isdar daggele, we dule emar oburgweddo. Ar bemar wismalad dule emar oburgwedi sadegu gudi guosulid” (1 Juan 3:15, TNM). Anmar sadegu gudi sabiele, auggi gwagegi anmar emar isdar dagdiile, merbar anmar emar isdar dagdii guer gebed. Ar aaga nabbis na sabsur imaggardamalad (1 Juan 3:11, 12). Degsoggu anmar na mudsub mudsub sabguer gebed.

7. ¿Dule ibu ibmar ebudiile gwen binsa daglesuli, Bab nuggi dula gudiye?

7 ¿Igi anmardina na san aggwemogoe? Dule burgwebisurdaed, auggi buggidar dulemar binsasun burgwed  amiddamalad. Sigali uwedba, waar uwedba, sigali mummud ebugedba, geb biba uwedbardibe. We ibmarmar dulemarga boni ugged, geb sun dulemar oburgwebalid. Dule we ibmar ebudiile gwen binsa daglesulid Bab nuggi dula gudiye. Ar Babgardina we ibmarmar ibmar isganamalad (Romanos 6:19 geb 12:1 geb 2 Corintios 7:1 absogo). Jehová sogedba anmar ega arbabiele we ibmarmar anmar indagger gebed. Sun beedse gusaled indaggega, auggi Jehová nabir anmar bendagged. Ar Jehová nuggi anmar dula gudisoggua, Jehová yeer iddodaed anmar alamagnair we ibmar isganamar indaggega.

8. ¿Ibiga anmar nuggi emar aggar gued anmar abesuli?

8 Mag anmar iddobalile Bab nuggi anmar dula gudii, emar aggar gued anmar abegosurbalid. Degsoggu dagge daggesur anmar ibmar imaggosulid. Yogsaar anmar carro onanaosulid, geb dodogedgi sabsur emar imaglegele anmar aagi dodogosurbalid (Salmo 11:5). Ebbenne Jehová, Israel neggweburga igar ugsadgi sognaid: “Neg bini be sobsale, neg uwas madaresoggu, melle dule argwanega uwas gaggaba, galu be nasiggoed. Ar deyob be galu nasigsulile, dule wargwen uwasgi argwaddele, degi, burgwenoniggile, begi addaglegoed” (Deuteronomio 22:8). We igar mesilesadba be imagmogar nuediled. Degsoggua, be, neggi arsan nigdibe nueggwa aggwed abeleged mer dule argwanega, geb mer egi boni amibaliga. Geb be, carro nigdibe, urdibe, nued aggwed abeleged. Nue daggo, abaggar be nega, be carro, be urdibe bega boniga gualile, dulemar baigangardibe.

9. Mag anmar iddoger, Bab, ibmar durgan obinyisa, ¿igi anmar ibmar durgan imaggosuli?

9 ¿Igi Jehová ibmar durgan dagbali? Abesurbalid ibmar durgan sabsur saleged. Soged, ibmar durgan unnila nabir oburgweleye gunnega, morga saegardibe, sulirdina melle dulemarga boni amigegardibe (Génesis 3:21; 9:3; Éxodo  21:28). Dule ibmar durgan sabsur imaggele, geb binsa dodogedga oburgwebardibe gwen ibmar durgan Bab nuggi gudii dagge daglesuliled (Proverbios 12:10).

BAB SOGEDBA ABE EBUGO

10. ¿Igi mag iddollege abegi sunmaglealile bela ibmar dula buggwad obardae?

10 Caín, Abel oburgwisgua, Jehová, Caínga sogsad, “be urba ablis be eosad. Emide, a anga sogeyob an iddoged: Anga be igar naboye” (Génesis 4:10). Bab Dummad, Abel abe obarisgua, Abelgine sunmagnainad. Caín, e urba oburgwisadba odurdagleged abelesad. Abel e abe binnasur Jehovásega gornaiyobinad, abin imagmoye. Noé ibagi Dii Dummad wisad sorbali gannar daglenonibalid abegi sunmaglealile bela ibmar dula buggwad obardaye. Dii Dummad wied iduale, dulemar, san gundisurmalanad. Auggine sorba igar gwagnoniggid. Jehová, Noégala geb e masmalagala sogsad: “Bela ibmar dulamalad, [...] sunna bemar gunmaloed”. Auggine Bab Dummad sogsad: “San abebiid, melle [...] gunmalo” (Génesis 1:29; 9:3, 4). Degsoggua ise mag iddollegaled Jehová abegi sunmadele bela ibmar dula buggwad obardae.

11. Noé ibagan aggale, ¿mer igi abe imagmaloye Bab Dummad sogsa?

11 Anmar mag iddogele, Jehová abeba dula anmar sedii, anmar abe gunnosulid. Israel dulemarga igar uglesadgi Jehová sogsad: “Ibmar durgan nabir gulleged magsale, nuudibe, a abe eogoed, geb a abegi uggub mioed. A ulale, an bemarga sogsad: Bemar bibbisaale san abebi gunmalosurye” (Levítico 17:13, 14). Bab Dummad, Noéga sogsad mer ibmar durgan abe gunnoye, geb 800 año sorbali anba we igar gwagsasulid. Degsoggu mag iddolleged, Jehová, israelitamarga sogsad, nabir bemar san gunmarye, auggine abedina mer gunmaloye. Degsoggua nabbagi ibmar  durgan abe eyodamaloenad, wegii gannar Babga abe uglenaiyobi guoenad.

12. ¿Igi abe ebulegoye ebbenne Bab ganguedba igar megisadi emi ibagi anba gwagsasuli?

12 Cristo sordaganga deyob igar uglesmogad. Jesús sorba, apóstolmar, geb baigan Cristo sordagan idusmaladi igar iddosmalad, sogmalaga, ibu igarba damaloe. Weyob igar megisad: “Bab Dummad Burba Isligwaledi, degi, anmarmoga mer bemarga igar duddusur mesed nabir iddosmalad. Unnila we igarmar nue imaglebi abeleged: Bab Dummadyob imaglemaladga ibmar uglemalad, melle gunmalo. Melle galagwensuli neg sidsigi ome diggarba, sui diggarba yolemarbalo. Ibmar gammu gaar oburgwilesmalad, melle gunmarbalo, degi, melle ibmar abebii gunmarbalo” (Gusmalad 15:28, 29; 21:25). Bab Dummad abesulid anmar ibmar baid e anar Bab Dummadga imagged, aayob abesurbalid, anmar yogsaar abe ebuged.

Doctor begala sogele, mer sisa goboye, ¿iggogine yoar be imassunnale?

13. Mer abe ebumaloye soglegedi, ¿igi anmar wisi abe baledse baggar obarnai?

13 Mer abe ebumaloye soglesadi, ¿abe baledse baggar obarilesdibe? Eye, ase baggale. Doctor bega sogdibe mer sisa goboye, ¿soglege iggobardi nabir be, be sangi barye? Suli. Deyobmogad ar mer abe ebugoye soglegedi, obared, mer anmar sangine anmar abe baledi. Degsoggua we igar mesilesadba anmar imagmogagala, mer anmar bibbisaar anmar sangine abe barmogar gebed.

14, 15. Doctormar, Cristo sordaga soggalile, be abe baled abeleye, ¿ibu imaggoe, geb ibigala deyob imaggoe?

14 Auggine, ¿igi gudoe Cristo sorda geggusmairdina, sulirdi operar sasoggalirdibe? Sunna doctormar ega sogdagoed, abe barsulir be burgoye. We dule bibbisaar burgwebisursoggua, sogosulid mer anga ina imagmarye. Auggine abe barye ega soglealirdina, balosulid, geb ina abeba oburaled imagye ega soglearbalile, imaggosurbalid. Ina abeba oburarsulirdina, nabir imagged.

 15 ¿Mer burgwega, Cristo sorda, Bab igargi yolesardibe? Jesús sogsad: ‘Dule budar burgwele, bendaglegosulid; auggine dule an ular burgwerdina, adi bendaglegoed’ (Mateo16:25, TNM). Dule wargwensaar burgwebisulid. Auggine, anmar burgwebisulidba Bab igargi yoleddibe, sunna anmar yoogidse sadegua gudi gussuliled. Degsoggua anmar bibbisaar benguedsulid, Bab igar, anmar bendaggega maid. Ibagwengi anmar burgwenonidibe, Bab Dummad, anmar iegosulid, gannar anmar odurguoed (Gusmalad 24:15; Hebreos 11:6).

16. Babba nue nanamaladi, ¿igi bibbisaar abe imaggoye binsasurmala?

16 Babba nue namaladdi Bab igargi annaoye binsasurmalad, aaga yogsaar abe ebusurmalad. Degsoggu abe gunsurmalad, geb ina abeba oburaledi imagsurmarbalid. * Bibbisaar bensurmalad, Jehová, abe imasadsoggu, Jehová sogoedid igi anmar, abe ebugoe. ¿Be deyob binsamoga?

IGI NABIR UNNILA ABE EBULEGE

17. Ebbenne Israelgine, ¿ibu imaggegarbii unnila nabir abe ebuleye Bab Dummad sogsa?

17 Moisésga igar uglesadgine soglesad, igi unnila abe ebulegoe. Jehová, israelitamarga igar ugsagua sogsad  ibmar durgan, geb dulemala abebali dula gudidaye (Levítico 17:11). Israelitamar, Bab igargi yolesmalale, ibmar durgan oburgwisdamalad, geb we abe abar tabernáculogine agla siidse sesdamalad, geb sorba Bab Dummadse goled neg siidsega sesdamarbalid, nabir we dulega e isgued ielegega. Unnila we ibmar imaggegarbii abe nabir ebulegenad.

18. Jesús, anmar ular burgwisadbali ¿igi anmar nabir yoogidse gudi gudoe?

18 Cristo sordagandi Moisés igar mesisadba ibmar imagsurmalar aggarsulid. Degsoggu ebbennegwayob ibmar durgan Babga uggega oburgosurmalad, geb e abe aglase sedosurmarbalid (Hebreos 10:1). Degi inigwale ebbenne Israel neggweburgi weyob abe ebulesadi oyogegalad weyobbira Bab Massi, Jesucristo, anmar ular abe aryomogoye. Igi capítulo 5 gine anmar durdasa, Jesús, anmar ular burgwisye. Burgwisad sorba Jesús gannar nibnegse  naded. Bab Dummad nued iddosad, Jesús, dulemar ular burgwisadba (Hebreos 9:11, 12). Jesús abe aryosadba nabir anmarga isgued elilemogad, geb nabir anmar sadegu gudi gusmogaled (Mateo 20:28; Juan 3:16). Degsoggu nue abelesad Jesús e abe anmar ular aryogedi (1 Pedro 1:18, 19). Anmar bendaglegega, mer anmar bibbisaar Jesús abe aryosadgi bengumogar gebed.

¿Igi be, abe imaggosuli, mag be iddoger Bab be sedii?

19. Mer soglegega Cristo sorda emar bendassurye, ¿ibu imagger gebe?

19 ¡Nued iddolleged Bab nuggi anmar dula gudiidba! Aa ulale anmar emargala sogoed, bemar, Jesús burgwisadgi bensurmarmogale, nabir bemar sadegua gudi gusmarmogarye. We ibmar bamaladga sogebierba anmar iddogoed, ar anmar, Jehováyobi emar dagmogad (Ezequiel 3:17-21 absogo). We igar anmarga uglesad balilla anmar imagmodibe apóstol Pabloyobi nabir anmar sogmogoed, “bemargi bibbisaale Bab Dummad Igar Nued Maid an gwen oduggussulid. Degisoggu, bemar igi gualile, bemargindo, bar anginsurdo” (Gusmalad 20:26, 27). Anmar, Bab nuggi dula gudii mag na iddogele, geb anmar, abe dodoaggwa dagsurbalile, emarga Bab Dummadgi anmar sunmaggoed, geb e ibmar imagmaidgi anmar sunmagbaloed.

^ parr. 16 Be wisgubiele mer abe balega ibu ina anar ebulesale, absogo garda ¿Cómo puede salvarle la vida la sangre? “Opciones de calidad a la transfusión”, Jehovági sunmagmalad we garda onosad.