Yaba nanaid daggega

Menú baid daggega

Índice daggega

Jehovági sunmagmalad

dule

Bibliagine ¿nue igi soglenai?

 CAPÍTULO 15

Biddi bur Bab igar sunsogedi

Biddi bur Bab igar sunsogedi
  • ¿Bab e igargi sunmagleged bela nued dagge?

  • ¿Igi Bab igar sunsoged mag daglege?

  • ¿Doamar inniggigwadba Babga arbadidii?

1. Bab sogedba anmar ega arbaele, ¿igi anmar gudi gudoe?

JEHOVÁ bela belad anmar binaled, aaga anmar idumaid, anmar nued gudi guega. E sogedba anmar ega arbaele anmar yeer iddodi guoed, geb anmarga dogdar neg beedse guosurbalid. Anmarga ibmar nuegan ugbaloed geb anmar bendagbaloed (Isaías 48:17). Auggi yaisulid Bab igargi dulemar odurdagye sogmalad. Degi inigwale soggwenna Bab igar odurdagsurmalad geb yosgu sogmarbalid ibu dulemar imagged Bab abemai.

2. ¿Igi be wisgusale igi nue Jehovágala arbalege, geb ibuyobye anmar sogsale?

2 Igi be wisgusale ¿igi nue Jehovágala arbalege? Be wisguega soglesulid bela Bab igar odurdagmalad e igar be durdagger gebye. Unnila be durdagged abeleged Bibliagine nue igi soglenai, igi Babga arbalegoe. Anmar sogoena, emi mani isgana yaisurgussoggu bega arbaed uglesdibe mani isgana, mani nuedgi obanega. ¿Be igi imasale? ¿Bela be mani isganamar amisale wisguega weyob dagleye? Suli. Bur nued gusaled be durdaggedi mani nued igi daglege. Be wisgusale mani nued igi daglege, be wisgubaloed igi mani isgana daglemoga. Aayobi, be durdasale biddi Bab igar sunsogedi, mag be dagbaloed doamar noar Bab igar odurdagmala.

3. Bab nued anmar daggega, ¿ibu anmar imagger gebye Jesús sogsa?

3 Nue abeleged Jehová sogedba anmar ega arbaed. Dulemar binsa daed, bela Bab igargi sunmagmalad, Bab nued  dagmaye, auggi Bibliadi deyob sogsulid. Degsoggu dule sogdibe an Babba naye soglesulid we Cristo sordaye. Ar Jesús sogsad: “Ar bela dulemar anga ‘Dummadye, Dummadye’ sogedba, Bab Dummad e neg dagmaidse gwen dogosulid. Unnila, dulemar an Bab nibneggi maid sogedba ibmar saedi nibneggi dogmaloed”. Degsoggu, Bab nued anmar daggega, anmar durdagger gebed, ibu imagged Bab anmar abege geb eba dabalid. Ar Jesús sogsad, Babba dasurmaladi “ibmar isgana saedginbi arbadimar[ye]” (Mateo 7:21-23). Noar Bab igar odurdagmalad mani isganayobmogad, ibmarga gusurmogad. Agga bur dulemar oisgumalad.

4. Jesús sogsagua igarmar sogbo maye, ¿ibu obarisa, geb bia dulemar semai?

4 Jehová abeged bela dulemar sadegu gudi gued. Auggi nabir neg yeer daglegedgi sadegu gudi guega, anmar e sogedba ega arbaer gebed geb eba dabalir gebed. Auggi buggidar Babba dasurmalad, aaga Jesús sogsad: “Yawagag garagwadba dogmalo, ar igar obelolegedse dulemar semaiddina, igar dummadid geb igar bibbisulidid, buggidar webali nadabmalad; ar igar dula gudi guedse dulemar semaiddina wagag garagwadid geb igar garagwadid, geb issegwa dulemar we igar amisdamalad” (Mateo 7:13, 14, TNM). Bab igar sunsogedba dule aggaele sadegu gudi guoed, auggi noar Bab igar odurdagmaladba aggaderdi obelolegoed. Jehovádi abesulid dule wargwensaar obeloleged, aaga bela dulemar e igar durdaggega imagmaid (2 Pedro 3:9). Degsoggu dule Bab igar sunsogedba aggaele sadegu gudi guoed, eba aggasulirdina obelolegoed.

IGI BE WISGUSALE, ¿BIDDI BAB IGAR SUNSOGEDI?

5. ¿Igi anmar wisguoe doamar Bab igar sunsogedba namala?

5 Igi be wisgulesale, ¿biddi ‘igar bendaglegedse dulemar semaidi’? Jesús sogsad dule Bab igar sunsogedba naile e daedgi mag daglegoye. Sogsad: “Aa dulemar e daedgi  be[mar] dagmaloed” ar “sabbi nuegana, e durba nueganbi sanmagged” (Mateo 7:16, 17). Soglesundo dulemar Bab igar sunsogedba namaladi e ibmar odurdaggedgi geb e daedgi mag daglemaloye. Anba bamaladyob yoleddamarmo inigwale, alamagdidiid Jehová sogedba ibmar imagmalaga. Anmar daggoena ibmar sognergwa, wisguega ibu imagmala Bab igar sunsogedba namaladi.

6, 7. ¿Bab sordagan ibu ibmargi emar odurdagmala, geb Jesús igi emar odurdasmoga?

6 Bab igar sunsogedba namaladi Biblia sogedba emar odurdagmalad. Bibliagi soglenaid: “Bab Dummad Garda Narmaggar Maid bela Bab Dummad sogsadba narmaglesad. Bab Dummad Garda ibnuedid: Dulemar odurdaggega, dulemarga sabsur ibmar sogega, dulemar unaega, degi, igar inniggigwadgi dulemar odurdaggegar. Adi, Bab Dummad sordamar inniggi Bab Dummad Garda durdagsadba, bela guagwar nabir ibmar nueganbi imagdii guegar” (2 Timoteo 3:16, 17). Apóstol Pablo e sordaganga sogsad: “Anmar, bemarga Bab Dummad Gaya burbagi sunmagsad, be[mar] iddosmargua, bemar dule gaya burbayob abingassurmalad” (1 Tesalonicenses 2:13). Degsoggu Bab igar sunsogedi dulemar ibmar odurdaggedgi danisulid, Bab gaya burbagi daniggid.

7 Jesucristo Bab Garda ebusdaed emar odurdaggega. Aaga e Babse godsagua sogsad: “Be gaya burba nabbiragwad[id]” (Juan 17:17). Jesús Bab Gaya Burbagi bengussulid, geb aabali emar odurdasbalid. Sogsadaed: “Bab Dummad Gardagi narmaggar maid”, aa sorbali aagi ibmar naid oyosdaed (Mateo 4:4, 7, 10). Aayobi, emi ibagi dulemar Babba naile e binsaedba na ibmar odurdaggosulid. Emala wisid Biblia Bab gaya burbaye, degsoggu unnila Biblia sogedbarbii emar odurdagmalad.

8. Dule Jehovága arbabiele, ¿ibu imagger gebe?

8 Bab igar sunsogedba namaladi unnila Jehovágarbii arbamalad, geb e nuggi sunmagmarbalid. Jesús sogsad: “Bab  Dummad be Dummad e nug be odummodii nanao. Unnila aagarbi be ibmar imaggo” (Mateo 4:10). Degsoggu Bab sordagana unnila Jehovágarbii arbamalad. Aaga Bab nuggi emarga sunmagmalad geb Bab Dummad daedgi. Salmo 83:18 gine sognaid: “Na wisgumala, bebi Bab Jehová gued, weyobi be nugad. Na wisgumala, nabneggine, bebi unnila Bab Dummad Bur Birigined gued”. Jesús igar mesisad igi dulemar Bab igargi odurdaglegoe. Geb e Babse godsagu sogsad: “Dulemar be anga ugsadga an be oyosad, be doa gue” (Juan 17:6). Aayobmogad emi ibagi Bab igar sunsogedba namaladi emar odurdagmalad igi Bab Dummad nuga, ibu imagmai geb igi dabali.

9, 10. ¿Igi mag daglege Cristo sordagan na inniggigwad sabmala?

9 Bab igar sunsogedba namaladi na inniggigwad sabmalad. Jesús sogsad: “Ar na be mudsub mudsub nue sabgumalale, bela dulemar mag be[mar] dagmaloed, bemar an sabbingan gumalad” (Juan 13:35). Gebbe Cristo sordaga gusmalad na weyob sabgusmarmogad. Babga arbamalad bela neg dirbimaggar gwenadganyob na dagmalad, aggarsulid e dulesulir, e neggweburginedsulir, dule mani nigdibe, saddedibe, na gwenadganyobi gudidiid (Colosenses 3:14 absogo). Bab igar sunsogedba nasurmaladdi na gwenadganyobi dagsurmalad. ¿Igi anmar wisi emar deyobdae? Ar emardi e dulesulile geb e neggweburginedsulile oburgwedamalad. Bibliagi soglenaid: “Ar weyob magar daglenoni dasunnad, dule nia sagla e mimmidibe, Bab Dummad mimmidibe. Ar dule wargwen igar maidba inniggii ibmar imagsulile, degine, na e gwenad sabsulile, we Bab Dummad mimmisulid. Ar we gaya burba gebe sagla unni bemar iddosmalad: Na mudsub mudsub anmar sabgumarye. Melle Caínyobi gumalo. Ar Caín nia sagla sordasoggu, a ular, na e urba oburgwisad” (1 Juan 3:10-12; 4:20, 21).

10 Dule nue emar sabele emar oburgosulid, geb auggi we ibmarbi unnisulid. Cristo sordagan sunsogmaladi na bendagmalaga  iba amimalad, na ega ibmar imagmarbalid geb na ega ibmar ugmarbalid (Hebreos 10:24, 25). Neg undar gualile na bendagmarbalid, geb emar yardagsurmarbalid. Ar Bibliagi soglenaidba igar imagmalad “bela dulemarga ibmar nuegan imagmalo” (Gálatas 6:10).

11. ¿Ibiga anmar benguedsuli Bab, Jesucristo barmiarye anmar bendaggega?

11 Bab igar sunsogedba namaladi, bensurmalad Bab, Jesús barmiarye anmar bendaggega. Bibliagi soglenaid, “dule baid nuggi geg anmar abonoleged” (Gusmalad 4:12). Capítulo 5 gine anmar durdasad Jesús dulemar bendaggega burgwisye (Mateo 20:28). Anba Jehová, Jesucristo Reyga onugsasbalid, nabbaneg idugega. Degsoggua Bab abeged anmar Jesúsba igar imagged geb e ibmar odurdasadba anmar dabalidi. Deyob imaggerbii anmar nabir sadegu gudi guoed. Aaga Bibliagi soged: “Dule Bab Massi bensulile sadegua gudi guoed; dule Bab Massiba dasulile bar gudi guosulid” (Juan 3:36, TNM).

12. Mer we nabbaneggi ibmar guedba aggamalaga, ¿ibu imagmalar gebe?

12 Bab igar sunsogedba namaladi we nabbaneggi ibmar guedba aggasurmalad. Jesús, Pilato abin sogsad: “An Reyga megedi, we nabnegginedsulid” (Juan 18:36). Degsoggu bia gudimardibe Cristo sordagan sunsogmaladdina Bab Reinoba igar imagmalad geb bibbisaar política igarba aggasurmarbalid. Neggweburmar nabo uluarmalale eba aggasurmarbalid. Auggi dulemar na política igarba aggabiele na aggoed, votar sanabier sanaoed, Cristo sordagan sunsogmaladdina política igarba bibbisaar aggaosurmalad. Políticaba aggasurmar inigwale, gobierno igar mamaidbardina igar imagmalad. ¿Ibiga gobiernobardina igar imagmarbali? Ar Bibliagi Cristo sordaganga soglenaid ‘dulemar dummagan neg dagmamaidba ibsamaloye’ (Romanos 13:1). Auggi dummagan igar, Bab igargi yolenonidibe Cristo sordagandina apóstolmaryobi ibmar imagmalad, apóstolmar sogsad “anmar dulemarba  ibsaed iduale, bur Bab Dummad sogedba anmar ibsaer gebed” (Gusmalad 5:29; Marcos 12:17).

13. Cristo sordagan sunsogmaladi, ¿Bab Reino ibu imaggoye sogmala geb aaga ibu imagmala?

13 Bab igar sunsogedba namaladi emar odurdagmalad Bab Reinobii dulemarga neg nudaggoye. Jesús sogsad: “Bab Dummad e neg dagmaid gaya burba nued bela we nabneg naidgi sunmaglegedsegad. Geb bela dulemar yar baid  baidgi bugmalad Bab Dummad e neg dagmaid gaya burba nued wisgunonimalale, geb agi we nabneg bergunoniggoed” (Mateo 24:14). Cristo sordagan sunsogmaladi emarga sogosurmalad dulemar neg semamaidi bemarga neg nudagmaloye. Bur emarga sogmalad Bab Reinobii bemarga neg nudaggoye (Salmo 146:3). Jesús emar odurdasad Babse godder, we gobierno nued egismaloye: “Be neg dagmaid anmarse be sedage. Igi nibneggi be sogedba be ibmar imagge, deyob, we nabneggi be imagdamo” (Mateo 6:10). Bibliagi soglenaid “ar we rey bur yar bamalad obelogoed. We rey, degi sadegu reyga megoed” (Daniel 2:44; Apocalipsis 16:14; 19:19-21).

14. Igi be binsae, ¿doamarbii unnila Bab igar sunsogedba ibmar imagmala?

14 Emidi be binsaena: “¿Doamar Biblia sogedba emar odurdagge, geb odurdagmarbali Bab Dummad Jehová nugye? ¿Doamar na inniggigwad sabmala, geb Cristogi bensurmarbali? ¿Doamala neg isgunaidba aggasurmala geb Bab Reinobii dulemarga neg nudaggoye sogmala? Bela neg dirbimaggar Bab igargi sunmagmaladgi be binsadele, ¿doamarbii we ibmar imagdidii?”. Nue mag dagleged unnila Jehovági sunmagmaladbii weyob ibmar imagdidiid (Isaías 43:10-12 absogo).

¿IBU BE IMAGMOGOE?

15. Unnila anmar binsa sogosursoggu Bab maye, ¿ibu anmar imagbalir gebe?

15 Bab nued anmar daggega unnila binsa anmar egi benguosulid. Biblia soged niamar bela Babgi bensurmarmoye (Santiago 2:19). Auggi Jehovábali igar sasurmalad, aaga Jehová nued wemar dagsulid. Jehová nued anmar daggega unnila anmar binsa sogosulid Bab maye, eba anmar igar imagbalir gebed. Geb anba noar Bab igar odurdagmaladgi anmar bangubalir gebed geb Bab igar sunsogedba anmar naguer gebed.

16. ¿Ibu anmar imaggoe mer noar Bab igar odurdaggedba aggaega?

 16 Apóstol Pablo sogsad noar Bab igar odurdagmaladba mer aggamaloye. Bab sogsad: “Dulemar an wissurmalad abargi bemar gudiid agnimar, egi bemar bangumarsun. Ibmar isgana mer ebumalo, geb degiir, an be[mar] abinga[oed]” (2 Corintios 6:17; Isaías 52:11). Degsoggu, Cristo sordagan sunsogmaladi noar Bab igar odurdagmaladba bar ibmar imaggosurmalad.

17, 18. ¿Ibu “Babilonia neggwebur nue nug niggad” obare, geb ibiga gwae anmar egi noed abelege?

17 Bibliagi sognaid noar Bab igar odurdagmaladi “Babilonia Neggwebur Nue Nug Niggad” e sordamarmoye (Apocalipsis 17:5). * We nuga daniggid ebbenne Babiloniaye neggwebur nugad sigwisadgi, Noé ibagangi dii dummad wisad sorba aa neggweburgi noar Bab igar odurdagleded. Emi ibagi buggidar dulemar ibmar odurdaggedi geb e ibmar imaggedi Babiloniagi noalid. Anmar sogoena ebbenne Babilonia dorgana sogdamalad, Bab Dummad warbaa nigye, emi ibagi buggidar Bab igargi sunmagmaladi, Babiloniaginmaladyob sogmarmogad Bab Dummad warbaaye. Auggi Bibliadi soged unnila Bab wargwenye, Jehová, e nugye, geb Jesucristo Bab massiye (Juan 17:3). Babiloniaginmalad anba binsamarbalinad dule burgwisar e burba wiledidaye. Emi ibagi anba Bab igargi sunmagmalad sogmarmogad dule burgwisar e burba wiledi guddaye.

18 Igi Babiloniagi Babga ibmar imaglegena bela neg dirbimaggar dulemar aayobi imagbugmarmogad. Degsoggu, sogleged Babilonia neggwebur nue nug niggad bela noar Bab igar odurdagmalad obarye. Noar e igar odurdagmarsoggua, Bab sogsad uggiar bela obelolemaloye. Emidi be mag iddoge ¿ibiga anmar wegi Bab igar odurdagmaladgi bangued abelege? Jehová abeged, noar e igar odurdagmalad  obeloged iduar be ‘gwae egi noedi’ (Apocalipsis 18:4, 8 absogo).

Buggidar ai nuegan be niggunoniggoed Jehová neggwebur yaggi dognoniggidba

19. Jehovágala arbaedba, ¿ibu be nigguoe?

19 Noar Bab igar odurdagmaladgi be bangudele be aimar begine bangudmaloed. Auggi be Jehová neggwebur yaggi dognoniggosoggua buggidar ai nuegan be niggunoniggoed. Ebbenne Jesús sordagan buggib ibmar indasmalad Jesúsba naega auggi gwenadgan buggidar niggunonimalad. Aamaryobi be gwenadgan buggib niggumogoed. Bab igar sunsogedba namalad neg dirbimaggar millónba bugsoggua, be gwenadgan nigguoed bela be sabgumaloed. Geb yoogidse sadegu be nabir gudi gubaloed (Marcos 10:28-30 absogo). Sun be ibmar durdasadba be aimar begine bangusmaladi sorba Biblia durdagmarmogad geb sun Jehovága arbamarmogad.

20. ¿Bab igar sunsogedba namaladi yoogidse neg igiidgi gudi gumaloe?

20 Bibliagi sognaid isse nabye Jehová bela dulemar isgus buggwad obelogega, geb sorba dulemar nueganbii nabbaneggi urboye, e Reino aamar idumai guoye (2 Pedro 3:9, 13). ¡Nabbaneg yeer dagle guoed! Aagi bela ibmar nueganbii imaglegoed. Aagindi unnila Bab igar soggwenna odurdaglegoed, Bab igar sunsogedbii. Degsoggu ¿nuedsur be binsae ibmar durdagnadabbidba be imagnadab saed, Bab igar sunsogedba nagumogaga?

^ parr. 17 We librogi soglenaid ibiga noar Bab igar odurdagmalad, Babilonia neggwebur nue nug niggadye bilemala, be nabbi durdagbiele apéndicegi absogo “¿Ibua “Babilonia Neggwebur Nue Nug Niggad?”