Yaba nanaid daggega

Índice daggega

CAPÍTULO 9

¿Bule anmar “neg duggumosadgi” gudii?

¿Bule anmar “neg duggumosadgi” gudii?
  • ¿Igi anmar ibagi neg gudagoye Bibliagi soglenai?

  • “Neg duggumosar,” ¿igi dulemar gudagoye Bab gaya burba soge?

  • ¿Ibu ibmar nuegan “neg duggumosar” gudagoye Bibliagi soglenai?

1. ¿Bia anmarga soglenai yoogidsega igi neg guoe?

IBMAR gunaid be televisióngi dagder ¿be binsasur damoga igi neg gudodibeye? Emi ibagi inbaggwa uggiar neg gagalenonidaed, dulemar egi binsabugsuli, ar dule wargwensaar wissulid igi yoogidse neg guoe (Santiago 4:14). Auggi Jehovádi bad wisid igi neg guoe (Isaías 46:10). Aagala diggasurgus Bibliagi emi ibagi ibmar gunaid bad soglesad, auggi aabii unnila soglessulid anba sogsabalid ibu ibmar nuegan gued owarmagdanibali.

2, 3. E sordagana, ¿ibu Jesússe egissamala, geb Jesús igi abin imasa?

2 Jesucristo, nabbaneggi gudi gusgua Bab Reinogi sunmasad, we Reino bela ibmar isgus naid obelogoedid geb bela Nabbaneg yeer dagle imagbaloedid (Lucas 4:43). Jesús ibmar sogsad iddosmaladi wisgubimalanad sana we Reino signoniggoe. Aaga e sordagan ese egissamalad, be Rey gala signoniggile, “¿ibi wilubgan oyoledagosunna? Neg duggumosar, ¿igi neg gudagosunna?” (Mateo 24:3). Jesús wemarga sogsad unnila Jehovábii wisye sana neg isgus naid obelolegoe (Mateo 24:36). Deginigwale, Jesús sogsad Bab Reino neg nudagged iduar igi neg gudagoe. Jesús ibmar sogsadi emi ibagi gunaid.

3 Emi ibagi ibmar gunaidba mag dagleged, anmar neg duggumosadgi buggwa; auggi we ibmargi sunmagged iduale bin anmar sunmaggoloena nibneggi urwed dummad nosadgi, nibneggi ululesadi dulemar dagsasulid. Auggi bela anmar eba galesmogad.

NIBNEGGI URWED NODED

4, 5. a) ¿Igi nibneggi neg gusa Jesús Reyga signonigu? b) ¿Nibneggi ululesadba igi neg guoye Apocalipsis 12:12 gine sognai?

4 Capítulo nasadgi anmar durdasad 1914 gine Jesús nibneggi reyga signoniye (Daniel 7:13, 14 absogo). Aa sorba abgayalasaar nibneggi neg nudaded. Bibliagi soglenaid, “Nibneggi ulules[ye]: Miguel [Jesús] e ángelmarmala nagbe dummad e ángelmarmarbogwa ulusma[rye]”.  * Nia geb e ángelmar isganamala, Jesússe galaggusmalad, degsoggu nabbase barmeddelesmalad. Ángelmar nuegandi yeer iddosmalad, wemar bar nibneggi gudi guosurmaladba. Auggi dulemardi yeer iddogosurmalad. Weyob iddomaloye Bibliagi soglesad: “Bemar, nabneggi bugmaladdi, demargi bugmaladdi, ¡be[mar] duledar wilesmar! Ar ade, bemarse nia sagla nue urwedigine aidenoniggid. Ar nia saglade na wisid, e ibagan idse nabbi naid” (Apocalipsis 12:7, 9, 12).

5 Be daggena nibneggi ululesadba igi neg gunoniggi: Nia bela beladse sae iddoded, aa ular Nabbaneggi dummad neg gagana gualid. Emi ibagi we ibagangi anmar gudiye, anmar durdaggoed. Auggi undar neg gagalena guosulid, Niabela wisid isse neg gagalena guoye. Bibliagi we ibagan “neg duggumosa[dye]” sogleged (2 Timoteo 3:1). ¡Yeer anmar iddoged Jehová bar Nia neg gagaega imaggosulidba! Anmar daggoena igi neg gudagoye Bibliagi soglenai. Ar we ibmarmar gudedba mag daglegoed anmar neg duggumosadgi gudii. Geb undar nabsulid Bab Reino Jehovába nanaidga ibmar nuegan uggega. Gebbedgi sogbagge anmar daggoena, igi neg gudagoye Jesús sogsa anmar ibagi.

WEYOB NEG DUGGUMOSAR NEG GUDAGOED

6, 7. Jesús sogsad neggweburmar nabo urwenana gudamaloye geb uggud dummad nagudabaloye ¿igi emi ibagi deyob gunai?

6 “Dulemar yar baid baidgi bugmalad bila ononai gudamaloed, degi, reymar na mudsub mudsub egi yolenanai gudamarbaloed” (Mateo 24:7). 100 año nasadgi millónba dulemar burgwismalad neggweburmar guerramar onosadba. Dule Inglaterraginedi weyob narmasad: “1900, 1999 sega bur yeer mergu dulemar burgwisa. [...] Aa birgamargi bur yeer urwed nosad. Wis isse ibagan guerra nosuli nagusdaed, bur bule guerra nonaidbiidaed”. Instituto Worldwatch sogsamogad, ‘1900 año nasadgi igi mergu dulemar urwedba burgwisa, aaba bur ilabba mergue nabbi 100 año nasadgi dulemar urwedba burgwismarye’. Aa ular 1914 aggale millónba dulemar burgwemamaid. Degsoggu neggweburmar guerra onoalile yeer mergu dulemar gwenadgan surgusdamalad. Bei gwenad guerraba burgwedimogale, mag be iddomogoed igi dulemar wilesdae.

7 “Uggud dummad nagudabaloed” (Mateo 24:7). Investigadormar sogdaed, 30 año nasadgi mas nue nigga gusye. Deginigwale anba Nabbaneggi mas saddeyob dagleged, ar dulemar nainu saddedamalad mas digega, geb mani saddemarbalid mas baggega. Neggweburmar mani surmaladgi dulemar ibagwengi unnila wis suiddonbo nigdamalad ibmar baggega, abar bur saddedamalad. Buggidar a dulemar yeer uggumesdidiid. Organización Mundial de la Salud soge cinco millón mergu burwigan birga irba uggudba burgweye.

8, 9. Jesús sogsad negabandur nanamai gudoye geb bonigan agnidbaloye. ¿Igi mag daglege emi ibagi deyob gunai?

8 “Negabandur dummagan nagumai gudagoed” (Lucas 21:11). Servicio Geológico mergi negginedi sogsad, birga irba anbe gagga baggebag mergu negabandur dummagan nomai guo iddolleye. Binsa negabandur burwigansulid, neg dummagan ese ber oiddollemaid, geb nabba das das mamaredid. Geb birga irbarsaar negabandur bur dummad nosdabalid, wedi neg dummagan ber yaar imagged. Gardamargi nosnanaed, 1900 aggale dos millón gwena mergu dulemar negabandurba burgwismarye. Geb baid gardamargi soglesbalid: “Anba emi ibagi dulemar durdasmar inigwale ibiga negabandur noardae, dulemar negabandurba burgweddi galemasulid”.

9 “Uwelemalad [...] agnimai gudabaloed” (Lucas 21:11). Emi ibagi yeer mergu ina nuegan agnimai inigwale, agga bur bonigan mergumaid, bonigan gwabbidi aggar agnimabalid. Aaga, garda maddagwengi soglesad emi ibagi 20 mergu bonigan bad nigganadi, agga bur yaisurgusye, abar wemalad: tuberculosis, malaria, cólera, geb bamalad bonigandina agga bur gannolemamaid, inamar geg barga gusad. Anba 30 mergue bonigan gwabbid agnisbalid. Abar we bonigan ina sadded, degsoggu dulemar egi burgwisdaed.

NEG DUGGUMOSAR IGI DAE GUDAMALOE

10. ¿2 Timoteo 3:1-5 sognaidyobi dulemar dae be dagmoga?

10 Biblia unnila sunmagsuli emi ibagi ibmar gunaidginbi, anba sogbalid igi dulemar dae gunoniggoe. Apóstol Pablo sogsad: “Neg duggumosale, iba bulegan nagunoniggo[ye]” (2 Timoteo 3:1-5 absogo). Weyob dulemar daoye apóstol Pablo sogsad:

  • na eginbi binsadamaloed

  • maniginbi binsadamaloed

  • e serganba igar imaggosurmalad

  • e aimargi agbiddemaloed

  • na gwen sabguosurmalad

  • na geg bargamaloed

  • ibmar durganyob urwemaloed

  • ibmar bamalad bur bule binar gumaloed Bab Dummadba

  • Bab igarba daeyob damaloed, auggi eba daosurmalad

11. ¿Igi dule isganamar gumaloye Salmo 92:7 gine sognai?

11 ¿Be neggweburgi dulemar weyob damarmodibe? Deyob an sogdo. Belasaar neggweburmargi dulemar daed gwagmaid. Degsoggu Jehová bad ibmar nudagsoggalid, ar Bibliagi sognaid: “Anba dule[mar] isganamar gaganyobi agnialile, dule galagwensulidamalad dudduyob adsunnalile, unnila degi sadegu berguega gumaloed” (Salmo 92:7).

IBMAR NUEGAN GUBALOED

12, 13. ¿Ibu ibmar imaglenaidba mag daglege neg duggumosadgi “Bab igar sunsogedi” nue durdaglemai?

12 Bibliagi soglenaiyobi emi ibagi yeer neg gagales gunaid. Auggine Jehová sordagangardina ibmar nuegan gunaid.

13 [Bab] igar sunsogedi bela nabbaneggi wisgulegoed”, weyob neg guoye Danielgine soglesad. ¿San deyob neg guoena? “Ibagan berguedse” (Daniel 12:4). 1914 aggale Jehová nueggwa ega arbabimalad bendagmaid, Bibliagi ibmar soglenaid durdagmalaga. Durdagmalaga Bab Dummad igi nuga ibu imaggoe E nugsig ibmar durdagmalaga, e ibmar imaggoedsig, Jesucristo anmar anar burgwisadsig durdagmalaga, durdagmarbaliga igi dule burgwisar nue gusdae, geb igi gannar dulemar odurgulemaloe. Jehovága arbamaladi durdasmarbalid igi nabir nuedgi gudi gusmarbalile yeer iddodisamalaga geb igi Bab nug odummodi sasmarbalile. Anba nueggwa durdasmarbalid ibu nue Bab Reino obare geb we Reino igi Nabbaneg nudaggoe. ¿We ibmar durdagnonimalar ibu imasdamala? Daggega ibu imasdamala anmar Bibliagi ibmar baid guoye soglesbalidgi sunmagbaloena.

“We Reino ibmar nuegan [imaggoedgine] bela nabbaneggine sunmaglegoed.” (Mateo 24:14)

14. ¿Bule yeer Bab Reinogi sunmaglenai, geb doamar egi sunmagnanai?

14 Bela nabbaneg naidgi Bab Dummad e Reino gaya nuegan berbelegweloed’, “neg duggumosar” weyob ibmar gubaloye Jesús sogsa (Mateo 24:3, 14 absogo). Bela neg dirbimaggar Bab Reinogi sunmaglenaid. Soglenaid Bab Reino ibua, ibu imaggoe, geb igi anmar bendaggoe. Neggweburmar 230 gwena mergusaar we Reinogi sunmaglenaid, geb 400 gaya aggaraggar gwenabali. Millónba Jehovági sunmagmalad ‘yar baid baidgi bugmaladi, neggwebur baid baidgi bugmaladi geb gaya aggar aggar sunmagmaladi’ Bab Reino ibmar nuegan imaggoedgi sunmagdidii (Apocalipsis 7:9). Anba dulemar Bibliagi nue ibmar soglenaid wisgubimalad odurdaggega mani gasurmarbali. Be iddogena, dulemar e sordagan isdar dagdamaloye Jesús sogsa inigwale Bab Reinogi sunmaglegoye soglesad emi ibagi gunaid (Lucas 21:17).

¿BEDINA IBU IMAGMOGOE?

15. a) ¿Anmar neg duggumosadgi gudidibe? ¿Ibigala deyob be soge? b) ¿Neg berguder dulemar isgana igi gumaloe, geb dulemar Bab gobiernoba nanaiddi igi gumarmogoe?

15 Emi ibagi bad belasaar Bibliagi ibmar guoye soglenaidi gunasoggua ¿bur anmar neg duggumosadgi gudi be binsae? Bab Reinogi sunmaglenaid bergunoniggoed Jehová sogedse wese an Reinogi sunmaglegoye, geb aa sorba “nabneg bergunoniggoed” (Mateo 24:14). “nabneg bergunoniggo[ye]” soglenaidi Bab Nabbaneggi bela ibmar isgana obelogoedi obared. Jehová, Jesúsga igar uggoed e ángelmarbo e isdarmalad obelogega (2 Tesalonicenses 1:6-9). Degsoggu niamar bar dulemar yardagdi guosulid. Aa sorba Bab Reino bela ibmar nuegan imaggoed dulemar Bab gobiernoba igar imagmaladga (Apocalipsis 20:1-3; 21:3-5).

16. ¿Ibu ibmar be imaggele bur nuedi?

16 Bela Nia neg gagasnaid obeloleged iddagga gussoggua, nuediled be we ibmargi binsamogar: “¿Ibu an imagnai wilubmoga?”. Bur nuedid Jehová igar durdagnai saed geb Jehová ibu imagged anmar abege aa ibmar durdagnai sabalidi (Juan 17:3). Alamagna samogo nueggwa Biblia durdaggega. Jehovági sunmagmalad anbaggued negse mer iggu iggu nanabalo (Hebreos 10:24, 25 absogo). Jehová igar durdagnai sao nabir Jehová be aiga guega. Jehová nued be daggega, be daed ogwamai sabalo (Santiago 4:8).

17. ¿Ibigala uggiar dulemar saoe dulemar isganamar obelolegoedi?

17 Jesús sogsad bur melu dulemar gwen iddogosurmarye neg duggumosadba neg gagalenaye. Dulemar abiddobugsuli, uggiar neg isgunaid bergunonimogoed. Igi addursaed muddig uggiar dognonidae, deyobi dulemar isganamar berguoed (1 Tesalonicenses 5:2 absogo). Jesús dulemarga sogsad neg duggumosadgi ede Reygala megidele Noé ibaganyobi neg gumogoye “deun, dii mured iduar, mas gunbuggwa, gobbuggwa, ome niggubuggwa, degi, na e sisgwaga sui ugbuggwa gusmalad. Geb Noé ur dummad sobsad yaba dogsadse, deyob gubuggwa gusmalad. A dulemar magar gwen iddossurmalad. Dii muludgu, bela a dulemar burgwismalad” (Mateo 24:37-39).

18. ¿Ibu ibmar Jesús sogsadi anmar dodoaggwa daggedsuli?

18 Aaga Jesús sogsad: “Na be[mar] duggin salaggarmarmo. Mer mas gunnedginbi be[mar] binsadii gumalo. Degine, mumguedginbi, degi, we nabneggi ibmar naidginbi mer binsadii be[mar] gumalo. Ar degiile, abaggalegi, bemar we ibagan edarbedisulid uggiarmaggale bemargi daniggile. Ar igi ibmar durgan ibmar galegedgi uggiar galedae, deyobi, we ibagan bela dulemar we nabneggi bugmaladgi uggiar noniggoed. Degisoggu, nue neg iddoagwar be[mar] gudii gumar. Gaddig Bab Dummadse gordii gumar. Adi, bemar unniddiba we ibmar gudagoedgi be[mar] wagginmalagar, degine, a ibagangi, Dule Massi asabin gwage swilidig gwissi gumogagar” [nued anmar dagged obared] (Lucas 21:34-36). Jesús sogsadba anmar igar saed abeleged. ¿Ibigala? Ar dulemar Jehovába geb Jesucristoba damalale neg isgunaid berguder bendaglemaloed. Geb nabbaneg yeer dagle guoed owarmagdaniggidgine sadegu gudi gumarbaloed (Juan 3:16; 2 Pedro 3:13).

^ parr. 4 Apéndicegi soglenaid “¿Doagi arcángel Miguel?