Yaba nanaid daggega

Menú baid daggega

Índice daggega

Jehovági sunmagmalad

dule

Bibliagine ¿nue igi soglenai?

 CAPÍTULO 6

¿Bia dule burgwisar naddae?

¿Bia dule burgwisar naddae?
  • Dule burgwisar ¿igi gusdae?

  • ¿Ibigala anmar burgwe?

  • ¿Igi be iddosale be wisgusar, dule burgwisar igi gusdae?

1-3. ¿Dule wargwen burgwenoniggile, dulemar ibu ibmar wisgubi guardamala, geb igi Bab igargi emar odurdagmaladdi sogdamarmosunna?

DIGGASUR gus dulemar we ibmar wisgubi gudimalad, we ibmar nue wisguleged abeleged. Ar bela dulemar, wagmarse baggale we ibmar wisgubiedbiid.

2 Capítulo 5 gine anmar durdasad Jesucristo, anmar ular burgwisadba nabir anmar sadegu gudi guoye. Anmar durdasbalid Bibliagi soglenaye, “dulemar bar burgosurmar[ye]” (Apocalipsis 21:4). Auggi anba emi ibagindi bela anmar burgwedbiid, ar rey Salomón sogsayobid, “ar dulemar anba dula gudimaladi, e burgwemaloed na wismalad” (Eclesiastés 9:5). Anmar burgwebisur inigwale bela anmar wisgubiedbibalid, ¿igi an burgwisar gudodibe?

3 Anmar gwenad burgwenoniggile sun anmar wisgubi gudagoed: “¿Bia gudidibe? ¿Wiledidibe? ¿Nabir an bendasardibe? ¿An nabir bendasmogardibe? ¿Ibagwengi an gannar dagbalodibe?”. Bab igargi emar odurdagmalad emarbii we ibmar sogsurmalad. Abar sogdamalad, dulemar nuegan Bab negse namaloye e serganbo gudi guega, geb isganamardi uangi wiledii gudoye. Bamaladdina sogmarbalid dule burgwisale sorba gannar gwalulenonidaye auggi ibmar baidga gusdaye.

4. ¿Dule burgisar igi gusdaye belagwablesaar Bab igargi emar odurdagmalad sogdamala?

 4 Degsoggu bergwablesaar Bab igargi emar odurdagmalad sogdamalad, dule burgwisar e burbabi gudi guddaye. Degsoggua diggasur gus dulemar soggalid, dule burgwisale e burbabi nabbi gudi guddaye, aaga binsadamalad, we dule anba emar dagdiye, emar iddodiye, geb anba binsadibarye. ¿Dule burgwisale nabir we ibmar imasardibe? Dule dula gudiile, dule binsaed nigga gudidaed, dule burgwisardina bar binsamai guosulid, ar bela ebi ibmar bogiguoed, degsoggu bar ibmar soggwensaar imaggosursunnad.

DULE BURGWISALE ¿NUE IGI GUSDAE?

5, 6. ¿Dule burgwisale igi gusdaye Bibliagine soglenai?

5 Jehová, anmar imasadsoggua edi wisid igi dule burgwisar gusdae. Jehová, Bibliagi sognaid igi nue dule burgwisar gusdae. Bibliagi be we ibmar durdaggoed: dule burgwisale bar gudi guosurye. Degsoggu dule burgwisale geg bar ibmar imagged, bar emar daggosulid, bar emar iddogosurbalid, bar binsamai guosurbalid. Ar dule, burba saddesoggua, dule burgwisale e burba sorba gudi guosulid. *

¿Duu gasiid gidsar bia naddae?

6 Salomón sogsagua dulemar bela wisidbiye ibagwengi burgwemaloye, weyob narmasad: “Dulemar burgwismaladdina bar ibmar abemaisurmalad, ar bar iddomaisurmalad”. Uggine sogdebalid, burgwismaladi bar emar sabgusurmarye, bar emar isdar dagsurmarbarye, geb anba sogsabalid, “ar be burgwisardi bar arbaosulid, ibmar wisguleged igar surbalid, degi, binsaed nigga gued igar surbalid” (Eclesiastés 9:5, 6, 10 absogo). Salmo 146:4 gi sognamogad, dulemar burgwisale ‘na ibmar imaggoye sogsanadi’ bar egi binsassurdamarye. Dule wargwensaar burgwedgi wagginnosulid, geb dule burgwisar bar sorba baidsig gudi guosurbalid. Anmar dula gudiile, anmar baggagwallu duu gasiidyobid, baggagwallu  gidsale e duu gasid yog bergualoed, anmar burgwisale deyobmogad, anmar burgwisale yog berguar gusdamogad.

DULE BURGWISAR IGI GUSDAYE JESÚS SOGSA

7. ¿Burgwed ibuyobye Jesús sogsa?

7 Jesús e ai burgwisgua sogsad dule burgwisar igi gusdae. E sabbinganga sogsagweled: “Anmar ai Lázaro gabmaid”. Emardi binsasmalad uwelemasoggua, obunnomaye. Auggine e sabbingan noar abin iddosmalad, geb sorbali Jesús emarga nueggwa sogded: “Lázaro burgwar maiye” (Juan 11:11-14 absogo). Be dagsa, Lázaro burgwisgua Jesús gabmaiyobi dagsad. Lázaro burgwisgu bibbisaar Bab negse arbisulid, geb soo saglase barmeddeledsurbali, ángelmarse arbisurbalid, e dadgan burgwismaladbela dagsasulid, geb sorba gannar gwalulessurbalid ibmar baidga guega. Degsoggu Lázaro belagwa unnila burgwar megwisa bela belad gabmaiyobi, gabdagmasuliyobi. Bibliagi baidsig soglenabalid dule burgwisale, gabmaiyobye. Be daggena aggwagi maggar Esteban oburgwismargua, soglenaid Esteban ‘burgwissunye’, soglebalid gabmainye (Gusmalad 7:60). Apóstol Pablo sogsamogad dulemar burgwismaladi ‘gabmamaye’ (1Corintios 15:6).

Jehová, dulemar urbisad nabneggi sadegu gudi guega

8. ¿Ibiga anmar bensuli Bab Dummad burgwega dulemar obinyissuli?

8 ¿Jehová dulemar burgwed abesandibe? Abessulinad. Jehová dulemar obinyisad nabbaneggi sadegu gudi samalaga. We gardagi bad anmar durdasad, Bab gebbe dule obinyisgua neg yeer daglegedgi ogwissisye, geb boni nigguosurmarbalinye. Jehová abesanad unnila ibmar nueganbii niggumaladi. ¿Dule na nue mimmi sabele abesar be binsae  e mimmi seredgumaidba ibmar nunmagdii guedi geb burgwedi? Abessuliled. Jehová nue na mimmigan sabensoggua, abesanad sadegu yeer iddodii nabbaneggi gumaladi. Bibliagi soglenaid Bab Dummad weyob anmar imasye, ‘dule nabir ebbenne ibmar gusmalad mag iddogega, degi, yoedse ibmar guoed mag iddobaliga’ (Eclesiastés 3:11). Degsoggua Bab Dummad anmar obinyisgua anmar imasad anmar mag iddogega igi neg gudaniggi. Aagala anmar nabir binsaed yoogidse ibmar guoedgi, geb aagala anmar binsadabalid yoogidse ibmar imaggedgi. Degsoggu anmar budar burgwedasunnad. Aagala Bab Dummad igar amisad nabir anmar deyob gudii guega.

 ¿IBIGALA ANMAR BURGWE?

9. ¿Ibu ibmar mer imaggoye Jehová, Adángala sogsana, geb ibigala beedsesulina eba igar saedi?

9 ¿Degid ibiga anmar burgwe? We ibmar wisguega bin anmar daggoloena gebbeun dulemar nabbaneggi buggudgua igi neg gusa. Bibliagi sognai: “Agine, Bab Dummad Jehová sabbimar aggar aggar bela yeer daglemalad agniega imagsad. A sabbimar e san bela yeer gulle imagsad” (Génesis 2:9). Auggi Jehová Adánga sogsabali sabbi wargwendi mer bibbisaar ebugoye, ega sogsa: “We nainu nuedgi sabbimar buggwad e sanmar sunna bela be gunned. Unnila sabbi wargwen e sandi melle be gunno. We sabbi, ibmar nued wisi, ibmar isgana wisi dule saed. A sabbi e san be gudsale, a ibagi be burgoed” (Génesis 2:16, 17). Babba igar imagmalaga wemarga beedsesulinad ar sabbimar yaisurbalinad na mas amimalaga. Ar Jehová bela wemarga ibmar ugmainad, isguedsuli wemar imasbalinad, degsoggu Jehovába igar imagmaladinad. Babba igar imasmalana mag daglegoenad mag dagmala Bab Dummadbii dule dummad mai, geb eba igar imagbimarbali.

10, 11. a) ¿Igi Adán, Evabo Bab igargi yolesmala? b) ¿Ibiga be sogsale Adán Evabogwa inniggigwad Bab igargi yolesmarye?

10 Adán, Evabogwa Jehovába igar sassurmalad. Nia, Eva yardaggega nagbe sunmaggeyob imasad weyob Evaga sogded: “¿Eddo, Bab Dummad bemarga sogsa: We nainu nuedgi sabbimar gwissid e san melle bibbisaale gunmaloye?”. Eva abin sogded: “Ar igid sabbi e san anmar we nainu nuedgi gunbimala, sunna bela anmar gunmalad. Unnila nainu nued abargi sabbi wargwen gwissid e sanbi geg anmar gunned. Bab Dummad anmarga sogsado: Melle a sabbi e sandi be gunmaloye, degine, melle be ebumarbaloye. Ar bemar gudsale, bemar burgwemaloye” (Génesis 3:1-3).

11 Nia sogded: “Bemar gwen burgosuli. Ar Bab Dummad nue wisid, bemar we sabbi e san gudsale, ibmar wisii gudmaloed. Geb agine, bemar Bab Dummadyob ibmar wisi  gudmaloed, ibi ibnuedi, ibi ibisganabali” (Génesis 3:4, 5). Nia abesad Eva binsaedi bur nuedye we sabbi gudsar. Nia ega sogsad, degiile na walagwengi be nabir wisguoye ibu ibmar nuedi, geb ibu ibmar isganabali. Ega sogsayob iddolleged be iddollegedba be nabir ibmar imaggoye. Nia sogsayob iddollebalid, Jehová bemarga gaggansasye sogsagu we sabbi gudsale bemar burgoye. Eva, Niase binsaed galesad, aaga we sabbi gudsad. Sorbali e suiga ugsamogad, geb e sui gudsamogad. Nue wismalanad Bab we ibmar imagged abesuli, imagge wilubsurmalanad. Degsoggu nue wisi Bab igargi yolesmalad. Weyob ibmar imasmaladba mag daglesad Jehovába ibsabisurmalana, geb abessurmarbalid Bab emar iduged. ¡Ibigwendii Jehová imassurmala!

12. ¿Igi Jehová iddosa egi agbidsamargu?

 12 Mimmi na be sabedgi aggwisad begi agbiddele, beba bar igar sasurbalile, geb bar be sabsurbalile ¿igi be iddosale? Be nunmag iddosaled. Be binsaena, bule Jehová nunmag iddossurmodibe Adán, Evabogwa egi agbinnonimargu.

Adán nabba imaggaled geb gannar nabbagala gusbalid

13. Adán burgwisar ¿igi guoye Jehová sogsa, degsoggu dule burgwisale nue igi gusdasunna?

13 Adán, Evabogwa Jehovába igar imassurmarsoggu, ibiga bar Jehováde dula wemar sedioensunna. Aaga burgwismalad, igi emarga soglesana. Degsoggu, burbar agnesig gudi gussurmalad. Egine yolesad sorba, Jehová weyob Adánga sogsad: “Be wimagged osuurmaggedgi na be mas gunned amidii guoed. Deyob be guoed, be nabbaga gannar guedse. Ar ade, nabbagi be daniggid. Ar be nabbasoggu, be burgwisale, nabbaga gannar be binyoed” (Génesis 3:19). Jehová nabba susad Adán sobega (Génesis 2:7). Adán obinyileged iduale gudisulinad. Jehová, Adánga sogsagu nabbaga gannar be guoye, ega sogsad, imagleged idu be gudisulinsoggu aayob bar be gudi guosurbarye. Nabba ibmar duladsursoggua, Adán burgwisgua aayob gusmosunnad bar ibmarga gussurmogad.

14. ¿Ibigala anmar burgwe?

14 Adán, Evabogwa Babgi yolessurmalana anba dula gudimalanad. Ar anmar Adán mimmigansoggua aaga bela anmar burgwedbimogad. Ar Adán anmarse isgued, geb burgwed ogwasad (Romanos 5:12 absogo). Igi babgan boni dummad niggar e boni e mimmiganse ogwasdae, deyobi isgued anmarse gwagsamogad, geg anmar egi wagginned. Isguedba anmar burgwed. Burgwed ibmar nuedsulid, anmar isdaradid (1 Corintios 15:26). ¡Ibiyob anmar yeer iddogedi Jehová, Jesús barmialidba, anmar bendaggega!

¿IBIGA ANMAR WISGUED ABELEGE DULE BURGWISAR IGI GUSDAE?

15. ¿Igi be iddoge be wisgusgu dule burgwisar igi gusdae?

15 Nued iddolleged anmar wisgusgu Biblia dule burgwisar igi gusdaye soge. Bad anmar durdasad burgwarmalad  wiledisurmarye, ibmar nunmagged iddosurmarbarye. Burgwarmalad dobgulegedsulid, ar geg aggar anmar imagged. Anmar geg bendagged, geb emar geg anmar bendagmogad. Anmar geg wemarbo sunmagged, emar geg anmarbo sunmagmogad. Abar Bab igargi emar idudimaladi sogdamalad, nabir dule burgwisad bendasarye. Nabirye binsaedba abar wemar bennuddamalad. Auggi anmardi wisgussoggu igi dule burgwisar gusdae, aamarse anmardi binsaed galegosulid.

16. ¿Doa sogedbali pastormar geb saglagan noar emar odurdaddamala, geb igi emar yardagdii?

16 Pastormar geb saglaganmoga Bibliagi ibmar sognaidyob sogdamarmodibe dule burgwisar igi gusdae. Buggidar dulemar noar ibmar sogdamalad. ¿Ibigala? Ar Nia wemar yardagnaid. Nia sogedbali Bab igargi emar odurdagye sogdidiid sogmalad, dule burgwisar e burbabii sorba gudi guddaye. Auggi Nia we ibmarginbii dulemar yardagdisulid Babgi dulemar obanguega. ¿Ibu ibmar baidgi emar yardagdibali?

17. ¿Ibiga Jehová nabir dagsuli soogi dulemar ogummagleye dulemar sogdaer?

17 Bad anmar dagsad, abar Bab igargi sunmagmalad sogdamarye dule isgana burgwisale soo saglas barmeddeledoye. Dule weyob ibmar sogdiile Jehová nabir dagmasulid, ar Jehovádi bela belad dulemar sabgumaid, bibbisaar deyob dulemar wiossuliled (1 Juan 4:8 absogo). ¿Igi be binsasale be wisgualir dule, e mimmi eba igar sassulidba e i argan ogummagnaye? ¿Nued be we dule daggele? ¿Be we dule aiga gubiele? Be, e aiga gubisuliled. Be sogsaled we dule isganaye. Nia abemogad anmar binsaed, Jehová, dule isganaye soogi ogummaggar dulemar wiomaye.

18. ¿Ibu ibmargi noar odurdaglesadba dulemar, burgwismalad dobguardamala, geb ega ibmar imaggardamarbali?

18 Nia sogedba Bab igargi emar odurdagye sogmalad sogmarbalid, dule burgwisale e burbabii gudi guddaye. Sogdamalad,  abar burgwismalad emar ogwayedidaye, abar emar bendagdidamarye, geb abar emar oburgwedamarbarye. Bad we ibmar iddogedba dulemar burgwarmalad dobguardamalad, geb ega ibmar imaggardamarbalid. Auggi Bibliagindi sognaid burgwismalad gabmamaye. Ar Jehová, anmar obinyisadsoggua, geb bela anmarga ibmar ugmabalidsoggua. Aagala Bibliagi soglenaid, unnila anmar Jehovábii dobgudii guoye (Apocalipsis 4:11).

19. Be wisgusale dule burgwisar igi gusdae, ¿ibu ibmar Bibliagi soglenaid be mag iddodbaloe?

19 Be wisgusale dule burgwisar nue igi gusdae, noar Bab igargi emar odurdagmalad bar be yardaggosulid. Anba be nue mag iddodbaloed ibiga Bibliagi soglenabali, dulemar yoogidse neg yeer daglegedgi sadegu gudi gumaloye. Degsoggu bar anmar benguosulid inniggigwad yoogidsega dulemar nabbaneggi sadegu gudi gudmaloe, ar anmar wisid burgwismalad baidsig nadsurmala, belagwa unnila burgwarmamai.

20. Capítulo 7 gine ¿ibu anmar durdaggoe?

20 Ebbenne Job sogsa inigwale: “Dule burgwisale, geg bar gannar durgu[ye]” (Job 14:14). Degiddega ¿dule burgwisale ibagwengi nabir gannar durgunoniggodibe? Bibliagi we ibmargi sunmaglenaid be durdasale, be yeer iddodagoed. Capítulo 7 gine anmar we ibmar durdaggoed.

^ parr. 5 Be nabbi wisguega burbagine sunmaglealir ibu obardae, apéndicegi absogo “¿Dule burgwisar e burba igi gusdae?