Yaba nanaid daggega

Menú baid daggega

Índice daggega

Jehovági sunmagmalad

dule

Bibliagine ¿nue igi soglenai?

 CAPÍTULO 8

¿Bab Dummad Reino ibua?

¿Bab Dummad Reino ibua?
  • Bibliagine ¿igi sunmaglenai Bab Reinogi?

  • ¿We Reino ibu imaggoe?

  • ¿Reino sanawa Bab ibmar abeged imagnoniggoe Nabbaneggi?

1. ¿Ibugine Jesucristo dulemar odurdasa?

JESUCRISTO dulemar odurdasad, igi Babse gorlegoe, mer yogasaar Babse gormalaga, igar nigga imaglegega. Jesús aa unni sogsad ibmar sogbaa egismaloye, anmar daggoena ibu ibmar sogbaa egismaloye sogsa, wegii nabir anmar wisguoed igi Bibliagi nue we igargi sunmaglenai.

2. ¿Ibu ibmar sogbaa Babse gollalir egislegoye Jesús e sordaganga sogsa?

2 Jesús dulemar odurdagsigu igi Babse gorlegoe, weyob e iddobugmaladga sogsad: “Degisoggua, bemar weyob Bab Dummadse gormalo: Anmar Bab nibneggi maid, be nug swilidig obariledii gusun. Be neg dagmaid [reino, TNM] anmarse be sedage. Igi nibneggi be sogedba be ibmar imagge, deyob, we nabneggi be imagdamo” (Mateo 6:9-13). Jesús ibmar sogbaa egissadi ¿ibu obarnanae?

3. ¿Ibu ibmar anmar Bab Reinogi durdagged abelege?

3 Bad anmar durdasad Bab Dummad nugye, Jehová. Anmar sunmasbalid Jehová ibmar imagmaidgi. Anba anmar durdasbalid ibu dulemarga imasa geb ibu imagbaloe. Auggi Jesús sogsagua Babse goloye “Be neg dagmaid [reino] anmarse be seda[ye]”, ¿ibu obarisa? Bab Reino, ¿nue ibua? We Reino alile, ¿igi Bab nuga swilidig gunoniggoe? Bab  Reino dagedgi sunmagledele, ¿ibiga sunmaglebaloe Bab ibmar abemaidgi?

BAB DUMMAD REINO, ¿NUE IBUA?

4. Bab Reino, ¿nue ibua? ¿Doa sulesa Reygala megega?

4 Bab Reinogi sunmagledele, Jehová gobierno obared. Jehová sogsadid doa neg seedga Reyga megoe. Degid, ¿doa sulesa Reyga megega? Jesucristo sulesadid. Wedi dummagan neg semamaidgi ise obinaled. Aaga we dulegi sunmagleder sogledae “dummagan e Dummadid, degine, reymar e Reyd” (Apocalipsis 17:14). Jesúsdi dummagan neg semamaidba bur bule ibmar nuegan nabir imagged, anba neg semamaid nueganye soglemaladgi ise obinarbalid.

5. ¿Bia Bab Reino sii, geb doamar idugoe?

5 Bab Reino, ¿nue bia sigoe? Anmar wisgugweler gebed, ¿bia Jesús mai? Anmar durdasad, Jesús suwargi bioglesad sorba durgusgua nibnegse nadye (Gusmalad 2:33). Degsoggu Bab Reino nibneggi sii, Jesús maidgi. Aaga Bibliagi soglege “reino nibneg gined[ye]” (2 Timoteo 4:18, TNM). Nibneggi sii inigwele, Nabbaneggi dulemar buggwad idumai guoed (Apocalipsis 11:15 absogo).

6, 7. ¿Ibigala bibbisaar baigan reymala Jesúsyobidi sadde?

6 Bamalad Reymardina Jesúsbo aggalad. ¿Ibiga ebo aggarmala? Ar Jesúsdi bar bibbisaar burgosulid. Bibliagi soglenaid, wedi dulemar reymaryobsurye, Jesús weyob sogsad: “degi sadegu an dula gudiid” (Apocalipsis 1:18). Degsoggu, bela ibmar nuegan imaggoedi bar berguosulid. Issesur ibmar nuegan imaggoed.

7 Be daggena igi Bibliagi soglesa Jesúsgi sunmaglesgu: “A dulegi Bab Jehová E Burba megoed: Nue binsaed nigga gued ega uggoed, nue ibmar magar iddoged ega uggoed, binsaed nued ugge imaggoed, degi, gangued nigga imaggoed, gurgin niggarba imaggoed, degi, Bab Jehová dobee nanadii imaggoed. We dule, Bab Jehová dobee nanaoedba  yeer iddodii guoed, dulemar daglegedba dulemarga igar nabogosulid, dulemar ibmar sogedba igar nudaggosulid. Dule wilemaladga igar nabbiragwadba igar nabogoed, degi, igar inniggigwadba dule belagwa daedga igar nudaggoed. E sunmaggedba dule buggwad obelogoed, e ibmar sogedba dule isgana oburgoed” (Isaías 11:2-4). Wegi soglenaidba mag dagleged Jesús Rey nued guoe, wile emar dagmai guoe. ¿Be yeer iddosulile, anmar dummad wegi neg seele?

8. ¿Doamala Jesúsbali neg semarmogoe?

8 We Reinosig ibmar baid soglenabalid: Jesús walagwen neg semai guosuli, baigana eba reyga arbamarmogoed. Aaga, Apóstol Pablo, Timoteoga sogsad: “Anmar Jesúsba naibigued iddosale, Jesús neg semaidba anmar eba neg semogoed” (2 Timoteo 2:12). Degsoggu, Pablo, Timoteo geb dulemar baigan, egi bangussurmaladba Jehová na susadi, Jesúsba reyga nibneggi arbamarmogoed, Bab Reino nibneggi siidgi. Degid, ¿ebigwa reyga gumarmogoe?

9. ¿Dulemar ebigwa Jesucristoba neg semai gumaloe, geb ingu Jehová wemar weali?

9 Capítulo 7 gine anmar durdasad, apóstol Juan ibmar dagsagua, weyob sogsaye “Sibad Wawaad Mimmi [Jesucristo], Sión yargi gwidsi an dagded [Nibneggi, Reygala onugsalesadgi]. Dulemar mili dula gugle gaggabagge (144.000) eba gwissimalad”. ¿Doamar we 144.000 mergumaladi? Juan sogsabalid: “Wemar, Sibad Wawaad Mimmi bia naoe, eba naddamalad. Wemar insega Bab Dummadgadga gumalaga, degi, Sibad Wawaad Mimmigadga gumalaga, dulemar abargi abonolesmalad” (Apocalipsis 14:1, 4). Wemar Jesucristoba nue nagusmaladid, geb Jesucristo wemar susad ebo nibneggi reyga neg semai gumalaga. Degsoggu nibneggi gudi guega odurgulesmalad sorbali, Jesúsbo “wemar, we nabneggi neg semarbaloed” (Apocalipsis 5:10). Apóstolmar ibagan aggale,  Jehová nue Cristoba nanamalad wealid, 144.000 merguoed dasga imaggega.

10. ¿Ibiga be sogsale Jehová, anmar sabedabali Jesús susa reyga guega, geb 144.000 mergu dulemar susbali reyga gumarmogaga?

10 Jehová, Jesús susad geb 144.000 mergu dulemar susbalid, nabbaneggi dulemar buggwad idugega, aaba mag dagleged Jehová nue dulemar sabe. Jesús anmar yobbira gudi gussoggu, aaga nue wisid dulemar igi wilebuggwa. Pablo sogsad we dule “anmar sunna wilub daglesmogad, degidde, gwen isgussulid, a ular, anmar nollo iddogedgi nabir wile anmar dagsunnad” (Hebreos 4:15; 5:8). Jesúsba neg semarmogoedi, dulemaryob waladasmarmogad. Anba anmaryobi alamasmarmogad mer noega geb anmaryobi bonigan iddosmarmogad. Degsoggu wismalad igi dulemar wilebuggwa.

BAB REINO, ¿IBU IMAGGOE?

11. ¿Ibigala Jesús e sordaganga sogsa, Babse egismaloye nibneggi be ibmar abeged imagye?

11 Jesús e sordaganga sogsasulid bemar Babse goddele Reino ularbii gormaloye. Anba sogsabalid gormarbaloye Jehová ibmar abeged, nibneggi geb nabbaneggi imaglegega. Bab neggi gusgu ángelmar nuegan Jehová ibmar abeged imagdamalad. Deginigwar capítulo 3 gine anmar durdasad ángel wargwen Babga ibmar imagged indasye, geb we ángel Babgi, Adán, Evabo obadsaye. Capítulo 10 gine anmar we ángelgi sunmaggoed, we ángel nuga Nia. Jehová abgayala Nia nibneggi gudigu onossulid, geb anba ángelmar baigan eba aggasmaladi abgayala onolessurbalid. Degsoggu, Jesús Nabbaneggi gudigu, ángelmar nuegan abargi, ángelmar isganamar nibneggi gudimarmoganad. Auggi wegibii neg gunai guosulid; Jesús Bab Reino e reyga gunoniggile geb Nia abin imadbalile, ibmar gwagdoed (Apocalipsis 12:7-9 absogo).

12. ¿Apocalipsis 12:10 gine ibu ibmar sogbo gusadgi sunmagnai?

 12 Wegi ibmar guoye soglesad: “Geb nibneggi gaya burba binnasur gole an iddosad. Weyob soged: “Emigindi, anmar Bab Dummad e abonoged igar nonisun. Anmar Bab Dummad e gangued nonisun. Anmar Bab Dummad e neg semaid nonisun. E Cristo e gargangued nonisun. Ar ade, nia sagla, Bab Dummad asabin anmar gwenadgangi muddiggidba, ibginedba, isdar sunmagdidaedi, onolessunnad” (Apocalipsis 12:10). Be dagsa wegine ibmar sogbo nue wisgulebied soglenaid. Gebbegwa, Bab Reino neg seoedgi sunmagnaid, Jesucristo idugoedid, geb sogbogi soglenaid Nia nibneggi onolesye, Nabbanegse barmeddelearye.

13. ¿Igi nibneggi neg gusa Nia onolesad sorba?

13 Wegi ibmar gusadbali ¿igi ibmar gude? Anmar absogoena igi nibneggi neg gudye soglenai: “Bemar, nibneggi bugmalad, wergumarsun ” (Apocalipsis 12:12). Nia, e ángelmar buraggwa nibneggi onolesadba, ángelmar nuegan yeer iddomalad, ar emidi nibneggi nueganbii besmalad, nue Jehovába nanamaladbii. Emidi emarga neg nugusad, nuedgi buraggwa arbabugmalad. Degsoggu Bab ibmar abeged bad nibneggi gunaid.

Nia e ángelmarbo nibneggi onolesmargua, Nabbaneg isguded. Auggi undar isgunai guosulid

14. Nia Nabbanegse barmeddelealidbali, ¿igi Nabbaneggi neg gude?

14 Nabbaneggi, ¿igi neg gudmoga? Bibliagi sognaid: “Bemar, nabneggi bugmaladdi, demargi bugmaladdi, ¡be[mar] duledar wilesmar! Ar ade, bemarse nia sagla nue urwedigine aidenoniggid. Ar nia saglade na wisid, e ibagan isse nabbi naid” (Apocalipsis 12:12). Nia sae iddodiid nibneggi onolesadba, ar bar undar gudi guosulid, aaga nabbaneggi neg oisgudiid. Capítulo 9 gine anmar sunmaggoed nabbaneggi neg isgusnaidgi. Emidi anmar sunmaggoena, igi Reino, Bab ibmar abeged Nabbaneggi imaggoe.

15. ¿Igi Nabbaneg gued Jehová abemai?

15 Ebinsao, igi Nabbaneg gued Bab abemai. Capítulo 3  gine be durdasad, Edéngi Jehová sogsaye Nabbaneg yeer dagle guoye, geb dulemar nuegan sadegu gudi gumaloye. Nia Babgi Adán, Evabo obadsagu, Jehová igi nabbaneg gued abesana abgayala gunonisursunnad, auggi e ibmar abeged gwagsasulid. Jehová anba abemaid Salmogi ibmar soglenaid guedi: “Dule[mar] nuegan damaladdi, Bab Dummad ega yar uggoye sogsadgi degi sadegu mai gumaloed” (Salmo 37:29). Bab Reino we ibmar imaggoed. ¿Igi imaggoe?

16, 17. ¿Bab Dummad Reino ibu imaggoye Daniel 2:44 gi soglenai?

16 Daniel 2:44 gine wegi ibmar guoye soglenaid: “We reymar ibagangine, Bab Dummad Nibneggi Maid, na rey wargwen degi sadegu reyga megoed barmidagoed. We reygi, dule baid bibbisaar obinosulid. Ar we rey bur yar bamalad obelogoed. We rey, degi sadegu reyga megoed”. ¿Ibu Bab Reinogi imaggoye soglenai?

17 Gebbedgi sognaid, we Reino signoniggoye bamalad “reymar ibagangine”. ¿We ibu obare? Sogledo, anba baigan reinomar buggwa signonimogoye. Sogbogi sognaid Reino uggiar unnila isse sigosurye, signoniggile sadeguoye. Gobierno baid soggwensaale we ogalagguosulid, we anar sigosurbalid. Sogbaagi sognaid, urwed nooye Bab Reino we nabbaneggi reinomar buggwadbo, ¿biddi naggoye sognai? Bab Reino obinoye sognaid. Geb sorbali, we Reinobii dulemarga neg semai gudoed. We reinoyobidi dulemar bibbisaar dagdisulid.

18. Bab Reino dulemar neg semamaidbo urwoed iba, ¿igi bilege?

18 Bibliagi soglenaid igi urwed nooe Bab Reino, nabbaneggi dulemar neg semamaidbo. Soglenaid neg bergued owarmasale, ángelmar isganamala, bela “nabneg ugagse reymar mamaid” yardaggega gaggan onasodmaloye. ¿Ibiga we ibmar imadmaloe? “Adi, Bab Dummad Bur Birigined e ibagi bila onomalagar”. Reymala oanbaggulegoed  “Hebreo gayaba neg Armagedónye nugadgine” (Apocalipsis 16:14, 16). Bibliagi sognaid Bab Reino dulemar neg semamaidbo urwoed iba Armagedónye bileye.

19, 20. ¿Ibigala Jehová ibmar abemaid emi ibagi gunasuli?

19 ¿Ibigala Jehová Armagedón onogoe? Gannar anmar ebinsaoena igi Nabbaneg gued Jehová abege: Nabbaneg yeer dagle gued abeged, geb dulemar nuegana egi anbagguedi, ega arbamalaga. ¿Ibiga Jehová ibmar abeged emi ibagi gunasuli? Gebbedgi, ar anmar bela isguedbiid, uwelegedbiid geb burgwedbibalid. Deginigwale, capítulo 5 gine anmar durdasad Jesús anmar anar burgwisye, anmar sadegu gudi guega. Be ebinsaer gebed Juan narmasad: “Ar Bab Dummad bela belad dulemar nabbaneggi buggwad sabsoggua, na e Massi wargwennagwadi ugsad, ar doa dule egi bensuli gunoniggile mer obelolegega, ar bur sadegu gudi guega” (Juan 3:16, TNM).

20 Ar dulemar isgus buggwadba Bab ibmar abeged gunasurbalid, gadi gaggansagusmalad, galagwensur dagusmalad, na gadi yardaggusmarbalid. Jehová ibmar abeged imagbisurmala. Dulemar ibmar isgana imagmaladi, Babse Armagedóngi obelolemaloed (Salmo 37:10 absogo). Geb anba dummagan neg semamaidmoga dulemarga sogsurmogad Babba igar imagmarye. Ar emarmoga nueggwa neg sesurmarmogad, abar emarba bir bir damalad, abar isguddamalad. Biblia nabir sogsad: “Dule, e maiga dule baid imaggele, ega boniga gunonidaed” (Eclesiastés 8:9).

21. ¿Igi Reino imaggoe Jehová ibmar abeged Nabbaneggi imaglegega?

21 Armagedón sorba, unnila Bab Reinobii neg semaguoed. We Reino Bab ibmar abeged imaggoed. Nia gugmaglegoed, geb e ángelmar gugmaglemarmogoed (Apocalipsis 20:1-3). Jesús burgwisadba Bab Reino dulemarga ibmar nuegan imaggoed. Dulemar bar bonigan  iddogosurmalad, bar burgosurmalad, nabir sadegu gudii gudmaloed (Apocalipsis 22:1-3 absogo). Reino Nabbaneg yeer dagle imagbaloed. Jehová ibmar abeged Nabbaneggi imaglegoed, geb Bab nug odummogoed, weyob Reino ibmar imaggoed. Bela dulemar Bab nug, Jehová, odungumaloed, geb Bab Dummad nug ibgwensur imaggosurmarbalid, bela weyob guoed Reino dulemarga neg sealir.

SANAWA BAB REINO IBMAR IMADOE

22. ¿Igi anmar wisi Bab Reino sigwissuli Jesús Nabbaneggi gudigua, geb abgayala e durgusad sorba anba sigwissurbali?

22 Jesús e sordaganga sogsagu, “be neg dagmaid anmarse be seda[ye]” Babse egismaloye, anmar wisid aa unni anba we Reino yoo sigenad. ¿Ingu signoniggi? ¿Jesús nibnegse nadgua? Suli. Ar Pedro sogsad geb Pablo sogsamogad Jesús durgusad sorba Salmo 110:1 gine ibmar soglesadi gunoniye, sognaid: “Bab Jehová an Dummadga sogsad: “An argan nuedsig be sige, be isdarmalad an bela ogalagguedse be sige” (Gusmalad 2:32-35; Hebreos 10:12, 13). Degsoggu, Jesucristo abiddosad, we iba owarmaggedse.

Bab Reino Nabbaneggi nibneggineyobi Bab ibmar abeged imaggoed

23. a) ¿Ingua Bab Reino neg seali? b) ¿Ibugi capítulo 9 gine sunmaglegoe?

23 ¿Bule undar Jesús abiddosii guoe? 1870 siggi, Biblia durdagmalad, binna binna mag iddononimalad 1914 sega abiddosii guoye. (Be we ibasig nabbi durdagbier, apéndicegi absogo  1914 birga yogsaaledsulid”) 1914 gine neg gagalededba anmar wisid we Biblia durdagmalad sogsamargua 1914 sega abiddosii guoye nue nabir sogsamalad. Bibliagi ibmar soglesmalad gumaidba mag dagleged 1914 gine Jehová, Reyga Cristo imasa geb aa birgagi Reino nibneggi siidi neg idude. Degsoggu Niaga “e ibagan isse nabbi naid[gine]” anmar buggwad (Apocalipsis 12:12; Salmo 110:2). Degsoggu anba nabir anmar sogbalid isse nabye Bab Reino, Bab ibmar abeged Nabneggi imagmogaga. Ibmar nued anmarga soglenaid ¿insoa? ¿Nue guodibe? Capítulo 9 gine be durdaggoed igi Bibliagi we igargi sunmaglenai.