Yaba nanaid daggega

Menú baid daggega

Índice daggega

Jehovági sunmagmalad

dule

Bibliagine ¿nue igi soglenai?

 CAPÍTULO 4

¿Doagi Jesucristo?

¿Doagi Jesucristo?
  • ¿Ibu Jesús imaggoe?

  • ¿Bia Jesús daniggi?

  • ¿Jesús dule igi daedina?

1, 2. a) Dule nug niggad e nug be wisile, ¿ibiga soglesuli be we dule nue mag dagye? b) ¿Jesús doaye dulemar sogdamala?

EMI ibagi, dulemar nug nigmalad yaisulid, inbaggwa bela dulemar mag daggedbii damalad. Auggi, unnila be we dule nugbii iddodidibe soglesulid mag be nueggwa we dule dagye, ar be wissulid bia daniggi, doamar e sergana, geb doa dulebali.

2 Jesús nabbanegse arbid aggar, 2.000 año gusa inigwale bela neg dirbimaggar dulemar wisidbimalad doagi Jesús. Auggine nueggwa wissurmalad nue doagi. Abar sogdamalad unnila binsa dule nued gudi gusye. Bamaladdi sogdamalad, unnila binsa Bab gaya burba berbeged gusmoye, geb abar sogdamarbalid we Bab Dummad daggenye. Ar bule nabirdibe.

3. ¿Ibigala nueggwa anmar wisgued abelege Jesús nue doagi?

3 ¿Ibiga nueggwa anmar wisgued abelege Jesús nue doagi? Ar Bibliagi sognaid: “Dule sadegu gudi gubiele, dule wisguer gebed, be doa dule, bebi Bab Dummad sunsogedmaid, geb wisgubalir gebed, Jesucristo doa dulemoga, be be we dule barmialidid” (Juan 17:3TNM). Degsoggu, Bab Dummad Jehovásiggi anmar ibmar durdaggele geb Jesússiggi, nabir anmar sadegu gudi guoed Nabbaneg yeer daglegedgi (Juan 14:6). Jesús e daedba anmarga igar mesisbalid igi anmar nued gudi gusale, geb igi  dulemar bamalad anmar aggwebalidi (Juan 13:34, 35). Capítulo 1 gine nueggwa anmar durdasad Jehová dule igi daedi, emidi anmar durdaggoed Jesús nue doaye Bibliagi soglenamoga.

MESÍAS DAGOYE SOGLESAD

4. ¿Ibu obare Mesías, geb Cristo?

4 Jesús gwaluleged iduale Bibliagi soglesad Bab Dummad dule wargwen barmidagoye Mesíasga guega, Cristoye soglebalid. Mesíasye soglegedi hebreo gayaba daniggid, geb Cristoye soglegeddina griego gayaba daniggid, sogbobela obared, dule wargwen onugsalesadi. Degsoggu, dule barmiledagoye  soglesadi Bab Dummad we dule onugsaoe arbaed soggwen nued ega uggega. Bamalad capítulomargi nabbi anmar durdaggoed ibu arbaed nued Mesíasga uglesa, Bibliagi iduaggwa ibmar soglesad imagnadabbi guega. Anmar durdagbaloed, igi Jesús emi ibagi ibmar nuegan anmarga nabir ugsale. Jesús gwaluleged iduale buggidar dulemar wisgubi gusmalar gebed: “¿doa Mesíasga guoeddibeye?”.

5. ¿Ibugine Jesús e sordagan bibbisaar bengussurmala?

5 Jesús gudi gusgua, e sordagan bibbisaar bengussurmalad, Jesús Nazaretginedi Mesías dagoye soglesadye (Juan 1:41). Pedro, Jesúsga sogsad: “Be Cristo” (Mateo 16:16). ¿Ibigala bibbisaar bengussurmala Jesús Mesíasye? ¿Ibigala anmar bibbisaar bensurmoga Jesús we Mesías?

6. ¿Ibu ibmar Jehová imasa e sordagan wisguega, doa dule Mesíasga gunoniggoe?

6 Profetamar, Mesías gwaluleged iduale, sogsamalad igi we dule mag daglegoe wee we Mesíasye. We ibmar mag iddogegala be binsae: Aeropuertogi dulemar yaisulid abarse be dule wargwen aminadele, auggi iduar be aa dule dagdisulile, dule baid bega soger gebed, igi we dule be mag daggoe. Deyobi Jehová imasmogad profetamar sogedi, Mesías ibu imagnoniggoe, geb igi gunonibaloe. Degsoggua, wegi dulemar nue Bab Dummadba nanaid daggarmalale profetamar ibmar sogsad gunai, mag dagmaloed doagi Mesías.

7. ¿Biddi profecíamar Mesíasgi sunmasmala, sogbo wis sogena?

7 Sogbo profetamar ibmar sogsad anmar daggoena. Soggwengine, 700 año ibmar gued iduale Miqueas sogsad, we dule barmiledagoedi gwalulegoye Beléngi, Judá yargi neggwebur bibbi naidgi (Miqueas 5:2). Ar degid, ¿bia Jesús gwalulessunna? Aa neggweburginsunna gwalulesad (Mateo 2:1, 3-9). Sogbogine, Daniel 9:25 gine sognaid sanawa Mesíasdega daglenoniggoe,  soglesad año 29 ginye. * We profecíamala geb bamalad profecíamar gunoniggidbali mag dagleged, Jesús, Mesíasye.

Jesús bautizar imasgu, Mesíasga gusad, Cristoga

8, 9. Jesús bautizar sasgua ¿igi nue mag daglesa Jesús, Mesías?

8 Año 29 bergunadabbidgine nue mag daglenoniggid, Jesús, Mesíasye. Aa unni Jesús, Juan emar Bautizar saedga sogsad, diwar Jordán nugadgi be an bautizar saoye. Jehová, Juanga sogsad, an bese oyogoye doa Mesías. Geb Jesús bautizar imagnagua Jehová, Juanse oyononiggid wee we Mesíasye, Bibliagi soged wegi ibmar gusye: “Ar Jesús Bab Dummad diigi ogleged igar imagsad sorba, diwargi gwissid naggwiarsunnad. Geb aagi nibneg ega argaded, degi, Jesús, Bab Dummad Burba Isligwaled nuuyobi egi agdedani dagsad. Geb degi nibneg aggar gaya burba gollalid, sogded: ‘We, An Massi sabed sunnad gued, weba weligwar an iddoged’” (Mateo 3:16, 17). Juan we ibmar dagsagua geb we ibmar iddosbargua, bibbisaar bengussulid Bab Dummad na Jesús barmiali (Juan 1:32-34). Aa iba unni Bab gangued Jesúsgi ubononiggid, weyobi Jesús Mesíasga gunoniggid, Cristoye soglebalid. Degsoggu, we dule emar idugedga guegala, geb Reyga guega sulenoniggid (Isaías 55:4).

9 Profetamar ibmar sogsadbali geb Jehová ibmar sogsamogadgine nue mag daglenoniggid, Jesús, Mesías daniggoye soglesadi. Anba Bibliagine ibmar sogbogi Jesúsgine sunmaglenabalid: bia Jesús daniggi, geb nue dule igi daedina.

¿BIA JESÚS DANIGGI?

10. Nabbanegse daged iduale, ¿bia Jesús gudiinye Bibliagine soglenai?

10 Bibliagine soglenaid nabbanegse daged iduale Jesús  nibneggi gudi gusye. Be daggena Miqueas sogsagua Jesús Beléngi gwalulegoye, sogsabalid, Jesús “anba yoo nabbaneg nague baddo gudibin[ye]” (Miqueas 5:2). Jesús sogdii gusmogad, edega nabbaneggi gwaluleged iduale nibneggi gudiinye (Juan 3:13; 6:38, 62 absogo; 17:4, 5). Jesús nibneggi gudii unni Jehová na yeer binalenad.

11. ¿Ibiga Jehová na gadi e Massi binarye, Bibliagi soglenai?

11 Jehová bela belad na e massi Jesús binaled, ¿be wisi ibigala? Bibliagi soglenaid Jesús “bela ibmar obinnilesad iduar baddo gudibin[ye]” ar Jehová we insogi obinyissoggu, gadi na binalenad (Colosenses 1:15). * Anba Jehová gadi Jesús binarbalid ar “E Machi Wargwenna[gwadid]” (Juan 3:16). We obare unnila we dulebii Jehová na walagwengi obinyisye. Geb we dulebii Jehovábogwa arbasbalid bela ibmar bamalad obinyedgi (Colosenses 1:16). Anba Jesús bilebalid “Gaya burba[ye]” (Juan 1:14). E Bab nuggi emarga sunmaggedba deyob bilebalid. Degsoggu, ángelmarga geb dulemarga igar ugdii nanasar gebed.

12. ¿Ibigala we Massi gebe saglaginedi e Babbogwa emar suli?

12 Abar sogdamalad we massi gebe saglaginedi Bab Dummadbogwa emarye, ¿bule nabirdibe? Bibliagindina deyob soglenasulid, párrafo nasadgi soglesad Bab Dummad, e Massi obinyisye. Degsoggu Jesúsdi gebbegwa bin obinyilesgweled, Jehovádina obinyilessulid, geb anba burgosurbalid (Salmo 90:2). We Massi wargwennagwadi na e Babyobi guedgi binsassulid. Aaga Bibliagi soglenaid Bab Dummad e Massibali bur dummaye (Juan 14:28 absogo; 1 Corintios 11:3). Ar Jehovábii unnila “Bab  Dummad Bela Gangued Niggadid” (Génesis 17:1). Degsoggu dule aayobidi sadded. *

13. ¿Ibiga Bibliagi soglenai “Cristo Jesús, Bab Dummad aggudagleged e wilub[ye]”?

13 Nega sagla unni anba yoo niisgwamala geb nabbaneg obinyilege, Jehová na e Massi gebe saglaginedbogwa diggasurgus bad gudimalad, ad aggale bad na yeer binarmalanad. Degsoggu, nue na sabgusmalar gebed (Juan 3:35; 14:31). We Massi sabedi e Babyob daenad. Aaga Bibliagi soglenaid, “Cristo Jesús, Bab Dummad aggu dagleged e wilub[ye]” (Colosenses 1:15). Ar igi abar burwigan na e bab sunnagwad damarmoga, Bab Dummad Massi na e bab daedyobi damoganad.

14. Jehová massi wargwennagwadi, ¿igi dulemaryobi gwalulenoniggi?

14 Jehová massi wargwennagwadi nibneggi gudii nabbanegse dage soggalid, dulemaryobi gudi saega. Ar degidde, ¿igi ángel nabir dulega gunonide? Jehová ibmar dagledisulid imasad. Yaagwa Judeagined Maríaye nugadi e massi nanga guega imasad. Dule e babga gussursoggua, isguedsuli gwalulenonisunnad. We mimmi Jesúsye onugsalesad (Lucas 1:30-35).

¿JESÚS DULE IGI DAEDINA?

15. Jesús ibmar imagdi gusadbali, ¿igi anmar wisgusale Jehová igi damoga?

15 Jesús Nabbaneggi ibmar imagdii gusadba geb ibmar sogdii gusadba nabir anmar wisgued, we dule igi daedina. Anba Jesús daedba nabir anmar wisgubalid Jehová dule igi daedmoga. ¿Igi anmar nabir wisgusale? Ebinsao, Jesús e Babyob daye soglesad. Ar aaga e sorda wargwenga weyob sogsad: “Ar dule an dagsale, a dule baddo an Bab dagsado” (Juan 14:9). Bibliagi Evangeliomarye bilenaid  —Mateo, Marcos, Lucas geb Juan— we libromar Jesús gudi gusadgi sunmagnaid, Jesús ibmar imasadgi, geb soglenabalid igi Jesús daena.

16. ¿Ibugine bur Jesús sunmasa, geb doa sogedba we ibmargi emarga sunmasa?

16 Jesús biledabalid “odurdagged saglaye” (Juan 1:38; 13:13). ¿Ibu ibmargi Jesús emar odurdagdii gusa? “Bab Dummad e neg dagmaid gaya burba nuedgi sunmagdii gusad”. Bab Dummad neg idumai gudele, dulemar nue eba nanamaladga ibmar nuegan uggoed (Mateo 4:23). ¿Doa sogedba Jesús we ibmargi emar odurdagdi gusa? Jesús weyob sogsad: “An ibmar odurdagged angadsulid, Bab Dummad an barmialid sogedba an dulemar odurdagged”. Degsoggua, Jehová ega sogsadid we ibmargi be emar odurdaggoye (Juan 7:16). Jesús wisinad e Bab abege bela dulemar e gaya burba nuegan wisgumaladi. Capítulo 8 gine bur nueggwa Bab Dummad neg dagmai guoedgi sunmaglegoed, geb soglebaloed ibu imagbaloe.

17. ¿Bia Jesús emar odurdasdae, geb ibigar emarga Bab igargi sunmaggedgine nue alamasa?

17 ¿Bia Jesús emar odurdasdae? Dulemar abin gualir emarbo sunmasdaed: sabburbali, neggwebur dummagangine, neggwebur burwigangine, ibmar ugleged neggine, emar neggine. Jesús dulemar es daged abiddossurdaed, eedi emar aminaddaed (Marcos 6:56; Lucas 19:5, 6). ¿Ibiga emarga Bab igargi sunmaggedgi nue alamasa? Ar e Bab deyob imagleged abesanad, ar gusgu Jesúsdina e Bab sogedba ibmar imagdasoggua, deyob imasad (Juan 8:28, 29). Auggine unnila ega soglesadba deyob imassulid, ar dulemar esega nonidamalad wile daggedba deyob imasbalid (Mateo 9:35, 36 absogo). Jesús ibagangi Bab igargi emar odurdagmalad gudi gusmaladi dulemar odurdagsa wilubmalanad Bab igargi geb Bab ibmar imaggoedgi, auggine emardi bai dulemar dagsasurmalad.  Ar Jesúsdina wisinad nue abelege dulemar e Bab neg idumai guoed igar wisgumaladi.

18. ¿Igi Jesús ibmar imagdii gusad be nued dagmoga?

18 Jesús dule gwage nuedinad, nued emar aggwedii nanasad, nue emar sabgudii nanasbalid. Ibgwensur dulemar imagdii gussulid, burwiganse baggale Jesús walig gudiir yeer iddodamalad (Marcos 10:13-16). Unnila dulemar soggwenbii binar gussulid. Ibmar isgana imagleged nabir dagsasulid, geb igar mamaidba ibmar imaglesulile nabir dagsasurbalid (Mateo 21:12, 13). Jesús ibagangi massergan ibgwensur omegan imagdamalan inigwale, Jesúsdi ibgwensur omegan imassulid (Juan 4:9, 27). Bibbisaale Jesús emarba na dummarba imassurbalid. Edina dummad inigwale e apóstolmargarbela nag enusbalid.

Jesús emarga Bab igargi sunmasdaed

19. ¿Ibu ibmar imasadbali anmar wisi, Jesús dulemar wiledimalad wile dagdae?

19 Jesús Bab ganguedba dulemar nudagdii gusadbali, mag daglesad Jesús dulemar wile dagdae (Mateo 14:14).  Be iddogena dule ugga yayad Jesússe nonigua, ega sogded: “Sunna be an nudagged, be an nudagbier”. Jesús we dule wilesii daggargu na eeyobi iddosad. Wile daggedba, ese saggwa oyoded, we dule ebusad geb ega sogsad: “Nugubi an be abeged. ¡Be nugusun!” Geb degi dule boni niggad nugussunnad (Marcos 1:40-42). ¿We dule igi iddos be binsae?

BIBBISAAR BABGI BANGUSSULID

20, 21. ¿Anmar eba daega, igi Jesús nue Bab Dummadba ibmar imagdi nanasa?

20 Jesús e Bab sogedba igar imagdii gusad, geb egi bangussurbalid, aaga anmar eba daed abelemogad. Anba bamaladse wiles inigwale geb egi agbidsamarbar inigwale, bibbisaar e babgi bangussulid. Nia e binsaed ganagusgua ese binsaed galessurbalid (Mateo 4:1-11). Ebbenne abar e gwenadganbela Jesús ibmar soged iddossurmalad, agga soggardamalad: “Wis dargwen iddoye” (Marcos 3:21). Deginigwale, Jesúsdi bai iddossulid, agga bur bule Babga  arbadii gusad. E isdarmalad ese ulusdamargua geb sabsur imasdamarbargua, Jesúsdi abin nuedgi imasdaed, aggar emar imaggedgi binsassulid (1 Pedro 2:21-23).

21 E isdarmalad sabsur Jesús oburgwismar inigwele bibbisaar Babgi bangussulid (Filipenses 2:8 absogo). Be binsaena Jesús oburgwelenagua bule wiles be iddoge. Bai iddossulid neg semamaid e ganonimargua, dulemar e ogaggansadmargu, anba bai iddossurbalid juez isganamar egi agbiddemargu, dulemar egine dodoarmargu, soldadomarmoga sabsur imasmarmogad. Suwargi bioglesnai sogsad: “Bergussun” (Juan 19:30). Ibbaagus burgwismai Bab Dummad gannar odurgusad burbar gudi guega (1 Pedro 3:18). Geb aa sorba gannar nibnegse nadsunnad aagi na “Bab Dummad argan nuedsig sigidabsunnad” abiddosii guded ega gangued ugleged, Reyga guega (Hebreos 10:12, 13).

22. Jesús anmar ular burgwisadbali, ¿igi anmar gudi gunoniggoe?

22 Jesús burgwedse Babgi bangussulidbali, ¿igi nabir anmar gudi gunoniggoe? Jesús anmar ular burgwisadbali nabir anmar nabbaneg yeer daglegedgi sadegu gudi gumogoed, igi gebbe Jehová abesana. Capítulo 5 gine anmar durdaggoed Jesús burgwisadba, igi dulemar deyob gudi guoe.

^ parr. 7 We librogi soglenaid igi Daniel ibmar sogsadi Jesúsgine gunoniggi, be nabbi durdagbiele absogo apéndicegi “Profeta Daniel sogsad sana Mesías noniggoe.”

^ parr. 11 Ar Jehová bela ibmar obinyisadba, Babye ese gorleged (Isaías 64:8). Bab Dummad, Jesús obinyisadba, Jesússe gorleged Bab massiye, geb aaga ángelmarse geb Adánse, Bab mimmiganye gorlemarmogad (Job 1:6, TNM; Lucas 3:38).

^ parr. 12 We librogi soglenabalid ibigala we Massi gebesaglaginedi Bab Dummadbogwa emarsuli, be nabbi durdagbiele absogo apéndicegi “¿Bab Dummad warbaadibe?