Yaba nanaid daggega

Menú baid daggega

Índice daggega

Jehovági sunmagmalad

dule

Bibliagine ¿nue igi soglenai?

 APÉNDICE

¿Cristo sordagan cruz ebuged abeledibe?

¿Cristo sordagan cruz ebuged abeledibe?

BUGGIDAR dulemar gadi cruz binarmalad. Aaga Enciclopedia Hispánica soged cruz “Cristo sordagan gadye”. Auggi dule Cristo sordaye sogele cruz ebuged abelesulid, ¿ibigala?

Ar Jesucristo cruzgi oburgwilessulid. “Cruzye” anmar biedi griego gayabardi bileged staurós, we “suwar obardaed”. Staurósye soglegedi “suwar cruzyob dagleged obarsulid [...]. Nuevo Testamento narmaglesgua bibbisaar binsalessulid we suwar cruzyobi dagleye. Staurós, griegoba suwar obardaed” (The Companion Bible).

Biblia narmasmalad sogsamargua ibu ibmargi Jesús oburgwilesa, griego gayaba sogsamalad xýlon gine bioggar burgwisye (Gálatas 3:13).

Hermann Fulda e libro Das Kreuz und die Kreuzigung (La cruz y la crucifixión) gine sogsad ibiga suwar ebuledae dulemar oburgwega, sogsad: “Bia dulemar oburgweledae dogdar sabbimar saddedaenad, degsoggu suwar suid digsadamalad dule isgana egi saggwa nibaggwa nai edinnega, sulirdi biogsadamalad geb e nag edidsadamarbalid”.

Auggi Bibliagi bur nabbiragwad sognaid. Apóstol Pablo sogsad: “Dule Moisés Igar Maidba dasulir, uggabsalegoye soglegedi, Cristo, anmar abonogegala, we uggabsaleged anmar anar sunoniggid. Deyob anmar bagnoniggid. Ar Bab Dummad Gardagi narmaggar naid: “Dule wargwen urgogi bannumaggar nasiglesale, we dule Bab Dummadse nue uggabsalegaledid” (Gálatas 3:13). Pablo wegi sunmasgua Deuteronomio 21:22, 23 segadgine naid obarisad aagi suwargi sunmagnaid, cruz obarnasulid. Sogsabalid, dule isganamarbii suwargi bioggar oburgwilesdaye, aaga nuedsulid Cristo sordagan, Cristo cruzgi bioggar naid e neggi sedi guedi.

Cristo burgwisad sorba 300 año nanasadgi e sordagan cruz ebusurmalanad. Geb siglo IV gine emperador  Constantino, Cristogi bangusmaladba nagunonigua cruz ebugedgi sunmaggalid. Wissursundo ibiga Constantino cruz ebuarmodibe, auggi Jesucristodi sogsasulid cruz ebumaloye. Dulemar Bab igar wissurmalad cruz ebumalanad. Degsoggu católico libro maddagwen soge daglealid: “Cristo daged idu dulemar bad cruz ebudimalanad, geb dulemar Cristo wissurmaladi anba bad cruz ebumarmoganad” (New Catholic Encyclopedia). Geb bamalad we igar balamismaladi sogsamarmogad, ebbenne dulemar cruz asabin Babse gordamarye geb bamaladdi, nisaar ibmar imaggega cruz ebudamarye.

Ar Bab igar wissurmalad cruz ebumalansoggu, ¿ibigar degidde ebuleali? Cristogi bangusmalad, Bab igar wissurmalad eba aggaega cruz ebuarmalad. Auggi Bibliagindi sognasulid Cristo sordagan sunsogmaladi egi naggulegega we ibmarmar ebumaloye (2 Corintios 6:14-18). Bibliadi soged mer bibbisaar wegimalad ibmar ebumaloye (Éxodo 20:4, 5; 1 Corintios 10:14). Degsoggu Cristo sordagan sunsogmaladdina cruz ega naggulegega ebugosurmalad. *

^ parr. 1 Be nabbi cruz siggi durdagbiele, absogo garda Razonamiento a partir de las Escrituras, página 91, 95 se, we garda Jehovági sunmagmalad onosad.