Yaba nanaid daggega

Índice daggega

Jehovági sunmagmalad

Gaya soggwen suo dule

 CAPÍTULO 14

Igi neguyagi yeer iddodii gudi gulesale

Igi neguyagi yeer iddodii gudi gulesale
  • Massered, sui nuedga guega, ¿ibu imaggoe?

  • Ome nuedga guega ome, ¿ibu imaggoe?

  • Babgan nueganale, ¿ibu imagmaloe?

  • Mimmigan, ¿ibu imaggoe neguyagi yeer iddodi guega?

1. ¿Igi nabir neguyagi babgan na mimmiganbo yeer iddodii gusmalale?

JEHOVÁ abeged neguyagi gwenadgan yeer iddodi gued. Aaga Bibliagi igar mesisad, babgan geb mimmigana ibu imagmaloe. Biblia sogedba damalale nued gudi gumaloed. Jesús sogsad: “Dulemar, Bab Dummad gaya burba iddomalad [...], degi, a sogedba nanadimalad” yeer iddodii gumaloye (Lucas 11:28).

2. Babgan na mimmiganmala yeer iddodii gumalaga, ¿ibu mer iemalar gebe?

2 Babgan na mimmiganmala yeer iddodi gumalaga mer iemalar gebed, Jehová, gwenadgan buraggwa gudi guedga obinyisad. Aaga Jesús sogsad Bab Dummadi, “anmar Bab[ye]” (Mateo 6:9). Bab sogedba bela gwenadgan nabbaneggi bugsoggua, edi wisbalid igi nabir yeer iddodii gusmalale (Efesios 3:1415). Degid, ¿ibu babgan geb mimmigan imaggoye Bibliagi soglenai?

BAB DUMMAD, DULEMAR URBISADID

3. ¿Igi gebbe gwenadgan anbaggudye Bibliagi soglenai, geb igi anmar wisi gaggansuli?

3 Gebbe dulemar anbaggudgua, Jehová, Adánga, Eva ugsad  e abirginga guega, weyobi na niggunonimalad. Edéngi wemarga neg yeer dagle nasisad, aagi gudi gumalaga; wemarga sogsabalid mimmigan niggumaloye. Emarga soglesad: “Bemar mimmigan buggidar niggumar. We nabneggi dula buggidar urbemar, degi, bela we nabneg ugaggaase anbiggumar” (Génesis 1:26-28; 2:18; 21-24). Génesisgi ibmar sognaid gaggansurye Jesús sogsad (Mateo 19:4, 5). Emi ibagindi anmarga nue neg isgusnaid, Bab sogsayob anmar gudisulid. Degi inigwale anba emi ibagi gwenadgan nabir yeer iddodii gudi gusmalaled.

4. a) Babgana geb mimmigana, ¿ibu imagmalar gebe neguyagi yeer iddodii gudi gumalaga? b) Neguyagi gwenadgan buraggwa yeer iddodii gudi gumalaga, ¿ibigala nue durdagged abelege Jesús ibmar imagdii gusad?

4 Bela neguyagi gwenadgan Bab Dummadyob daele, na mudsub mudsub sabgumalale yeer iddodii gumaloed (Efesios 5:1, 2). Auggi ¿igi anmar Babyob daoe, ar anmar, dagdisulid? Nabir anmar wisgued Bab dule igi daedi na massi gebe sagla unnid barmialidba (Juan 1:14, 18). Jesucristo, nabbaneggi gudi gusgu e Bab sunnagwad ibmar imassoggu, dulemar, Jesús dagsamaladi, geb iddosmaladi Jehová dagsayob, geb Jehová iddosmalayob gusmalad (Juan 14:9). Anmar durdaddibe igi Jesús emar sabgudii gusa, geb anmar aayobi na mudsub mudsub sabgumarmogale, anmar nabir neguyagi yeer iddodii gudi gusaled.

MASSERGAN DOAYOBI DAOE

5, 6. a) Jesús na sordagan aggwisayobi, ¿igi massergan na omegan aggwemogoe? b) Bab, dule wargwenga isgued iegega, ¿dule ibu imagger gebmoga?

5 Bibliagi soglenaid igi Jesús e sordagan aggwisa, massergan deyob na omegan aggwemarmogoye. Be iddogena wegi sognaid: “Ar igi Cristo na eba nanaimalad sabgusa, degine, Bab Dummadgadga imaggega eba nanaimaladbina burgwisa, deyobi, massergan, be[mar] ome na [...] sabgumar. Ar sui, igi Cristo na eba nanaimalad sabgue, deyob, na e ome  sabgumogar gebed. Ar sui, igi na e san sabgue, deyob, na e ome sabgumogo. Ar dule na e ome sabele, duggin na e san sabgued. Ar dule bibbisaale e san geg na isdar dagged, bur bule e san na nued aggwed, degi, nue na masgi ogunbalid. Ar deyob, Cristo na eba nanaimalad imagmogad” (Efesios 5:23, 25-29).

6 Jesús na sordagan sabgusayob, massergan na omegan sabgumogoed. Jesús burgwedse na sordagan sabgusad, aaga wemar anar burgwisad, anba ega nosmar inigwale (Juan 13:1; 15:13). Aaga ome nigmaladga soglenaid, “be ome be nue sabgu[dio], mer be sabsur imaggo” (Colosenses 3:19). ¿Igi massered wegi sognaidba ibmar imaggoe e ome yogsaar ibmar imader? Massered ebinsaed abeleged emoga noar ibmar imaddamoga, Bab e noed ega iegega, ¿ibu imagger gebe? Dule aggar e imasdibe ibmar ies saer gebed, e ome egi nosmodibe ibmar ega ies samogar gebed (Mateo 6:12, 14, 15 absogo). Aaga sogledaed, dulemar wissur gannar gannar ibmar nosadgi sunmagmaladi, na abirgunagwar yeer iddodidamarye.

7. ¿Ibu ibmar Jesús iessuli e sordaganbo gudi gusgu, geb ibiga nuedi massergan weyob damarmogad?

7 Massergan, mer we ibmar iemalo, Jesús ibgwensur na sordagan imassulid. Jesús iessulid eba nagusmaladi bela ibmar wissurmalana, iessurbalid e sordagan inbaggwa geggusdamarbalina. Be iddogena, ibagwengi emar nue geggusgua, emarga sogsad: “Nega dule sulidganba bemarbi [...] anba dagmar, agi bemar obunnogegar” (Marcos 6:30-32). Ome abemogad e sui weyob e aggwed. Bibliagi masserganga soglenaid,“omegan anmarba bur nollogwad”. Omegan bur masserganba nollosoggua, massergan sabsur omegan imagged abelesulid. ¿Ibigala? Yoowedse Bab Dummad, dulemar bendadele, ar masserganbii bendaglegosulid sadegu gudi guega, omegan bendaglemarmogoed (1 Pedro 3:7). Massergan, ebinsamalo, Jehová yeer dagged dulemar egi bangudisurmalad, omedibe, massereddibe (Salmo 101:6).

8. a) ¿Ibiga soglesale “massered na ome sabele, na duggin sabgudiye”? b) ¿Ibu obare soglegedi unnila san wargwenna gunonimarsunye?

 8 Biblia soged, “massered na ome sabele, na duggin sabgudi[ye]”. Ar Jesús sogsad, dule, ome niggusale “bar warbosulid. Unnila san wargwenna gunonimarsunnad” (Mateo 19:6). Degsoggu nuedsulid, dule ebogwadsulir ebo gabed (Proverbios 5:15-21; Hebreos 13:4). Aaga nuedsulid massered na eginbii binsaed, geb omemoga na eginbi binsamogad (1 Corintios 7:3-5). Be iddogena wegi sognaid: “Ar dule bibbisaale e san geg na isdar dagged, bur bule e san na nued aggwed, degi, nue na masgi ogunbalid”. Masseredi na ome sabgued abeleged, na duggin sabgudiiyobi, geb ieged abelesulid Jesucristo e dagmai igi ome aggwedii (Efesios 5:29; 1 Corintios 11:3).

9. ¿Igi Jesús daye Filipenses 1:8 gine soge, geb ibigala massergan deyob damogadi?

9 Pablo sogsad, Jesucristo nue dulemar sabye (Filipenses 1:8). Dulemar yeer iddosmalad Jesús sabedgi emar sedii gusadba. Omegan eba nagusmaladi yeer iddosmalad nued aggwilesmaladba (Juan 20:1, 11-13, 16). Aayob ome abemogad e sui sabedgi e sedii saedi.

OMEGAN DOAYOBI DAOE

10. ¿Igi omegana Jesúsyobi damarmogoe?

10 Neguya nueggwa selegega, dule wargwen iduger gebed. Jesúsbela dule baid sogedba ibmar imagmogad. “Bab Dummad, Cristo nonoga gusimogad” igi “massergan, omegan nonoga gu[si]moga” (1 Corintios 11:3). Jesús, e Babba ibmar imasadba, anmarga igar nued mesisad, ar bela dule wargwen anmar idugoedbimogad.

11. ¿Ome igi daed abelege, geb ome daedba e sui sun ibu imadele?

11 Bela anmar noedbisoggu, massergan sun ibmar noar imagmogad. Inniggidi neguya seosurmalad. Noar ibmar imadele, ¿e ome ibu imagged abelege? Abelesulid ome e suigi agbined, abelesurbalid ome eedi neguya sebi gudaged. Omegan  ieged abelesulid dule wissur urwed Bab nued dagged (1 Pedro 3:4). Ome sui niggad weyob daele, ega neg undar gualile beedse ega guosulid e suiba ibmar imaggega. Bibliagi nabalid: “Ome, e suigi binsaed niggaa nanadii guo[ye]”(Efesios 5:33). Auggi, ¿e sui Cristoba nasulirdina? Omegan sui nigmaladga Biblia wegi sognaid: “Omegan, [...] sui urbaligwa [...] nanamar. Deyobile, be sui Bab Dummad Gaya burba abin gabisulile ega be sunmaggedba, bur be daedba Bab Dummadba nagu[...]oed. Be sui nue inniggii nanae be dagdagoed, egi nue binsaed niggaa nanae be dagdagoed. Abali, Bab Dummad Gaya burba abin gaoed” (1 Pedro 3:1, 2).

12. ¿Ibigala issaggwasuli ome nuedgi na e binsaed sogmogadi?

12 Ome e sui Cristoba nadibe, nasurdibe auggi ome nuedgi e suiga sunmaggele anba ebinsaed e suibo aggardibe soglesulid ibgwensur e sui saye. Sun ome ibmar soged bur nabiriled. E sui e ome ibmar soged iddomogale sun emarga igar nuedga gusaled. Abrahán neg yagi wis urwed nodgua, Sara, Abrahánga sogsad, igi igar onugulesale. Abrahán nued abin iddossur inigwale, Jehová ega sogsad: “Ar ibi Sara bese egissialile, aba be ibmar sae” (Génesis 21:9-12 absogo). Massered soggalir weyob ibmar imaglegoye, auggi Bab igargi yolesulile, ome eba igar saoed (Gusmalad 5:29; Efesios 5:24).

¿Sara igi omeganga igar nued mesisa?

13. a) Tito 2:4, 5 gine, ¿igi daoye soglenai omegan sui nigmaladga? b) Bibliagi, ¿igi igar mai na gi bangumaladgi geb na leygi meddemaladgi?

13 Neguya nueggwa selegega omegan ibmar imagmogar gebed. Be daggena, Biblia soged omegan sui nigmaladga: “Suimar sabguedgi, nue binsaed niggadaedgi, san swilidig nanaedgi, neg nued aggwedgi, nueddaedgi, e sui urbaligwa nanaedgi” bemar gudi gumaloye (Tito 2:4, 5). Ome weyob ibmar imagger, na gadi binarmaloed (Proverbios 31:10, 28 absogo). Auggi dulemar ber noedbisoggua, dule, abirgin niggusar sun na gi yolenonimaloed. Degsoggua geg igar nugu gualir nabbis na gi bangue dagledamaloed, sulirdi, na leygi medde dagledamaloed. Bibliagi soglenaid nabir na gi  bangumarye, auggi mer yogasaar imagmaloye. Aaga Bibliagi soged: “Ome mer e sui meddoye”. Geb “masseredmo, mer ome meddemogo[ye]” (1 Corintios 7:10, 11). Geb Bibliagi soglenaid unnila nabir leygi na meddemarye e abirgin diggarba egi yolediir (Mateo 19:9).

IGI SERGAN NUED MIMMIGAN AGGOE

14. ¿Igi Jesús burwigan dagsa, geb mimmigan ibu e babgan imagged abesurmala?

14 Jesús, babgan odurdasad mimmigan aggwedgi. Dulemar burwigan gabi guarmargua mer Jesússe namalaga, Jesús sogsad: “Mimmigan be anse daged imagmar, mer be igar gamar”. Geb Bibliagi sognabalid “Jesús mimmigan angaagwar gasgua, e argan mimmigan birgi mesisad, nued mimmigangi binsasad” (Marcos 10:13-16). Jesús, mimmigan obadsasursoggua, ¿babgan, bemar deyob imaggedsurmoga? Baba, be mimmigan unnila isse ebo sigwed be abesurmalad. Degsoggu, bemar iba amiged abeleged mimmigan odurdaggega, ar Jehová weyob bemarga igar mesisad (Deuteronomio 6:4-9 absogo).

15. ¿Ibu babgan imagger gebe nueggwa na mimmigan aggwemalaga?

15 Emi ibagi yeer neg isgusnasoggua, abeleged babgan  nueggwa na mimmigan aggwed, ar dulemar burwigan sangi dodomalad yaisur gusad. Jesús nued na e sordagan aggwedi gusad aaga na sabedgi e sordagan bisad an “mimmigan[ye]”. Oburgwelegega galesgua, igar amisad e sordagan nabir wagginnega (Juan 13:33; 18:7-9). Be, mimmi niggale nue daggo abaggar Nia, be mimmi Bab igargi obannalile. Bemar na mimmiganga nue sogmalo ibu ibmar emarga sun boniga gusale (1 Pedro 5:8). * Bar neg ebbennegwayob nasulid emidi ibgwensur burwigan sabsur imagle gusad, Bab igargi ibgwensur oballe gusbalid.

Jesús igi burwigan imasa, ¿babgan bemar ibu durdagge?

16. Jesús na sordagan aggwedi gusadgi, ¿ibu babgan durdagge?

 16 Jesús burgwed iduale e sordagandi gaenana gusad doa bur dummadga guoe Jesús emar abin sae iddossulid, e daedbali geb sunmaggedbali e sordaganse oyosad igi daed abelemalana (Lucas 22:24-27; Juan 13:3-8). Be, mimmigan niggale, ¿igi be Jesúsyobi be mimmiganga binsaed dagsamogale? Burwigan unaed abeleged, auggi abbur ega ibmar sogedginsulid, geb urwedginsurbali. Degsoggua mer yogasaar binsassuli sunmaggo, ar be yogsaar sunmadele, esyobi sun be, be mimmigan nagbisasaled (Jeremías 30:11; Proverbios 12:18). Be mimmiga be ibmar sogsale, mimmi sorba mag iddo gued abeleged, we ibmar nued ega soglesye (Efesios 6:4; Hebreos 12:9-11).

MIMMIGAN DOAYOBI DAMALOE

17. Jesús, e Babba ibmar imagdi gusadgi mimmigan, ¿ibu durdagmoga?

17 ¿Mimmigan Jesúsgi nabir ibmar durdagmardibe? Gwendina. Jesús e daedgi oyosad burwigan e babganba daoye. Sogsad: “An iddolegedba an ibmar imagdisulid. [...] an bela ibmar imaggedi, an Bab nabir iddoge an imagged” (Juan 8:28, 29). Igi Jesús, E Bab nibneggi maidba ibmar imasa, aayobi mimmigan na babganba ibmar imagmogadid, ar Bibliagi deyob soglenaid (Efesios 6:1-3 absogo). Jesúsdina Bab Massi inigwale nabbaneggi e serganga gusmaladbali igar imasad, anba wemar noddamar inigwale. Aaga Jesús, e gwenaganbo yeer iddodii gusmalad (Lucas 2:4, 5, 51, 52).

18. ¿Ibiga Jesús, e Babba igar imasdae, geb mimmigan, e serganba damaladi doamar yeer oiddogoe?

18 ¿Igi nabir mimmigan Jesúsyob dae gusmarmogale, e sergan yeer oiddogega? E serganba igar saer gebed. Inbaggwa ibgwensur guosur inigwale, Jehovádina abeged mimmigan e serganba daedi (Proverbios 1:8; 6:20). Jesúsdi gusgu e Babba igar imagdii gusad, anba ega ibigwensur gusurdae inigwale. Ibagwengi e Babba igar saed ega beedse gunonigua  sogsad: “Melle be an wiogodo”. Auggine e Bab ega ibmar sogsadba imasad, ar wisinad e Baba wisi ibiga weyob ibmar guoe (Lucas 22:42). Babganmoga yeer iddomogoed e mimmigan eba daele, geb Jehová yeer iddomogoed (Proverbios 23:22-25). *

Ibmar isgana imagye bega soglealir, ¿ibugi be binsaoe?

19. a) ¿Ibu Nia imagge mimmigan yardaggega? b) Mimmigan nued dasurmalale, ¿bule babgan wioge?

19 Nia, Jesús yardagbi gusad, geb anba mimmigan yardagbimogad ibmar isgana imagmalaga (Mateo 4:1-10). Nia imagged aimar isgana mimmigan oisogega, ar wisid ibgwensur wemarsega binsaed galesmalale. Degsoggu mimmigan, aimar isganamarba aggaed abelesulid (1 Corintios 15:33). Be daggena igi Dina gusa, Jacob sisgwa. We bunagwa Jehovába nasurmaladba aggasadbali dummad neg gagasad (Génesis 34:1, 2). Mimmi, be binsaena, ¿bule be, be sergan wiosar be na iddoge be neg sidsigi galagwensur gudiir? (Proverbios 17:21, 25).

 NEGUYAGI YEER IDDODII GUDI GUED

20. Neguyagi yeer iddodii gudi gumalaga, ¿ibu imagmalar gebe?

20 Neguyagi urwed noalile bur nuedid Biblia sogedba igar imagged, deyobile ibgwensur igar nugued. Degsoggu neguyagi yeer iddodi gudi gulegegala Biblia sogedba ibmar imagleger gebed. Massergan, na omegan sabgumalo, Jesús na sordagan sabgusayob. Omegan, massergan sogedba nanamalo, Proverbios 31:10, 31 segadgine sognaidyobi. Babgan, mimmigan odurdagmalo (Proverbios 22:6). Massergan, nue neguya semalo (1 Timoteo 3:4, 5; 5:8). Mimmigan, babganba damalo (Colosenses 3:20). Dule wargwensaale neg yaggi noar ibmar imaggosurye soglesulid, degsoggu wis dule nosale mer gannar gannar ega ibmar obarmalo.

21. Yoogidse, ¿igi neg guoe, geb emi ibagi ibu anmar saer gebe anmar na gwenadganbo yeer iddodii gudi guega?

21 Bela neguyagi gudimaladga Biblia binsaed nuegan ugnaid. Biblia neg nued daniggoedgi sunmagnaid, geb sunmagnabalid nabbaneg yeer dagle guoedgi, aagine Jehovága arbamaladi yeer iddodii gudi gumaloed (Apocalipsis 21:3, 4). ¡Yoogidse bela neg nuguoed! Degi inigwale anmar Biblia sogedba igar saele anba emi ibagi nabir anmar yeer iddodii gued anmar gwenaganbo.

^ parr. 15 Nue mimmigan aggwega, binsaed nuegan uglenaid garda Aprendamos del Gran Maestro capítulo 32 gine, Jehovági sunmagmalad we garda onosad.

^ parr. 18 Mer Bibliaba igar imaggoye e sergan mimmiganga soggalirbii unnila eba igar saosurmalad (Gusmalad 5:29).